Moizɩ -e Aarɔn ˈtmʋʋn- Falaɔn dɩ Ɲɔnsoa ˈtmʋan -ˈmɛn ʋʋ ˈnaan: ‘-Bho ˈse ˈman ˈcɛ i ˈˈtai- ʋʋ ˈse mun ɛnˈ, ˈman muɛn ˈˈghwlu -duuˈˈ -jha ˈbho ˈbhlʋa- ˈdhi.’ ˈˈGhwlu -ˈnɩn ˈgɔ ˈˈdain -klaeˈˈ -ɩan- thbha ɲʋn ˈgɩ. ˈˈGhwlu aˈ bhɔˈ -gbaai ˈdhe Ezipʋkɔʋn ˈbhleaˈ ˈˈghwlii -e -ʋʋ sea ˈˈghwlii ˈbhle ˈbho ˈˈgbu. ˈˈGhwlu ˈˈjhi ˈbho ˈbhlʋa aˈ klɛɛ ˈdhi ˈmɛn. ˈKlaa ˈˈghwlu ˈse ˈe ˈbhlʋa aˈ ˈfɔ ɲɔɔn ˈdhaa Gosɛnɩn -da Israɛkɔʋn ˈˈtia -nɩn. ˈKledɩ aˈ ɲɩɛn -nɩn -e -jɩn thbha ˈo ɛ, ɩn -jhiiɛ- Ezipʋkɔʋn anˈ ˈsu i. Falaɔn bhaeɛ- ubʋ i ɔ ˈnaan: ‘Aʋ cɛn ˈgɩn aʋ ˈye Zoova ˈˈɲɩn ɔ ˈye ˈˈghwlʋ i -za. Aʋaˈ ˈcɛ ˈbhɛɛˈ ʋʋ ˈye mun.’ ˈKlaa -jɛn Zoova -za ˈˈghwlu i ˈsʋ ɛˈ, Falaɔn zian- ghwlu iˈˈ. Falaɔn ɔn mun dhɛ i ˈŋwɔn- ˈmɛn -ˈzɔn dhueˈ?

ˈˈDhe Zoova ˈnaan: ‘-Bho Falaɔn ˈse ˈman ˈcɛ i ˈˈtai- ʋʋ se mun ɛnˈ, Ezipʋkɔʋn anˈ nmiian an muɛn ˈghwɛ ˈkpa- ˈˈdhe ɩn ˈye ˈmɛn.’ -Zɔn -ˈnɔɔn zɩan, nmiian -dee- ˈmɛan ˈmɛn. Israɛkɔʋn anˈ -nɩnandhɩ- ˈse ˈmɛn. ˈKlaa, Falaɔn ɔn kpa ˈˈdhru -kuuɛ- ɲan.

ˈBho ɛ ˈdhe ɛ, Zoova ˈtmʋʋɛn- Moizɩ ɔ ˈye ˈe Falaɔn bho dhe mun -wɛeˈ ɔ ˈye bhuʋnˈ ˈˈvile- ˈdhe ˈˈjha. Bhuʋnˈ -ˈnʋn ˈkpa -gboɔˈˈ -ɔ -gbaa i ˈdhe ˈˈjha ˈˈdhe -ɔɔ ˈghwla ˈbho Ezipʋkɔʋn -e ʋaˈ nmiian ˈˈkpe. -Gboɔˈˈ -ˈnɔn nʋɛnˈ -bii- -klaeˈˈ -ɩan- pʋʋa ye Ezipʋkɔʋn -e ʋaˈ nmiian kui ˈˈjhi. Falaɔn ɔn kpa ˈˈdhru -kuuɛ- ɲan, ɔ ˈse Israɛkɔʋn i ˈˈtai- ʋʋ se mun.

ˈSʋ Zoova dhbhoɛ Moizɩ ˈdhe Falaɔn bho dhe ɔ ˈnaan: ‘ˈSe ˈbɔn ke -ˈye ˈman ˈcɛ i ˈˈtai- ʋʋ ˈye mun? -Glaeˈˈ ɛ, ˈˈcɛ ˈˈkple a muɛn ˈˈjha -dhrɔ.’ Zɔn zian, Zoova nʋɛnˈ ˈˈnin ye -ˈˈgbu ˈˈdhe ˈˈcɛ ˈˈkple -e nɛn ye ˈˈjha dhrɔ. Ɛɛˈ dhɛ tu ˈse nʋʋɛn- kpɔ dhueˈ ˈbho Ezipʋ. Ti -e ˈˈduudhɩ aˈ klɛɛ -zaa i, ˈklaa dhɛ ooˈˈ dhɛ ˈse -nʋʋɛn ˈdhe Gosɛnɩn. Falaɔn ˈnaan: ‘Aʋ bhae- Zoova i ɔ ˈye ˈˈcɛ ˈˈkple i -ɲnaan! ˈBho ɛ ˈdhe ɛ, aʋ ˈbhɛɛˈ aʋ ˈye mun.’ ˈKlaa -jɛn ˈˈcɛ ˈˈkple -e ˈˈnin ˈbhɔa jhi dɩ ˈsʋ ɛ, Falaɔn ˈzian ghwlu ɩˈˈ.

ˈBho ɛ ˈdhe Moizɩ ˈnaan: ‘kaan bhla, ˈˈduudhɩ- ˈˈcɛ ˈˈkple sea i -za a, -kpaɩnˈˈ ˈyɩ dhi.’ -Kpaɩnˈˈ anˈ mliɔn dhi dhɩ aˈ klɛɛ sia ˈe gleˈ -e ˈti jhai ˈmɛn. Falaɔn bhaeˈ ɔ ˈnaan: ‘Aʋ cɛn ˈgɩn aʋ ˈye Zoova ˈˈɲɩn ɔ ˈye -kpaɩnˈˈ dhi nʋn.’ ˈKlaa -jɛn Zoova nʋan -kpaɩnˈˈ dhi ˈsʋ ɛ, ɔɔ kpa ˈˈdhru -kuuɛ- ɲan -kenɛnˈ.

Zoova -ghwluɛ ˈe Moizɩ bho ɔ ˈnaan: ‘To -ˈman sʋn ˈdhe jhaʋn ˈdhi.’ Ʋʋ nʋan ka ˈsʋ ɛ, ˈdhe jhaʋn ˈdhi -niɛn -bli -bli. ˈDhe ˈghwɩ taan ˈdhi, Ezipʋkɔʋn -nɩɛn ˈe -kwile- ˈdhi. Ʋʋ se ˈbhɛɛ ʋʋ ˈye dhɛ ooˈˈ dhɛ ˈjhe ˈˈdhe ʋaˈ ˈjhe bha ˈˈkpei -ke. ˈDhe Israɛkɔʋn anˈ ˈsʋ aˈ ˈfɔ bho nɛn -nɩn.

Falaɔn -ghwluɛ ˈe Moizɩ bho ɔ ˈnaan: ‘-ˈMɔn -e -ˈman ˈcɛ, aʋ ˈbhɛɛˈ aʋ ˈye mun. ˈKlaa aʋaˈ -nɩnandhɩ- -ˈmɩn ˈye da -sie-.’ Moizɩ ˈnaan: ‘-A ˈye -aaˈ -nɩnandhɩ- kpa ɩmɩn- -a ˈye ˈsraa -zaa -a ˈye -aaˈ Ɲɔnsoa ˈˈɲɩn.’ ˈSʋ Falaɔn ˈkpa ˈcɛn ˈjɛɛn-. Ɔ ˈˈghwɔɔˈ: ‘ˈGhwlʋ da! -Bho ˈɩn ˈjhe ʋn ˈˈjhibhaˈ -kenɛnˈ ɛnˈ, ˈye ʋn ˈdhbha.’

Moizɩ ˈtmʋʋɛn- Falaɔn -ka ɔ ˈseɔˈ ˈˈjhibhaˈ -jhi i -dheeˈ ka. ˈKlaa ɔ ˈyea mun ɛn, ɔ -ghwluɛ- ˈe Falaɔn bho ɔ ˈnaan: ‘ˈBho ˈˈmaʋn -glʋ aˈ gwɛa, ɲankɔn- -ɲnuun nɩan da Ezipʋ -ɛ thbha Falaɔn ɔnˈ ˈˈjhu -ɛ -jhɛɛa -kʋɔnbʋ aˈ ˈˈɲnuun ɛn, ʋa muɛn ˈmɛn-.’

Zoova ˈtmʋʋn Israɛkɔʋn ˈmɛn ʋʋ ˈye dhiidhɛ dhueˈ nɩan ɛɛˈ -nɛn ka pi. Ɔ ˈnaan: ‘Aʋ dhbha ˈbhlaa -aeˈˈ -gbaaˈ -jhu -ˈbhlea -zʋn dhueˈ, -ˈmɛn aʋ ˈˈdhuo- ɛɛˈ ɲmɔn -dhɛ ˈˈzaan ˈmʋn aʋ ˈye aʋaˈ ˈˈgbu aˈ -klu ŋwɛin tri. Aʋ po nmiin -ˈnɛn ˈˈjhri -ˈmɛn aʋ -dhiiɛ dipɛn sea ˈˈbuun dhɛ bho mun. Aʋ po aʋaˈ ˈˈjɛ kpɔ ɔˈˈ, aʋ -paa aʋaˈ ˈˈkwlai bhɩˈ -ˈmɛn aʋ -gbaeˈ aʋ ˈye mun. Ɛ nɩn ˈnɔn ˈˈmaʋn -glʋ nʋn ˈdhi -mɔn ˈye aʋ zeie-.’ -Naan tɔˈ i, ɛgwɛ ɛ ˈbhleɛ Israɛkɔʋn anˈ ˈmʋnan -dhe!

ˈBho ˈˈmaʋn -glʋ aˈ gwɛa ˈsʋ ɛ, Zoova aˈ dhbhoozuu- -jhiiɛ- Ezipʋ -bhlʋa aˈ klɛɛ ˈdhii. -Bho ɲmɔn se ˈˈgbu aˈ -klu ŋwɛin -nɩn ɛnˈ, ɲankɔn -jhu nɩan ˈo ɛ, ɔɔ ˈmɛɛnˈ. ˈKlaa -bho ɲmɔn -nɩn ˈˈgbu aˈ -klu ŋwɛin ɛnˈ, dhbhoozuu- a ziiɛ ˈbho ˈˈgbu -ˈnʋn ˈˈdhru. ˈCɛ ɛˈ klɛɛ nɩan ˈbho Ezipʋ -bhlʋa- ˈdhi -ʋʋ ˈbhlea ˈˈghwlii -aeˈˈ -ʋʋ sea ˈˈghwlii ˈbhle ɛ, ʋaˈ ˈˈjhu dhueˈ -ˈmɛn. ˈKlaa Israɛkɔʋn anˈ ˈˈjhu dhueˈ ˈka ˈse ˈmɛn.

Falaɔn ɔnˈ ˈˈjɛ ɛˈ ˈˈjhu ˈmɛɛnˈ -ke. Ɛ -kman anˈˈ bhla ˈdhe Falaɔn ˈˈkpe. Ɔ ˈˈdoo ɔ ye ˈe Moizɩ -e Aarɔn bho -ghwlu ɔ ˈnaan: ‘Aʋ ˈghwlʋ da! Aʋ mun aʋ ˈye aʋaˈ Ɲɔnsoa ˈˈɲɩn. Aʋ ˈˈdhuo- aʋaˈ -nɩnandhɩ ˈmʋn -ˈmɛn aʋ ˈghwlʋ da!’

Israɛkɔʋn- an ˈghwlʋa Ezipʋ ɛ, -ˈmɛn ˈcʋ a fanˈ. Ʋʋ -deeɛ- kpɛ, ˈˈgbuzɔncɛ -e ˈcɛdhri -e. Ɲmai aˈ 600.000 -e ˈɲnʋnkpaeˈ -e ˈˈɲnumɩɩnˈˈ -duuˈˈ. Ɲʋn -duuˈˈ -ˈnʋʋn -nɩn ʋbʋ mun -wɛeˈ -ʋʋ ˈye Zoova ˈˈɲɩn -ke. Israɛkɔʋn- ˈghwlʋ -kʋɔnkwlaˈ -wɛ bhla!

Dhɛ Zoova muan ˈˈdhe ɔ ˈpʋʋa Israɛkɔʋn- ɛn, -ka ʋʋ ˈseɛ bho ˈˈmae- ˈdhi ɛ, ɛɛˈ dɩ ʋʋ ˈye dhiidhɛ- -ˈnɛn nɩan ɛɛˈ -nɛn ka dhi zʋn ooˈˈ zʋn. Ɲɔn ˈdhaa- dhiidhɛ- -ˈnɛn Pakɩ. Ghwlu -ˈnʋn ˈdha dhɛ ˈˈdhru -jhiiɛ-.