ˈˈNinzɔnjhiiɛ ɛɛ ˈˈɲɩɛn ɲʋn ˈkmʋn ˈdhɔɛe ˈdhe ˈkmʋn anˈ ɲan!

Zezi ˈnaan kletiɛn -ˈˈwe ˈye ˈˈnin ˈzɔn -jhii. (Zro Matthieu 28:19, 20.) Ka ˈˈninzɔnjhiiɛ- ˈye -nʋʋɛn-? Dhɛwɛ- ɲɔn -ɔn ˈbɔan -ɔ ˈyea ˈˈninzɔnjhii- ˈye nʋn -ɛn?

1. Ka ˈˈninzɔnjhiiɛ ˈye -nʋʋɛn-?

Ghwlu ɲʋn an ˈdhaa “ˈˈninzɔnjhiiɛ-” ˈdhe Glɛkɩ ghwlu ˈdhi ɛ, ɛ nɩn dhɛ ˈdhe “ˈˈnin ˈzɔn -paa.” Zezi ˈyea ˈˈnin ˈzɔn -jhii -dhe ɛ, ɲʋn -pɔɔ ˈdhe ˈˈnin ˈzɔn ˈbho Zuudɛn nin ŋwɔn ˈˈdhe “ɔ ˈghwlʋ ˈe ˈˈnin ˈzɔn.” (Marc 1:9, 10) -Ka Zezi nʋan ˈˈnin ˈzɔn -jhii sʋn ɛn, ˈkamɔn- kletiɛn ˈjɛʋn an nʋn ˈˈnin ˈzɔn -jhii sʋn -ke. Ɲʋn an paa ʋbʋ ˈdhe ˈˈnin ˈzɔn.

2. Dhɛwɛ- ɲɔn -ɔɔ jhiia ˈˈnin ˈzɔn ɔn to -ɛ?

Ɲɔn -ɔn jhiia ˈˈnin ˈzɔn ɔn, ɔɔ toɛˈ -ka ɔ dea ɔˈ ˈkmʋn Ɲɔnsoa Zoova kwa. Ka ɲɔn ɔn nʋn ɔnˈ ˈkmʋn Ɲɔnsoa kwa -de sʋn -ɛn? -Da ɔ ˈsea ˈˈnin ˈzɔn -jhii ke ɛ, ˈdhe -bhaeghwlu- dhueˈ ˈdhi ɛ, ɔɔ ˈtmʋʋɛn Zoova -ka ɔɔ ˈbɔan ɔ ˈyea ɔɔˈ ˈsʋ ˈˈɲɩn jheejhee ɛ. Ɔɔ cɛn ghwlu ˈbho Zoova ˈˈjhibhaˈ ɔɔ yea ka nʋn Zoova aˈ ˈsʋ ɔɔ mun ˈˈɲɩn- ˈˈdhe dhɛ Zoova a ˈbɔan ɔ ˈyea nʋn ɛn, ɛmɛn- -kɔn dɩ ˈdhe ɔɔˈ ˈkmʋn ˈdhi. Ɛɛ ˈghwlʋɛ ˈbho ɔɔˈ ˈˈjɛ -gwlɩˈˈ ɔɔ yea “ɔɔˈ ˈˈjɛ ˈbhɔ” ɔɔ yea ˈbho Zezi “ˈdhe bhla jheejhee” dhɛ ɔɔ naan ˈdhe Zezi ɔˈ ˈsrɩn ˈdhi ˈˈdhe ɔɔ naan ˈdhe ɔˈ ˈgɔ ˈdhi. (Matthieu 16:24) Ɔɔˈ ˈˈjɛ ɛˈ ˈkmʋn Ɲɔnsoa kwa -deɛ -e ɔɔˈ ˈˈninzɔnjhiiɛ- ɛɛ nʋɛnˈ -jhbhɛɛ nɩan ˈbho ɔmɔn -e Zoova -e ɔɔˈ ˈdhoudhi -ˈˈwe ˈɲnɩn ɛn yea i ku.

3. Dhɛwɛ- -kɔn dɩ ɲɔn -ɔn ˈbɔan -ɔ ˈyea ˈˈnin ˈzɔn -jhii ˈye nʋn -ɛn?

Jhibho- Zoova -kajɔɔnka ˈˈdhe deɔ -gwlɩˈˈ ˈjɛɛn -kɔn dɩ. (Zro Hébreux 11:6.) -Ka -man jhibha Zoova ˈˈdhe ɔɔˈ -gwlɩˈˈ -deɛ ɛɛ kua i ˈdhe- ˈmʋn ɛn, ˈkamɔn- ɔɔˈ dɩkman an ˈkpa ˈˈkpe -ke. Ɛɛ muɛn -nʋn -ˈye ɔɔˈ dɩ ˈtmʋn ˈdhe ɲʋn bho ˈˈdhe -ˈye ɔɔˈ ˈsrɩn anˈ ŋwɔnjheɛ i ˈbɔn. (2 Timothée 4:2; 1 Jean 5:3) -Bho ɲɔn ɔn sa ˈe “Zoova ˈˈjhriɛ ˈdhe i nmɔn ˈdhe dhɩ aˈ klɛɛ ɔɔ nʋan ˈdhi ɛˈ,” ɛɛ muɛn -nʋn ɔ ˈye ɔɔˈ ˈkmʋn Ɲɔnsoa kwa -deɛ -e ˈˈninzɔnjhiiɛ i ˈbɔn.​—Colossiens 1:9, 10.a

KPA DHƐ I ˈŊWƆƐN ƝAN

4. Dhɛwɛ- Zezi ɔˈ ˈˈninzɔnjhiiɛ ɛɛ tɔɔn -abʋ -ɛ?

Zro Matthieu 3:13-17 -wɛeˈ -ˈye dhɩ -duuˈˈ jhibho- ˈdhe Zezi ɔˈ ˈˈninzɔnjhiiɛ- ɛˈ dɩ ˈdhi. -ˈMɛn aʋ ˈtmʋn ideedɩ- nɩn anˈ dɩ:

• Zezi ɔ jhiia ˈˈnin ˈzɔn -dhe ɛ, ɔ -nɩɛn- ˈˈjhu -dhee?

• Ka ɔ nʋn ˈˈnin ˈzɔn -jhii sʋn -ɛn? Ɲʋn poɔ ˈˈnin ˈˈdhru?

ˈBho Zezi ɔˈ ˈˈninzɔnjhiiɛ ˈdhe ɛ, ˈbhomɔn- ɔ -dee dhbho Ɲɔnsoa deɔ kwa ɔ ˈyea nʋn da ˈbhlʋa ˈˈkpe. Zro Luc 3:21-23 -e Jean 6:38, -ˈmɛn aʋ ˈtmʋn ideedɩ- nɩn anˈ dɩ:

• Zezi -jhiia ˈˈnin ˈzɔn ɔn, dhbho -wɛ ɔ -kɔɔn ɲan ˈdhe ɔɔˈ ˈkmʋn ˈdhi -ɛ?

5. -ˈBhɛɛˈ -ˈye ˈˈnin ˈzɔn -jhii

-Bho -man sa ˈˈjɛ ɛˈ ˈkmʋn Ɲɔnsoa kwa -deɛ -e ˈˈninzɔnjhiiɛ- ɛˈ dɩ ˈŋwɔn -tɛnˈˈ ɛnˈ, -ˈbhɛɛ -ˈye ka nʋn se ˈbhɛɛ- -ˈyɩ nʋn. ˈKlaa -bho -man sa dhɩ -duuˈˈ ˈcɩan ˈdhe Zoova aˈ dɩ ˈdhi ˈˈdhe -man sɔ jhibho -kajɔɔnka aˈ, -man muɛn ˈˈkpe i ˈjhe- -ka -ˈbhɛɛa -ˈyea ˈˈnin ˈzɔn -jhii ɛ. -Ka ɲʋn -ˈnʋʋn nʋan, -bho -man sa ˈbɔn -ˈyeɛ jhibho- ɛ, -ˈmɛn po ˈo VIDEO.

VIDEO: -Ka -ˈyea nʋn ˈˈdhe -nɩn Zoova ˈyea -jhbhɛɛ (1:11)

Zro Jean 17:3 -e Jacques 1:5, -ˈmɛn aʋ ˈtmʋn ideedɩ- nɩn anˈ dɩ:

• Dhɛwɛ- ˈbhɛɛ -ɛ ˈye ɲɔn sʋn bho po ˈˈdhe ɔ ˈye ˈˈninzɔnjhiiɛ- ɛˈ ka -nɩn -ɛn?

1. 1. -Ka -aa ˈbɔan -a ˈyea Zoova aˈ ˈsʋ ˈˈɲɩn jheejhee -mɛn ghwlu -aa cɛn.

2. 2. -Zɔn -aa jhiia ˈˈnin ˈzɔn ɔn, -aa toɛˈ -ka -aa muan Zoova aˈ ˈsʋ ˈˈɲɩn ɛn.

6. ˈˈNinzɔnjhiiɛ ɛ nʋɛnˈ -aa yea ˈe Zoova aˈ ˈˈgbuzɔncɛ ˈˈklu ˈkpa

-Bho -a -jhii ˈˈnin ˈzɔn ɔnˈ, -aa ˈkpa ˈe Zoova aˈ ˈˈgbuzɔncɛ- nɩan da ˈbhlʋa aˈ klɛɛ ˈˈkpe ˈˈklu. Zoova aˈ -Bobhlaʋn- anˈ klɛɛ -jhiia ˈˈnin ˈzɔn ɔn, -da ʋʋ ˈjhe ʋʋ ˈghwlʋ, -ka ʋaˈ ˈˈbhlidhɩ ˈjhe ɩn -nɩn ɛnˈ, -ˈˈgwlɩdhedhɩ- nɩan dhueˈ -mɩn ʋʋ ˈbhle ˈˈdhe ˈsrɩn nɩan dhueˈ -mɩn ʋa naan ˈdhe ˈdhi. Zro Psaume 25:14 -e 1 Pierre 2:17, -ˈmɛn aʋ ˈtmʋn ideedɩ- nɩn anˈ dɩ:

• -Bho ɲɔn -jhii ˈˈnin ˈzɔn ɔnˈ, ka -jhbhɛɛ nɩan ˈbho ɔmɔn -e Zoova -e ɲʋn -ˈnʋʋn ˈɲnɩn ɛnˈ ˈkpa -a?

DHƐWƐ- ˈCƖAN-?

Dhɛ Zezi -tɔɔan ɲʋn ɛmɛn- -nɩn ɛ -kɔn dɩ kletiɛn -ˈˈwe ˈye ˈˈnin ˈzɔn -jhii. -Bho ɲɔn ˈye ˈˈnin ˈzɔn -jhii ɛˈ, -jhbhɛɛ nɩan ˈbho ɔmɔn -e Zoova ˈɲnɩn ˈye i ku, ɔ ˈye ɔɔˈ ˈsrɩn ŋwɔn ˈjhe, ɔ ˈyeɔ ɔɔˈ ˈkmʋn kwa de.

Dhɛwɛ- -ˈŋwɔn in -ɛn?

• Ka ˈˈninzɔnjhiiɛ- ˈye -nʋʋɛn- ˈˈdhe dhɛɛdɩ- ɛ -kɔn dɩ -ɛ?

• Ɲɔn -ɔn dea ɔɔˈ ˈkmʋn Ɲɔnsoa kwa ˈˈdhe -ɔɔ jhiia ˈˈnin ˈzɔn ɔn, dhɛwɛ- ɔɔ to -ɛ?

• Ɲɔn -ɔn ˈbɔan -ɔ ˈyea ɔɔˈ ˈkmʋn Ɲɔnsoa kwa de ˈˈdhe ɔ ˈyea ˈˈnin ˈzɔn -jhii ɛ, dhɛwɛ- ɔ ˈye nʋn -ɛn?

ˈBƆN DHƖ -ˈNƖƖN ANˈ I ˈŊWƆAN IN

Dhɛ ˈˈninzɔnjhiiɛ nɩan -e dhɛ ɛ sea -nɩn ɛn, ˈsɛɛ- nɛn ɛn muɛn ʋn sʋn bho -po -ˈyeɛ jhibho-.

“Qu’est-ce que le baptême?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

Dhɩ ɲɔn ˈyea nʋn -wɛeˈ ɔ ˈyea ɛɛˈ ka -nɩn ɔ ˈyea ˈˈnin ˈzɔn -jhii ɛ, ˈsɛɛ- nɛn ɛn muɛn ʋn sʋn bho -po -ˈyɩ jhibho-.

“L’amour et la reconnaissance pour Jéhovah mènent au baptême” (La Tour de Garde, mars 2020)

Dhɛ ˈˈtuanˈˈ ˈˈjhu dhueˈ ˈˈdhe ɔ -jhiia ˈˈnin ˈzɔn ɔn, zro ˈsɛɛ- ˈnɛn ˈdhii -wɛeˈ -ˈyeɛ i ˈŋwɔn.

“Ils voulaient que je découvre la vérité par moi-même” (La Tour de Garde, 1er février 2013)

Dhɛɛdɩ- ˈˈninzɔnjhiiɛ kɔan dɩ -e -ka -ˈbhɛɛa -ˈyea -manˈ ˈˈjɛ kpɔˈˈ po ˈˈdhe -ˈyeɛ nʋn ɛn, ɩmɩn- -man mun i ˈŋwɔn ˈnɔn ˈsɛɛ- nɛn ˈdhi.

“Devrais-je me faire baptiser?” (Les jeunes s’interrogent. Réponses pratiques [volume 2], chapitre 37)