ˈDhe ˈbhlʋa dhueˈ ɲɔn ɔn ˈdhaa Ʋzɩ ˈdhi ɛ, ˈˈjhu dhueˈ -nɩn ˈe -dhe -ɔɔ ˈˈɲɩn Zoova. Ɔɔˈ ˈɲnɩn -nɩn Zɔbʋ. Ɔ ˈbhleɛ ˈˈghwliɛ -dhe ˈˈdhe ɔɔˈ ˈˈgbuzɔncɛ -diɛˈˈ. Ɛ nɩn ɲɔn -ɔ -nmɔn -glʋˈ, -ɔɔ po ɲʋn sea dhɛ ˈbhle -e ˈɲnʋnkpaeˈ -ʋaˈ -kʋan ˈmɛan -e ˈˈɲnumɩɩn -ʋaˈ ˈcɛ -ˈˈwe ˈmɛan sʋn bho. ˈKlaa dhɛ Zɔbʋ ɔ nʋan dhɛjɛɛn ɛn, ɛɛˈ dɩ ɔ ˈse ˈkledɩ ˈjhei -flɛ ˈdhe ɔɔˈ ˈkmʋn ˈdhi?

Zɔbʋ sɩ jhibho- -ka Satan an nɔɔn ˈˈjhriɛ bho ɛ. Zoova -ghwluɛ ˈe Satan bho ɔ ˈnaan: ‘De ˈman dhbhonʋin- Zɔbʋ ˈˈjhriɛ ˈˈkpe ˈmɛn? Ɲɔn -nɩn ɔ ˈyea kplɩn dhueˈ ˈbhle ˈdhe ˈbhlʋa ˈˈkpe ɛ, ɔ se -nɩn. Ɔɔ poɛ ˈʋn -dheinˈˈ bho ˈˈdhe dhɩ ˈsrɛaɩˈˈ -mɩn ɔɔ nʋn.’ ˈˈDhe Satan ˈnaan: ‘Dhɛɛdɩ- ɔ ˈse ʋn ŋwɔn ˈjhei -ɛ? -Man fuɔ ˈdhei ˈˈdhe -man poɔ ˈˈniman. -ˈˈƝɩɔn glea -e nɩnandhɩ- -duuˈˈ. Zɔ dhɩ aˈ klɛɛ ˈkwa ke aˈ, ɔɔ muɛn -manˈ ˈˈɲɩn dɩ ˈbhɔ-.’ Zoova -ghwluɛ ˈe Satan bho ɔ ˈnaan: ‘-ˈBhɛɛˈ -ˈye Zɔbʋ i ˈdɩn. ˈKlaa -manˈ ˈdhbhɔ -dhe.’ Dhɛɛdɩ- Zoova ˈˈtai Satan in ɔ ˈdɩn Zɔbʋ i -ɛ? Dhɛ nɩan ˈo ɛmɛn- -nɩn, ɔ deɛ -gwlɩˈˈ -ka Zɔbʋ ˈseɔ bhʋ ˈdhe -zai ɛ.

Satan -jha Zɔbʋ ˈkledɩ -duuˈˈ bho. Ɔ ˈyea -dee ɛ, ɔ -jha ˈˈjhriʋn ɲʋn an ˈdhaa Sabeɛn ʋʋ ye ɔɔˈ bhliaˈ -e ɔɔˈ -soofaeˈ ˈˈjhri. ˈBho ɛ ˈdhe ɛ, nɛn -ˈghwlʋ ˈe ˈˈjha -ɛ ˈdhbha ɔɔˈ ˈbhlae. Ɲʋn anˈ kpɔ -ˈnʋʋn ɲʋn an ˈdhaa Kalɩdeɛn ɛn, ʋʋ jhiˈ ʋʋ ye ɔɔˈ -ɲɔɔmɩɛnˈ ˈˈjhri. Ʋʋ ˈdhbha ɔɔˈ dhbhonʋʋn- -ʋa dea -nɩnandhɩ ˈdhei ˈmɛn. ˈKledɩ -jɩn ˈyeɔ -glʋˈ kpʋn gblein ɲninˈ -wɛ. ˈˈGbu -ʋn ˈdhe ˈdhi ɔɔˈ ˈˈɲnuun anˈ klɛɛ ɛ poa fɛtɩ -dhe ɛ, ʋn bhluˈ ˈbho ʋbʋ ˈˈkpe ʋaˈ klɛɛ ye ˈmɛn. Ɛ kpʋɛn Zɔbʋ -glʋˈ ˈjɛɛn- ˈklaa ɔ ˈse Zoova ˈˈɲɩn dɩ ˈbhɔ.

Satan an ˈbɔn Zɔbʋ ˈye ˈkle ˈjhe ɛ ˈye ˈo dhi zi. Ɛɛˈ dɩ ɔ nʋɛn -pliinˈˈ ye Zɔbʋ ɔˈ ku aˈ klɛɛ kpʋn. Zɔbʋ ɔ pooa dhi -dhe ˈjɛɛn-. Dhɛ nɩan ˈo -wɛeˈ dhɩ -ˈnɩn anˈ klɛɛ ɛ jhiiɔ i ɛ, ɔ seɛ jhibho-. ˈKlaa, Zɔbʋ kpa Zoova aˈ ˈˈɲɩanˈˈ ɲan. Ɲɔnsoa ˈjhe dhɛ ooˈˈ dhɛ -nʋʋan ˈmɛn ˈˈdhe Zɔbʋ ɔˈ kplɩn an poɔ ˈmʋnan in.

ˈBho ɛ ˈdhe ɛ, Satan -jha ɲʋn taan -ʋʋ ˈdɩn Zɔbʋ i. Ʋʋ -ghwluɛ ˈe ɔ bho ʋʋ ˈnaan: ‘Ɛ gwɛ nʋɛn dhɛsaʋn- -man ˈbɔn -ˈye i ˈˈdu. Ɛɛˈ dɩ Ɲɔnsoa a ˈˈdu ʋn ˈkle.’ Zɔbʋ -ghwluɛ ˈe ʋbʋ bho ɔ ˈnaan: ‘ˈƖn ˈse dhɛsaʋn- nʋn.’ ˈKlaa ˈbho Zɔbʋ -gwlɩˈˈ ɛ, ˈkledɩ- -ɩan- jhiiɔ i a ˈghwlʋɛ ˈe Zoova bho ˈˈdhe ɔ ˈnaan Ɲɔnsoa se ˈˈɩ ˈsrɛ ˈdhe ɔɔˈ dɩ ˈdhi.

ˈˈJhu dhueˈ -ɔɔ ˈɲnɩn nɩan Eliu ɔ poɛ dɩ ʋbʋ ˈtmʋan -dheinˈˈ bho -kajɔɔnka. Ɛɛ ˈbhɔɔa ˈbho ɛ, ɔ -ghwluɛ ˈe ʋbʋ bho ɔ ˈnaan: ‘Dɩ aˈ klɛɛ aʋa ˈtmʋan, ɩn se tɔˈdɩ -nɩn. Zoova ˈbhɛ ɩˈˈ ˈbho dhɩ aˈ klɛɛ ˈˈdhru. Ɛɛˈ dɩ -a se ˈbhɛɛ- -a ˈye dhɩ aˈ klɛɛ i ˈŋwɔn ˈdhe ɔɔˈ dɩ ˈdhi. Ɔɔˈ nʋn dhɛsaʋn- -flɛ. Ɔɔ ˈjhe dhɩ aˈ klɛɛ ˈmɛn. Ɔɔ poɛ ɲʋn nɩan ˈe ˈkledɩ ˈdhi sʋn bho.’

ˈBho ɛ ˈdhe ɛ, Zoova -ghwluɛ ˈe Zɔbʋ bho ɔ ˈnaan: ‘ˈMan nʋan ˈbhlʋa -e jhaʋn ɛn, -dawɛ -nɩn -dhe -ɛ? Dhɛɛdɩ- -ˈnaan ˈɩn ˈse ˈˈɩ ˈsrɛ -ɛ? -ˈDha ˈka ˈmɛn, ˈklaa dhɛ nɩan ˈo -wɛeˈ dhɩ -ˈnɩn an jhiia mʋn in ɛn, seɛ jhibho-.’ Zɔbʋ jhibhɛ- ɔɔˈ dhɛsaʋn- ˈˈɩn ˈˈdhe ɔ ˈnaan: ‘ˈƖn ziɛ dhɛˈˈ. ˈƖn ˈŋwɔn -manˈ ˈɲnɩn ˈmɛn, ˈklaa, jɛbhla ˈɩn jhibho ʋn. Dhɛ sea ˈbhɛɛ- -ˈyea nʋn ɛ se -nɩn. ˈMan cɛn ˈgɩn ˈman yea ʋn ˈˈɲɩn dhɩ ˈɩn ˈtmʋan ɩanˈ dɩ.’

Zoova ˈpʋʋ Zɔbʋ ˈmɛn ˈˈdhe ɔ ˈˈɲɩɔnˈˈ ˈˈghwlii -duuˈˈ ɛ ye -jɩn ɔ ˈbhlea tɛnˈˈ -zii. Zɔbʋ -gwleɛ ˈkmʋn ˈˈdhe ɔ -nɩɛn- ˈmʋnan in -dhe. -Ka ˈkledɩ ˈjhe ɩn -nɩn mɔn -dhe ɛˈ, Zɔbʋ poɛ Zoova -dheinˈˈ bho. Ɛɛˈ dɩ Zoova poɔ ˈˈniman. -Ka Zɔbʋ nʋan, -man mun Zoova aˈ ˈˈɲɩanˈˈ ɲan -kpa ˈmɛn -ka ˈkledɩ ˈjhe ɩn -nɩn mɔn -dhe ɛˈ?

ˈDhe Ezipʋ ɛ, ɲʋn -dee Zakɔbʋ ɔˈ ˈˈgbuzɔncɛ Israɛkɔʋn ˈdhaa ˈmɛn. Zakɔbʋ -e Zozɛʋ ˈmɛan, Falaɔn -dhee -dee Ezipʋ ˈbhlea. Ɔ ˈse ˈbɔn Israɛkɔʋn ˈye ˈˈɩ -kman ʋʋ ˈye Ezipʋkɔʋn -zii. ˈSʋ Falaɔn nʋɛnˈ Israɛkɔʋn ye -kʋɔn ˈkpa. Ɔɔ kpʋʋɛn ʋbʋ ˈˈdhrui ʋa yea blikɩ bhla ˈˈdhe ʋa yea ˈkwlaidhbho- -kmanˈˈ nʋn. ˈKlaa -ka Ezipʋkɔʋn an kmaan ʋbʋ aˈ dhbhoˈˈ ɛ, ˈkamɔn- Israɛkɔʋn an di ɩˈˈ. Ɛɛˈ dhɛ tu ɛ ɲaan Falaɔn dhi. Ɛɛˈ dɩ ɔ ˈnaan ɲʋn ˈdhbha Israɛkɔʋn anˈ ˈˈɲnuun -ɲmai aˈ klɛɛ -ʋa- muan ˈghwlu-. -Naan tɔˈ i ke aˈ. -Faʋn- an nʋn Israɛkɔʋn ˈmɛn ˈjɛɛn -dhe.

ˈƝnɔnkpaoˈ dhueˈ nɩan Israɛkɔin -ʋanˈ ˈɲnɩn nɩan Zokebɛdɩ ɛ, ʋn ˈghwlʋɛ ˈˈjhu -ɲmau -ɔ -nmɔn ˈˈjhrii ˈjɛɛn-. -Ka ɲʋn -sɔˈ dhɛ -nʋʋn ɛn, ʋn poɔ ˈe -toɛˈˈ ˈdhi ˈˈdhe ʋn ˈˈduɔˈˈ i ˈdhe -siiˈˈ ˈdhi ˈbho ˈˈnin -klaaˈˈ dhueˈ ɲʋn an ˈdhaa Nilɩ -gwlɩˈˈ. ˈˈJhudhee- -ˈnɔn ɔnˈ ˈdhoudhi -ɲnʋnkpaoˈ -ʋanˈ ˈɲnɩn nɩan Miriamʋn ɛn, ʋn ˈˈman anˈ -da ˈˈzaan -wɛeˈ ʋan ŋmʋn dhɛ -ˈyea -nʋʋɛn- jha.

Falaɔn ɔnˈ ˈˈjhu -ɲnʋnkpaoˈ jhia -dhreaˈ ˈbho ˈˈniɔn ɔn, ʋn ˈjhe -toɛˈˈ -ˈnɛn ˈmɛn. ˈˈJhu -dhee -nɩn ˈe ɛ ˈdhi -ɔɔ ˈˈvin! ˈSʋ ʋn ˈjheɛ ɔɔˈ -ghwɛe-. Miriamʋn -ghwluɛ ˈe ʋn bho ʋn ˈnaan: ‘Aa ˈbɔn ˈye ˈɲnɔnkpaoˈ dhueˈ ˈdha ʋn ˈyeɔ ˈɲaan-?’ Falaɔn ɔnˈ ˈˈjhu ˈŋwɔɔn- ˈbho ˈmɛn ˈˈdhe Miriamʋn mun ɔɔˈ ˈdhou Zokebɛdɩ ˈdhaa. Falaɔn ɔnˈ ˈˈjhu -ghwluɛ ˈdhe ʋn bho ʋn ˈnaan: ‘A ˈˈdhuo- ˈˈjhuzaan- nɔn ˈmʋn a ˈyeɔ ˈɲaan- a ˈye ˈʋn ˈˈɲɩn ˈˈdhe ˈyea ʋn geiˈˈ -za.’

ˈˈJhuzaan ˈbhɛa ˈˈɩ ˈsʋ ɛ, Zokebɛdɩ kpɔ ˈe Falaɔn ɔnˈ ˈˈjhu bho ˈˈdhe ʋn ˈdhɔɔ Moizɩ -wɛeˈ ʋn ˈˈdu ɔɔˈ dɩ -ka ɔɔˈ nɩan ʋanˈ ˈˈjɛ ɛˈ ˈˈjhu ɛ. Ʋn ˈbhle Moizɩ ˈmɛn -ka ɲɔn ɔn ˈbhlea ˈbheɔ ɔˈ ˈˈjhu ɛ ˈˈdhe ɔ ˈbhle dhɩ aˈ klɛɛ ɔɔ ˈbɔan ˈmɛn. ˈKlaa Moizɩ ˈse Zoova bho ˈˈmae-. Ɔ jhibhiˈ -ka ɔ sea Ezipʋkɔin -nɩn ˈklaa ɔ nɩan Israɛkɔin ɛn. ˈˈDhe ɔ -za ˈo Zoova aˈ ˈˈɲɩanˈˈ.

Moizɩ ˈbhlea zɩn anˈ 40, ɔ za ˈo ɔɔˈ ˈˈjɛ -gwlɩˈˈ ɔ ˈye ɔɔˈ ˈcɛ sʋn bho po. -Zɔn dhueˈ ɛ, ɔ ˈjheɛ Ezipʋkɔin -ɔɔ bhla Israɛkɔin dhueˈ. ˈSʋ Moizɩ bhla Ezipʋkɔin ˈmɛn ɔ yeɔ ˈdhbha. -Wɛeˈ ɔ ˈˈdu ɔɔˈ ˈˈku i ˈdhe -bɩɛnˈˈ -zɔnˈ. Falaɔn ˈŋwɔan dhɛ -nʋʋan, ɔ ˈbɔɛn Moizɩ i -wɛeˈ ɔ ˈyeɔ ˈdhbha. ˈKlaa, Moizɩ pleˈ ɔ ye ˈdhe Madian ˈmʋn. Zoova ˈˈduɛˈˈ ɔɔˈ dɩ ˈdhemɔn.