Zozɛʋ -nɩɛn Zakɔbʋ ɔˈ ˈˈɲnuun -ɲmai- ˈbhɔɔa dhe aˈ dhueˈ. Ɔɔˈ vɛin- -ˈˈwe jhibhiˈ -ka ʋaˈ ˈˈbho -kman ɔɔˈ dɩ ɛ. ˈBhoo- -gwlɩˈˈ ˈdhe, ka ɛ -nɩn ˈdhe ʋbʋ ˈˈjhri ˈdhe -ɛ? Ʋʋ ˈɲɛɔn ˈmʋn ˈmɛn. Zozɛʋ poa jhɩ ɔ jha ˈdhe ʋbʋ bho ɛ, ɔɔˈ ˈmʋnɲɛɛn- ˈkpa ˈˈkpe ˈdhe ʋbʋ ˈmʋn. ˈBho ʋbʋ -gwlɩˈˈ ɛ, dhɛ jhɩ -ˈnɩn ˈdha a, ɛmɛn- -nɩn ʋʋ ˈye ˈkɔi glu po ˈbho ɔ ˈˈjhibhaˈ. -Ɛ ˈghwlʋa ˈo -dhe ɛ, ɔɔˈ ˈmʋnɲɛɛn- ˈkpa ˈˈkpe -kenɛnˈ!

-Zɔn dhueˈ ɛ, Zozɛʋ ɔˈ ˈdhoudhi -ˈˈwe muɛn ˈbhlaeˈ ˈdhei -deaˈ ˈbho ˈˈkwiglɔ- ɲʋn an ˈdhaa Sisɛmʋn ˈˈbun. Zakɔbʋ dhbhoɛ Zozɛʋ ɔ ˈye ˈe ʋbʋ bhoi ˈŋwɔn. Ʋʋ ˈjheea Zozɛʋ ɲan, ʋʋ -ghwluɛ ˈe bha bho ʋʋ ˈnaan: ‘Aʋ -ŋmʋn ˈˈjhu -ɔɔ jha jhɩ ɛ. ˈˈDhe -bho -a ˈdhbhɔ ˈdhe!’ Ʋʋ kpʋɔnˈ ʋʋ yeɔ ˈe ˈˈbhieˈˈ dhueˈ ˈdhi ˈˈvile-. ˈSʋ Zida ˈnaan: ‘-Aaˈ ˈdhbhɔ -dhe! -A ˈpleɔ ɔ ˈye -kʋɔn ˈkpa.’ Ʋʋ ple Zozɛʋ ˈmɛn ˈtamanˈˈ jhɔ ɔˈ 20 ˈdhe ˈdhɔɔpɔʋn- -ʋa- ghwlʋaˈ Madian -ʋa- muan ˈdhe Ezipʋ bho.

ˈSʋ, Zozɛʋ ɔˈ ˈdhoudhi -ˈˈwe triɛ ɔɔˈ ˈmʋnpaadhɛ -gbaaˈ aˈ ɲmɔn in ˈˈdhe ʋʋ kpɛ ɔɔˈ ˈˈbho ʋʋ ˈnaan: ‘Ɛ se -manˈ ˈˈjhu ɔˈ ˈmʋnpaadhɛ- nɩn da?’ ˈBho Zakɔbʋ -gwlɩˈˈ ɛ, ɛ nɩn ˈkwlaiˈ -nmiin- dhbhaˈ ɔɔˈ ˈˈjhu Zozɛʋ. Ɛ ˈˈzru ɔˈ ˈjɛɛn-. Ʋʋ bhaeɔˈ -bhae- ʋʋ ye sea.

ˈDhe Ezipʋ ɛ, ɲʋn plo Zozɛʋ ˈmɛn ɔ ye -kʋɔn ˈkpa ˈdhe ɲɔn -klaaˈˈ dhueˈ -ɔɔˈ ˈɲnɩn nɩan Potifaa bho. ˈKlaa Zoova -nɩn Zozɛʋ -nanˈ. Potifaa ˈjheɛ ˈˈkpei -ka Zozɛʋ ɔ nʋan dhbho -kajɔɔnka ˈˈdhe ɔ nɩan -gwlɩˈˈ -de ka. Ɛmɛn- dɩ ɛɛ ˈbhɔɔa ˈbho ɛ, Potifaa de Zozɛʋ dhɩ aˈ klɛɛ nɩan ˈdhe ɔ bho ˈˈgbu kwa.

Potifaa aˈ ˈɲnɔn ŋmʋan Zozɛʋ jha, ʋn ˈjheɛ ˈˈkpei -ka ɔ -nmɔan ˈˈjhrii ˈˈdhe ɔ ˈbhlea ˈkpɩ ɛ. Zɔn ooˈˈ zɔn ʋan bhaeɔˈ -wɛeˈ ɔ -nɩn ʋn ˈye i ˈpɛn. -Kawɛ Zozɛʋ nʋn -ɛn? Ɔ ˈse ˈo ˈŋwɔɔn-. Ɔ -ghwluɛ ˈe ʋn bho ɔ ˈnaan: ‘ˈˈƖɩn-! Ɛ nɩn dhɛsaʋn-. ˈMan ˈbhlei deɛ ˈʋn -gwlɩˈˈ ˈˈdhe a -nɩɛn- ɔɔˈ ˈɲnɔn. -Bho ˈɩn -nɩn a ˈpɛn in ɛnˈ, ɛ dhɛsaʋn- ˈbho Ɲɔnsoa ˈˈjhibhaˈ!’

-Zɔn dhueˈ ɛ, Potifaa aˈ ˈɲnɔn kpʋɔn dhɩ ˈˈkpe -wɛeˈ ɔ -nɩn ʋn ˈye i ˈpɛn. Ʋn kpʋn ɔɔˈ ˈmʋnpaadhɛ ˈmɛn, ˈklaa ɔ siɛ ˈdhe ʋn ˈkwa ɔ ye ple. Ʋanˈ -kʋan Potifaa jhia ŋmɛinˈˈ dhe ɛ, ʋn ˈtmʋɔn ʋn ˈnaan Zozɛʋ ɔ ˈbɔn ɔ ˈyʋ ˈˈkpe ˈkpa -dhe. Ʋn ˈse tɔˈdɩ ˈtmʋn. Potifaa ˈkpa ˈcɛn ˈˈdhe ɔ kpʋn Zozɛʋ ˈmɛn ɔ yeɔ -gazo ˈdhi po. ˈKlaa Zoova ˈse Zozɛʋ bho ˈˈmae-.

-Da Zozɛʋ nɩan ˈe -gazo ˈdhi ɛ, Ezipʋkɔʋn- anˈ ˈbhɛɔ Falaɔn -jha jhɩ ɲɔn dhueˈ ka se ˈbhɛɛ- ɔ ˈye ˈˈkpei zela-. Falaɔn ɔnˈ dhbhonʋʋn- anˈ dhueˈ ˈnaan Zozɛʋ ˈbhɛɛˈ ɔ ˈyeɛ nʋn. Falaɔn ˈˈdooˈ ɔ ye Zozɛʋ -gazo ˈdhi -za.

Falaɔn deeɛ Zozɛʋ dhi ɔ ˈnaan: ‘-ˈBhɛɛˈ -ˈye ˈman jhɩ ˈˈkpei zela-?’ ˈˈDhe Zozɛʋ ˈnaan: ‘Dhiidhɩ a muɛn ˈˈɩ -di ˈdhe -zɩn -ˈˈmɛsɔnˈ ˈdhi da Ezipʋ. ˈBho ɛ ˈdhe ɛ, ˈmɩɛn ɛn muɛn i -siie- ˈdhe -zɩn -ˈˈmɛsɔnˈ ˈdhi. -Za ˈo ɲɔn nɩan tɔˈ ˈdhi ɔ ˈye dhiidhɩ i -ˈgboo- -wɛeˈ ˈmɩɛn -saˈ -ˈman ˈcɛ ˈdhbha.’ Falaɔn ˈnaan: ‘-Mɔn ˈɩn -za ˈo! ˈBhoo ˈdhe ɛ, -mɔn ˈye ˈˈɩkman- ˈbhle da Ezipʋ -bhlʋa ˈdhi!’ -Ɔ po Zozɛʋ sʋn bho -wɛeˈ dhɛ jhɩ -ˈnɩn ˈdha a, ɔ jhibhɛ -ɛ? Ɛ Zoova.

ˈDhe -zɩn -ˈˈmɛsɔnˈ tbha ˈo i ˈdhi ɛ, Zozɛʋ -ˈgbooɛ- dhiidhɩ i. ˈBho ɛ ˈdhe ɛ, ˈmɩɛn -deeˈ da ˈbhlʋa aˈ klɛɛ ˈˈkpe -ka ɔ nʋan ɛɛˈ ˈtmʋn sʋn -dhe ɛ. Ɲʋn an ˈghwlʋɛ ˈbhlʋɩ ˈdhii ʋa yea dhiidhɩ -dɩanˈ jhi ˈdhe ɔ bho. Ɔɔˈ ˈˈbho Zakɔbʋ ˈŋwɩɩn -ka dhiidhɩ nɩan Ezipʋ ɛ. Ɛɛˈ dɩ ɔ dhbho ɔɔˈ ˈˈɲnuun -ɲmai -bue- ʋʋ ˈye dhiidhɩ -dɩanˈ mun.

Zakɔbʋ ɔˈ ˈˈɲnuun ɲmai- muɛn ˈe Zozɛʋ bho. Zozɛʋ ˈjhʋbʋ ɛ, ɔ jhibhɛ- ʋbʋ ˈˈɩ. ˈKlaa ʋbʋ seɔ ˈˈɩ jhibho-. Ʋʋ poɛ ˈkɔi glu ˈbho ɔ ˈˈjhibhaˈ -ka ɔ nʋan ɛɛˈ ˈjhe sʋn -da ɔ -nɩan ˈˈjhuzaan an. Zozɛʋ ɔ ˈbɔn ɔ ˈyɩ jhibho- -bho ʋʋ ˈɲɛɔn ˈmʋn ke ɛˈ. ˈSʋ ɔ ˈnaan: ‘Aʋ jhiɛ -aaˈ ˈbhlʋa jha -ŋmʋanˈ -wɛeˈ -ka aʋ ˈyea -aʋ bho -pa sʋn nʋn ɛn aʋ ˈyeɛ jhibho-.’ Ʋʋ ˈnaan: ‘ˈˈƖɩn-! -A ˈghwlʋɛ Kanaan. -A -nɩɛn- ˈdhoudhi ɲmai aˈ 12. -Aaˈ ˈdhoudhi dhueˈ ˈmɛɛn. ˈˈZaan- -nɔn -mɔnˈ -siɛ ˈbho -aaˈ ˈˈbho ˈˈbun.’ ˈˈDhe Zozɛʋ ˈnaan: ‘-Bho ˈye aʋ -gwlɩˈˈ de ɛˈ, -ˈmɛn aʋ -jha aʋaˈ ˈˈdhe -ɲmau- sia ˈo.’ ˈSʋ ʋʋ muɛn ˈe ʋbʋ aˈ ˈˈbho bho dhe.

Zakɔbʋ ɔˈ ˈcɛ ɛˈ dhiidhɩ gwɛa ˈsʋ ɛ, ɔ dhbho ɔɔˈ ˈˈɲnuun ˈmɛn ˈdhe Ezipʋ. -Kaan ka, ʋʋ -nɩn ʋaˈ ˈˈdhe Bɛnzamɛn munˈ. Zozɛʋ ˈdɩɛnˈ ʋbʋ i. Ɔ ˈˈduɛˈˈ ɔɔˈ ˈghwɛi -gaʋn- dhi ˈdhe Bɛnzamɛn ɛnˈ dhiidhɩ aˈ bhlɔ ˈdhi ˈˈdhe ɔ ˈnaan ʋbʋ ˈˈjhri ɛˈ. Zozɛʋ ɔˈ dhbhonʋʋn ˈjhea ˈˈgaʋn -ˈnʋn ˈdhe Bɛnzamɛn ɛnˈ bhlɔ ˈdhi ɛ, ɛ ˈˈmaan- ɔɔˈ ˈdhoudhi -weˈˈ taiˈ. Ʋʋ bhae- Zozɛʋ ˈmɛn ɔ ˈyʋbʋ dhɛsaʋn ˈˈdhrui nʋn ˈbho Bɛnzamɛn ɛnˈ gɔˈ ɩˈˈ.

Zozɛʋ jhibhiˈ bhla -ka ɔɔˈ ˈdhoudhi -weˈˈ zianˈˈ an. -Ka ɔ ˈyea ɔɔˈ ˈˈjɛ i ˈˈdu sʋn nʋn -dheeˈˈ ka ɔ se anˈ jhibho-. Ɔ -dee ˈˈvianˈˈ ˈmɛn ˈˈdhe ɔ ˈnaan: ‘Ɛ ˈmɔn- Zozɛʋ aʋaˈ ˈdhoudhi. ˈMan ˈˈbho -nɩn ˈkmʋn ˈmɛn ke?’ Taiˈ ˈˈmaan- ɔɔˈ ˈdhoudhi -weˈˈ ˈmɛn. Ɔ deɛ ʋbʋ -pɛɛ ˈdhii ɔ ˈnaan: ‘Aʋaˈ kpa -e aʋaˈ ˈˈjɛ dɩ ˈˈbhli -dhe dhɛ aʋ ploa ˈʋn ɛɛˈ dɩ. Ɛ Ɲɔnsoa -jha ˈʋn ˈnɔn -wɛeˈ aʋ ˈye ˈkmʋn -sie-. -Kaan ka bhla, aʋ ˈˈdoo- aʋ -jha ˈman ˈˈbho ˈnɔn ɔnˈ bho.’

Ʋʋ muɛn ˈe ʋbʋ aˈ ˈˈbho bho dhe ʋʋ yeɔ ˈmʋnan -dɩ -ˈnɩn ˈtmʋʋn-. ˈBho ɛ ˈdhe ɛ, ʋʋ jhɔ Ezipʋ. Zozɛʋ -nɩn ɔɔˈ ˈˈbho ˈsea ˈjhee- ˈdhe -zɩn -duuˈˈ ˈdhi ɛ, ɔ -nɩn ɔ ˈkpa -da dhueˈ -wɛ bhla.