ˈSɛɛ- ˈghwlʋa ˈe -Glibha aˈ jiebhopoʋn bho ɛ

ˈDhoudhi -ɲmai -e ˈdhoudhi -ɲnʋnkpaeˈ:

-Abʋ -ɔɔ ˈˈɲɩanˈˈ Zoova a, -a -kman ɔɔˈ ghwlu nɩan Biiblʋ aˈ dɩ. -A deɛ -gwlɩˈˈ -ka -bo ʋan bhla nɩan ˈtɔdɩ, -ka ʋan ˈˈduaˈˈ ɲʋn ˈsrɩn ˈdhe dhɩ -duuˈˈ aˈ dɩ ˈdhi ˈˈdhe ʋan toɛˈ -ka Zoova kman ɲʋn anˈ klɛɛ ɛˈ dɩ ɛ. (Psaume 119:105; Luc 1:3; 1 Jean 4:19) Tɔˈdɩ- ˈdhɔɛeˈ nɩan ˈe ʋn ˈdhi ɛ, ɩmɩn- -aa ˈbɔn ɲʋn ˈye jhibho-. Ɛmɛn- dɩ ɛ nɩn -glibha aˈ jiebhopoʋn- anˈ ˈmʋnan -dɩ -wɛeˈ ʋʋ ˈye ˈsɛɛ- nɛn -ɛɛˈ ˈɲnɩn nɩan “-Za ˈsrɩn ˈdhe Biiblʋ ˈdhi” -ˈzɔn ˈˈsii-. -A ˈye nɔnˈˈ -dhɛzaan ˈmʋn ˈˈdhuo- -wɛeˈ -a ˈye ˈsɛɛ- -ˈnɛn ɛnˈ dɩ ˈtmʋn.

ˈSɛɛ- nɛn -nʋʋɛnˈ ˈˈɲnumɩɩnˈˈ anˈ dɩ ke tɛnˈˈ. ˈKlaa, ɲʋn ˈbhɛɛˈ ɲʋn ˈyeɛ i -jhii ɲʋn ˈye ɲʋn -klaeˈˈ -ʋa ˈbɔan -ʋʋ ˈyea dhɩ -duuˈˈ i ˈŋwɔn ˈdhe Biiblʋ ˈdhi dhɛ -tɔɔn. Dhɛ Biiblʋ nɩan ɲʋn anˈ klɛɛ ɛˈ ˈsɛɛ, -aaˈ klɛɛ ˈbhɛɛˈ -a ˈye -bo nɩan ˈe ʋn ˈdhi ˈsrɩn ˈdhɔɛeˈ ˈdhi -za. ˈSrɩn -ˈnɩn ˈbhɛɛˈ ɩn ˈye -aʋ sʋn bho po -a ˈye -bɔyaˈˈ ˈjhe ˈdhe -aaˈ ˈkmʋn ˈdhi.

ˈSɛɛ- nɛn tbha ˈo -bo nɩan ˈe Biiblʋ ˈdhi ˈˈkpe. -Ka ɲiɔn nʋan ˈnɔn ˈkmʋn ˈkpa sʋn -e -ka dhɩ nɩan ˈnɔn ˈkmʋn nʋan -dee sʋn ɛn, ɩmɩn- anˈ -bo ˈsɛɛ nɛn ɛn dee ˈbho ˈˈkpe. Ɲʋn poɛ ˈe ˈkpɩ -wɛeˈ -bo nɩan ˈnɔn ˈsɛɛ- nɛn ˈdhi ɛ, ɩanˈ i ˈŋwɔɛn ˈse ˈˈɩ -kman in. ˈˈDhe -ka Biiblʋ nʋan ɩanˈ dɩ ˈtmʋn sʋn ɛn, ˈkamɔn- -a po ˈe ˈkpɩ -wɛeˈ ɩn ˈcreeɛ-.

Dhɛ -ˈnɛɛn nɩan ˈo ɛ, ɛmɛn- -nɩn, ɛ se -bo nɩan ˈe Biiblʋ ˈdhi aˈ ˈsʋ ɲʋn po ˈnɔn ˈsɛɛ- nɛn ˈdhi -nɩn. Fete -nɩn ˈnɔn ɛn ˈdhi -ke -ɩn ˈye -aʋ sʋn bho po -wɛeˈ ɲʋn -ʋaˈ dɩ ˈtmʋʋan, -ka ʋaˈ nɩan ˈbho -a ˈˈjhibhaˈ a, ɛ ˈye kaˈ -nɩn.

ˈSɛɛ- nɛn ɛn toɛˈ -ka Biiblʋ a ˈtmʋan ɲmai -e ˈɲnʋnkpaeˈ ˈjhea Zoova ŋwɔn -e ɲʋn -jʋn ˈseɔ ŋwɔn ˈjhe ʋaˈ dɩ. Ɛɛ poɛ -aʋ sʋn bho -wɛeˈ -a ˈye ʋaˈ bo ˈsrɩn ˈdhi -za. (Romains 15:4; 1 Corinthiens 10:6) ˈSɛɛ- nɛn ˈbhleɛ ˈfɛ ɛˈ 14. -Deeghwlu -nɩn ˈo ˈfɔ ooˈˈ ˈfɔ ɔˈ -deenanˈ -ʋan- po -aʋ sʋn bho -wɛeˈ ˈsrɩn -a ˈyea ˈe bo ˈdhi -za a, -a ˈyɩ jhibho-.

-Bho a -nɩn ˈdhou -aeˈˈ -bho -nɩn ˈˈbho ɛˈ, ˈbhɛɛˈ -ˈye -bo -ˈnɩn ˈdhii zro -ˈye -manˈ ˈˈjhu ˈˈɲɩn ˈˈdhe -nɩn ɔ ˈye fete nɩan ˈe ɩanˈ dɩ ˈtmʋn. Aʋ ˈbhɛɛˈ -ke aʋ ˈye Biiblʋ aˈ ˈˈjhri -bo -ˈnɩn tbha ˈo ˈˈkpe ˈdhii zro. Po -manˈ ˈˈjhu sʋn bho -wɛeˈ -ka -bo -ˈnɩn -nɩn Biiblʋ nʋan -jie- dhueˈ -kpa sʋn ɛn, ɔ ˈyeɛ ˈˈkpe i ˈjhe. -ˈBhɛɛˈ -ˈye dhɛ nɩan dhueˈ nʋn -ˈye ɲɔn -klaaˈˈ sʋn bho po ɔ ˈye -bo nɩan ˈe Biiblʋ ˈdhi ˈˈkpe i ˈjhe.

Dhɛ -aa ˈbɔan -mɛn -nɩn ɲʋn -an ˈbɔan -ʋʋ ˈyea dhɛ iˈ ˈŋwɔn ɔn, -bho ʋʋ -nɩn ˈˈɲnumɩɩnˈˈ -aeˈˈ ɲʋn -klaeˈˈ mɔn -dhe ɛˈ, ˈsɛɛ nɛn ˈyʋbʋ sʋn bho po ʋʋ ˈye Ɲɔnsoa aˈ ghwlu ˈsrɩn ˈdhi -za ˈˈdhe ʋʋ ˈye ˈsrɩn -ˈnɩn ˈˈjhriɛ ˈˈdu ˈdhe ʋbʋ aˈ ˈkmʋn ˈdhi. Ɛɛ muɛn -nʋn ʋʋ ˈye Zoova ˈˈɲɩn ˈˈdhe ʋʋ ˈye ˈe ɔɔˈ ˈˈgbuzɔncɛ- -ʋaˈ dɩ ɔ kman ˈjɛɛn ˈˈklu ˈkpa.