Po -manˈ ˈˈjɛ kpɔˈˈ ˈzɩan ˈghwɛ ˈbhɛɛa -ɛ ˈyea ʋn ˈˈkpe i ˈga aˈ dɩ

Dhɛɛdɩ- -ˈye -manˈ ˈˈjɛ kpɔˈˈ po -ɛ? Nɔnˈˈ ˈghwɛ ˈbhɛɛa ɛ ˈye ʋn ˈˈkpei ˈga ˈˈdhe ɲʋn ˈyea ʋn ˈdhe -dɔsrɔŋmɛinˈˈ kpa a, seɔ jhibho-. Ɛ nɩan kaˈ a, dhɩ -ˈnɩɩn -nɩn ˈo -ˈye nʋn ˈzɩan -wɛeˈ -bho ɛ ɲnin ˈo -ˈye dhɩ ɲʋn poa kpɔˈˈ ˈˈdhe ɲʋn ˈyea -manˈ dɩ ˈˈdu ˈjɛɛn ˈdhi ˈjhee-. -Bho -man sa kaˈ nʋn -man toɛˈ -ka -man ˈdhaa ˈkmʋn dhɛ ˈˈdhe -man ˈjhea Zoova aˈ ˈtee -ɛɛ ˈtmʋan ɲmɔn ɔnˈ dɩ ŋwɔn.​—Ac 15:28, 29.

-Kawɛ -ˈbhɛɛ -ˈye -manˈ ˈˈjɛ kpɔˈˈ po -ɛ?

• Bhae- -ˈmɛn ˈˈdhuo- nɔnˈˈ ˈmʋn -ˈye -manˈ katɩa DPA ˈˈjhii-. ˈDhoudhi -ˈˈwe -jhiia ˈˈnin ˈzɔn ˈbhɛɛˈ ʋʋ ˈye ˈdhoudhi -ɔɔ ˈˈɲɩan ɲʋn ˈsɛɩ i ˈkpaa- ɔ ˈyʋbʋ katɩ DPA ˈˈɲɩn ˈˈdhe ɔ ˈye ʋbʋ ˈˈɲnumɩɩnˈˈ an Carte d’identité (ic) ˈˈɲɩn -ke.

• -Bho a ˈbhle ˈˈkwli ɛˈ, a ˈtmʋʋn- aaˈ ɲankɔʋn ʋʋ ˈyea ʋn ˈsɛɛ Informations pour les femmes enceintes (S-401) ɛˈ dhueˈ ˈˈɲɩn. ˈSɛɛ -ˈnɛn ˈyea ʋn sʋn bho po -wɛeˈ a ˈye ˈo dhɛ ˈdhɔɛe -za ˈdhe ˈghwɛ -ɛɛ nʋan ˈˈkwli ˈɲnɔn -e ˈˈɲnuun- -dhee aˈ dɩ ˈdhi.

• -Bho -ˈbhle ɲmɔn ɔnˈ ˈghwɛ -aeˈˈ -ˈye nɔnˈˈ -duuˈˈ nʋn ˈdhe -dɔsrɔŋmɛinˈˈ ɛnˈ, nʋɛn -manˈ ɲankɔʋn ˈye ˈˈdoo- ʋʋ ˈyɩ jhibho- ˈˈdhe -siie- nɔnˈˈ ɲan -ke -ˈye -dɔsrɔgbu- -ˈyea ˈe ˈdhi mun ˈtmʋʋn- -ka Zoova aˈ -Bobhlai- dhueˈ ˈyea ʋn ˈˈɩ dee aˈ jhi ɛ.

-Kawɛ ɲankɔʋn ˈbhɛɛ ʋʋ ˈye ˈdhoudhi -ˈˈwe sʋn bho po -ɛ? Ʋʋ ˈbhɛɛˈ ʋʋ ˈyʋbʋ sʋn bho po ʋʋ ˈye ʋaˈ katɩ DPA ˈˈjhii-. ˈKlaa ɲankɔʋn ˈse ˈo dɩ -za i ʋʋ ˈse -nʋn ɩn ˈdhe ʋaˈ kuzɔinflɔɛn ɛnˈ dɩ ˈdhi -aeˈˈ dhɛ ʋʋ ˈyea nʋn -bho ʋʋ -nɩn ˈbho ʋaˈ gɔˈˈ -dhe ɛ, ʋʋ ˈsʋbʋ ɛɛˈ dɩ ˈtmʋɩn -ke dhɛbhleɛ, dhɛ ʋʋ ˈyea ˈo -za ʋʋ ˈyea nʋn ɛn, ɛɛˈ dɩ -nɩɛn- ˈdhe ʋaˈ ˈˈjɛ ˈkwa. (Rm 14:12; Ga 6:5) -Bho ˈtmʋʋn- ɲankɔʋn -ka -ˈbhlea ˈghwɛ -ɛɛ deea ɲmɔn in ɛnˈ, ʋa muɛn ˈˈdoo- ʋʋ ˈye ɲankɔʋn anˈ kpɔ -ɔɔ zia ˈdhoudhi -ˈˈwe aˈ dɩ ˈdhe -dɔsrɔˈ -ˈˈwe bho ɲʋn an ˈdhaa comité de liaison hospitalier (CLH) ˈtmʋʋn- ʋʋ ˈye ʋn sʋn bho po.

-Kawɛ CLH ˈbhɛɛˈ ɔ ˈye ʋn sʋn bho po -ɛ? Ɲʋn -tɔɔɛn ˈdhoudhi -ˈˈwe -a nʋan dhbho ˈdhe CLH ˈdhi dhbho -wɛeˈ -ka -aa nʋan ɲmɔn ˈjhe sʋn ɛn, ʋʋ ˈye -dɔsrɔˈ -ˈˈwe -e ˈpeejheʋn sʋn bho po ʋʋ ˈyeɛ i ˈŋwɔn. Ɲʋn anˈ dɩ ˈˈdu sʋn ˈyeɛ nʋn -wɛeˈ ɲʋn ˈsea ʋn ɲmɔn ku ˈzɔn -po i ɛ, ʋʋ ˈbhɛɛˈ ʋʋ -nɩn -manˈ -dɔsrɔi ˈye ɛɛˈ dɩ ˈtmʋn. -Ka -man ˈbɔan ɲʋn ˈyea -manˈ dɩ ˈˈdu ɛ, -dɔsrɔi- -ɔɔ ˈŋwɔan ɛɛˈ dɩ ɛ, ʋʋ ˈbhɛɛˈ ʋʋ ˈyeɔ i ˈbɔn.

-ˈJHE VIDEO NƆN IN, -KAWƐ -A ˈYE NƲN ˈˈDHE -A ˈYE ˈO DHƖJƐƖN -ZA -A ˈYE NƲN ˈDHE ƝMƆN ƆNˈ DƖ ˈDHI -Ɛ?, -ˈMƐN -ZA ˈE IDEEDƖ- NƖAN DA ˈZƆN DA:

• Dhɛwɛ- ˈŋwɔin ˈdhe video -ˈnɔn ˈdhi -ɛ ˈbhɛɛˈ -ɛ ˈye ʋn sʋn bho po ˈdhe ɲmɔn ɔnˈ dɩ ˈdhi -ɛ?

  -Ka -man muan ˈdha-