Moizɩ nʋɛn zɩn anˈ 40 ˈdhe Madian anˈ. Ɔ ˈbhleɛ ˈɲnɔn ˈˈdhe ʋʋ ˈbhleɛ ˈˈɲnuun-. -Zɔn dhueˈ ˈsʋ, ɔ -dea ˈbhlaeˈ ˈdhei ˈbho Sinai trʋ ˈˈbun ɛn, ɔ ˈjheɛ dhɛ -ɛɛ ˈˈmaan ɲʋn -taiˈ. Ti aˈ bhɔˈ ˈkpa nɛn ˈˈdhe -ɩanˈ sin! Moizɩ ˈkpaa- ˈbho ˈmɛn ˈˈdhe ɔ ˈye dhɛ -ɛɛ nʋʋan ˈˈkpei ˈjhe. Ɔ ɲnian ˈo ɛ, ɔ ˈŋwɔn ghwlu ˈdhe ti aˈ bhɔˈ ˈdhi -ʋn ˈnaan: ‘Moizɩ! -Manˈ ˈˈkʋʋan- in -dhe. -Za ˈˈkwlai bhɩˈ dhɛ nɩan ˈo ɛ, ˈbhlʋa- -ɲnan in ˈbho ˈˈkpe ɛ, ɔ -deeɛ ˈfɔ ɩˈˈ.’ Ɛ nɩn Zoova -jhii ɔɔˈ dhbhoozuu- i -ɔ -ghwlu ˈdhe ɔ bho.

-Faʋn an nʋn Moizɩ ˈmɛn, ɔ ˈˈduɛˈˈ ɔɔˈ ˈˈjhibha i. Ghwlu ɔ ˈŋwɔan ˈnaan: ‘ˈƖn ˈjheanˈ ˈmɛn -ka ˈman ˈcɛ Israɛkɔʋn an sea ˈdhe Ezipʋ ɛ. ˈYʋbʋ ˈpʋʋ ˈˈdhe ˈyʋbʋ ˈdhe ˈbhlʋa- ˈdhɔɛeˈ dhueˈ ˈdhi -paa. -Mɔn ˈye ˈman ˈcɛ Israɛkɔʋn ˈdhe Ezipʋ -za.’ ˈBhoo- -gwlɩˈˈ ˈdhe, ka Moizɩ ˈjhe ɛɛˈ dhɛ tu -ɛ? Ɛ gwɛ ɛ ˈˈmɔɔn -taiˈ.

Moizɩ deeɛ- dɩ i ɔ ˈnaan: ‘ˈˈDhe -bho ʋʋ dee- ˈmʋn in ʋʋ ˈnaan -ɔ dhbho ʋn -ɛn?’ Ɲɔnsoa ˈnaan: ‘ˈTmʋʋn ʋbʋ ˈnaan, Zoova, Ablaamʋn ɔnˈ Ɲɔnsoa, Izaakɩ ɔˈ Ɲɔnsoa, Zakɔbʋ ɔˈ Ɲɔnsoa dhbho ˈʋn.’ ˈˈDhe Moizɩ ˈnaan: ‘ˈˈDhe -bho ʋʋ ˈse ˈʋn -dheinˈˈ bho po ˈdhe?’ ˈSʋ Zoova -tɔɔn dhɛ -ɛɛ toɛ -ka ɔɔ muɔn sʋn bho -po ɛ. Ɔ ˈtmʋʋn- Moizɩ ˈmɛn ɔ ˈnaan ɔ po ɔɔˈ tu i ˈbho ˈbhlʋɔ-. Ɔ poa ɔɔˈ tu i ˈsʋ, ʋn ˈkpa sɛn! Moizɩ kpʋan sɛn ɛnˈ gʋn in ɛn, ɛ ˈkpa tu -kenɛnˈ. Zoova ˈnaan: ‘-Bho nʋn ɩanˈ dhɩ tu ɛˈ, ʋa muɛn -gwlɩˈˈ -de -ka ɛ nɩan ˈmɔn- dhbhoa ʋn ɛn.’

ˈBho ɛ ˈdhe ɛ, Moizɩ ˈnaan: ‘ˈƖn se -ghwluaˈ ˈˈŋwɛn ˈbhɛɛ-.’ Zoova cɛn ghlu ˈdhe ɔ bho ɔ ˈnaan: ‘Dhɛ -ˈyea ˈtmʋn ɛn, ˈman muɛn ʋn ˈtmʋʋn-, ˈˈdhe ˈman muɛn ʋn -manˈ ˈdhoudhi Aarɔn -jha ɔ ˈye ʋn sʋn bho po.’ Moizɩ deɛ -gwlɩˈˈ -ka Zoova ˈyeɔ sʋn bho po ˈsʋ ɛ, ɔmɔn- -e ɔɔˈ ˈɲnɔn -e ˈˈɲnuun muɛn Ezipʋ dhe.

Israɛkɔʋn- -nɩɛn- -kʋɔnkwlaˈ ˈˈdhe ɲʋn an kpʋʋɛn ʋbʋ ˈˈdhrui ʋa yea dhbho -kmanˈˈ nʋn. Zoova dhbhoɛ Moizɩ -e Aarɔn ˈdhe Falaɔn bho ʋʋ ˈyeɔ dɩ nɩn ˈtmʋʋn-: ‘ˈˈTai- ˈman ˈcɛ i ʋʋ ˈye ˈe -bɩɛnˈˈ -bhlʋa- ˈˈkpe mun ʋʋ ˈye ˈʋn ˈˈɲɩn.’ ˈDhe ˈˈjɛɩbhɛɛ ˈmʋn Falaɔn ˈnaan: ‘Dɩ Zoova a ˈtmʋan se ˈman dɩ -nɩn ˈˈdhe ˈɩn ˈse Israɛkɔʋn i ˈˈtai- dhi ʋʋ ˈse -mun in.’ Dhbho kmanˈˈ ʋa nʋan, Falaɔn poɔ ˈˈkpe -kenɛnˈ. ˈKlaa Zoova a muɛn Falaɔn ˈsrɩn ˈˈdu-. -Kawɛ ɔ ˈye ɛɛˈ -nʋn sʋn nʋn -ɛn? Ɔ -jha ˈkledɩ -bue- ˈbho Ezipʋ -bhlʋa- ˈˈkpe. Zoova -ghwluɛ ˈe Moizɩ bho ɔ ˈnaan: ‘Falaɔn ɔnˈ po ˈʋn -dheinˈˈ bho. -Glaeˈˈ pɛɛn, ɔɔ muɛn ˈo Nilɩ -gwlɩˈˈ -nɩn. Mun ˈdhe ɔ bho -ˈmɛn ˈtmʋɔn -ˈnaan -jɛn ɔ ˈsea ˈman ˈcɛ Israɛkɔʋn i ˈˈtai- ʋʋ ˈsea mun ɛn, ˈˈnin nɩan ˈo Nilɩ ŋwɔn ɔn muɛn ɲmɔn ˈkpa-.’ Dhɛ Zoova ˈtmʋan, ɛmɛn- Moizɩ nʋn. Ɔ muɛn ˈe Falaɔn bho. ˈBho Falaɔn ɔnˈ ˈˈjɛ ˈˈjhibhaˈ Aarɔn bhla ɔɔˈ tu i ˈbho Nilɩ ˈˈkpe ˈˈdhe ˈˈnin nɩan ˈo Nilɩ ŋwɔn ˈkpa ɲmɔn. Zmiin an ˈmɛɛn, Nilɩ ɛˈ ˈˈnin ɛn poɛ ˈnʋn, ɲɔn se ˈbhɛɛ- ɲɔn ˈyeɛ ˈnan. ˈKlaa Falaɔn ˈnaan ɔ ˈse Israɛkɔʋn i ˈˈtai- dhi ʋʋ ˈse -mun in.

ˈGhwɩ -ˈˈmɛsɔnˈ zia, Zoova dhbhoɛ Moizɩ ˈdhe Falaɔn bho ɔ ˈyeɔ dɩ nɩn ˈtmʋʋn-: ‘-bho se ˈman ˈcɛ i ˈˈtai- ʋʋ ˈse mun ɛnˈ, Gbii a muɛn da Ezipʋ -bhlʋa- ˈdhi ˈˈjhi-.’ Aarɔn kpa ɔɔˈ tu ˈˈjha ˈsʋ gbii -dee ˈbho Ezipʋ -bhlʋa- ˈdhi ɔˈ ˈˈjhiaˈˈ ˈmɛn. Ʋa ˈjheɛ gbii- ˈdhe ʋaˈ ˈˈgbi -di ˈdhi, ˈdhe ʋaˈ ˈˈkpepɛndhɩ ˈˈkpe, ˈdhe ʋaˈ ˈfuu ˈdhi. Gbii -nɩɛn dhɩ aˈ klɛɛ ˈmʋn in! Falaɔn -ghwluɛ ˈe Moizɩ bho ɔ ˈnaan bhae- Zoova ɔ ˈye ˈkledɩ i -ɲnaan. Falaɔn ˈnaan ɔɔ muɛn Israɛkɔʋn i ˈˈtai- ʋʋ ˈye mun. ˈSʋ Zoova -ɲnaan ˈkledɩ- -ˈnɩn in. Ezipʋkɔʋn ˈtɛn gbii -ˈnɩn anˈ ˈˈkwi ʋʋ yɩ i -ˈgboo-. Ɩn ˈˈjhi ˈbho ʋaˈ ˈbhlʋa ˈdhi ˈmɛn ɩan yea ˈnʋn po. -Kenɛnˈ ɛn, Falaɔn ˈnaan, ɔ ˈse Israɛkɔʋn- i ˈˈtai- dhi ʋʋ ˈse -mun in.

ˈSʋ Zoova -ghwluɛ ˈe Moizɩ bho ɔ ˈnaan: ‘Aarɔn ˈye ɔɔˈ tu i bhla bho ˈbhlʋɔ ˈˈdhe -gbʋɔˈˈ -ɔɔ muan ˈmʋn -sɔn ˈye -klɩɩn ˈkpa.’ ˈSʋ -klɩɩn -sɔmʋnˈ ˈmɛn ɩn ye i -gbaa. Ezipʋkɔʋn -ˈnʋʋn -ghwluɛ ˈe Falaɔn bho ʋʋ ˈnaan: ‘ˈKledɩ- jɩn an ˈghwlʋɛ ˈe Ɲɔnsoa bho.’ ˈKlaa, Falaɔn ˈse bɔnˈ ke ɔ ˈye Israɛkɔʋn i ˈˈtai ʋʋ ˈye mun.