Israɛkɔʋn ˈghwlʋɛ ˈo Sinai trʋ -gwlɩˈˈ ʋʋ ye Paranɩn ɛnˈ -bɩɛnˈˈ -bhlʋa- cɛn ˈˈdhe ʋʋ ɲnin -da ɲʋn an ˈdhaa Kadɛsɩ. ˈBhomɔn- Zoova -ghwlu ˈe Moizɩ bho ɔ ˈnaan: ‘-Za ɲmai aˈ 12 ˈdhe ˈcɛdhri ˈˈklu ʋʋ ˈye Kanaan jha -ŋmʋanˈ mun, ˈbhlʋa- ˈyea Israɛkɔʋn ˈˈɲɩn ɛn.’ ˈSʋ Moizɩ -za ˈo ɲʋn anˈ 12 ˈˈdhe ɔ ˈtmʋʋn ʋbʋ ɔ ˈnaan: ‘Aʋ mun kanaan, -wɛeˈ -bho ɲʋn ˈbhɛɛ ɲʋn ˈye dhiidhɩ ˈˈdu ˈdhemɔn ɔnˈ, aʋ ˈye -aʋ ˈtmʋʋn-. Aʋ -ŋmʋn ɲʋn ˈˈtiaˈˈ ˈe jha, -bho ʋʋ -kmanˈˈ -aeˈˈ ʋʋ se ˈˈɩ -kman -e -bho ʋʋ ˈˈti -peeˈˈ zɔnˈ in -aeˈˈ ˈˈkwigwlɛ ˈdhii ɛˈ, -a ˈyɩ jhibho-.’ Ɲʋn anˈ 12 -ʋʋ ˈdhe ˈˈklu Zozue -e Kalɛbʋ nɩan ˈkpa ˈo ˈmɛn ʋʋ ye Kanaan mun.

ˈGhwɩ aˈ 40 zia, ʋʋ jhiɛ dhe. Ʋʋ -jha figɩ -e grenadɩ -e rɛzɛn. Ʋʋ ˈnaan: ‘Ɛ nɩn ˈbhlʋa- ˈdhɔɛeˈ, ˈklaa ɲʋn ˈˈtia ˈe -kmanˈˈ ˈˈdhe ʋa ˈˈkwigwlɛ- -pooɛ -bhloeˈ -klaeˈˈ ˈdhei.’ ˈSʋ Kalɛbʋ ˈnaan: ‘-A ˈbhɛɛˈ -a ˈye tʋ aˈ ˈˈdhru kpa ˈbho ʋbʋ ˈˈkpe. -A mun!’ Jhibho- dhɛɛdɩ- Kalɛbʋ ˈdha ˈka ˈmɛn? Ɔmɔn- -e Zozue deɛ Zoova -gwlɩˈˈ. ˈKlaa ɲʋn -bue- sia ˈo ˈnaan: ‘ˈˈƖɩn-! Ɲʋn nɩan ˈe -tɛn jha! -A gwɛ -kpainˈˈ ˈdhe ʋbʋ ˈˈjhibhaˈ.’

Ɛ ˈdhbha Israɛkɔʋn ˈkpɩi. Ʋʋ -dee i -ghwluaˈ ˈmɛn ʋn ˈnaan: ‘-A za ˈo ɲɔn -ˈnɔɔn ɔ ˈye -aʋ jie bho po -ˈmɛn -a mun Ezipʋ dhe. Dhɛɛdɩ- -a ˈye Kanaan mun -wɛeˈ ɲʋn ˈye -aʋ ˈdhbha -a?’ Zozue -e Kalɛbʋ ˈnaan: ‘Aʋaˈ -bhlaa Zoova aˈ ghwlu ŋwɔn -dhe ˈˈdhe -faʋn anˈ nʋn aʋ -dhe. Zoova a muɛn -aʋ ˈdhei -fuo.’ ˈKlaa Israɛkɔʋn ˈse ʋbʋ -dheinˈˈ bho po. Ʋbʋ a ˈbɔn ʋʋ ˈye Zozue -e Kalɛbʋ ˈdhbha mɔn -dhe!

Dhɛwɛ- Zoova nʋn -ɛn? Ɔ -ghwluɛ ˈe Moizɩ bho ɔ ˈnaan: ‘Dhɩ -ˈnɩn anˈ klɛɛ ˈɩn nʋan ˈɩn ˈˈɲɩanˈˈ Israɛkɔʋn ɛn, ʋʋ ˈse ˈbɔn ke ʋʋ ˈye ˈman ghwlu ŋwɔn ˈjhe. -ˈMɛn ʋa muɛn da -bɩɛnˈˈ -bhlʋa- nɔn ˈˈkpe -sie ʋʋ ˈye zɩn anˈ 40 nʋn. Da -mɔn ʋʋ ˈye ˈmɛɛn-. Ɛ nɩn ʋbʋ aˈ ˈˈɲnuun -e Zozue -e Kalɛbʋ -ʋʋ ˈye ˈbhlʋa- -ɔɔˈ ghwlu ˈɩn cɩan ˈdhi ˈˈti.’

-Da Israɛkɔʋn- nɩan ˈe -bɩɛnˈˈ -bhlʋa- ˈˈkpe ɛ, Kore -e Datanɩn -e Abiramʋn -e Israɛkɔʋn- -ˈnʋʋn anˈ 250 ˈse Moizɩ ɔˈ ɲʋnbhleɛ ɛˈ dɩ ˈŋwɔɔn-. Ʋʋ -ghwluɛ ˈdhe ɔ bho ʋʋ ˈnaan: ‘-A sea -manˈ dɩ ˈmʋn ˈmɛn! Dhɛɛdɩ- mɔn -nɩn -aaˈ ˈˈdhrujhei ˈˈdhe Aarɔn nɩn ˈsraazai- -klaaˈˈ -a? Zoova -nɩn -aaˈ klɛɛ -ˈnan, ɛ se mɔn -e Aarɔn ɔnˈ ˈsʋ -nɩn ɔ -nan -nɩn.’ Dɩ ʋa ˈtmʋan ˈse Zoova ˈtʋn nʋn. ˈDhe ɔ ˈˈjhri ˈdhe ɛ, ɛ nɩn ɔɔˈ ɲʋnbhleɛ ʋʋ ˈse ˈŋwɔɔn-!

Moizɩ -ghwluɛ ˈe Kore -e ɲʋn -nɩn ɔ nan bho ɔ ˈnaan: ‘-Glaeˈˈ ɛ, aʋ po ansan ˈdhe nɛndhipodhɛ ˈdhi aʋ ˈye ˈdhe Ɲɔnsoa aˈ -pooˈˈ ˈdhi jhi. Zoova ˈye -aʋ ɲɔn ɔ za ˈo -tɔɔn.’

Zɔn zɩan, Kore -e ɲʋn anˈ 250 muɛn ˈe Moizɩ bho ˈdhe Ɲɔnsoa aˈ -pooˈˈ ˈdhi. Ʋʋ poɛ ansan ˈˈjhri -ka ʋaˈ nɩan ˈsraazaʋn- ɛn. Zoova -ghwluɛ ˈe Moizɩ -e Aarɔn bho ɔ ˈnaan: ‘Aʋ -tɛɛn Kore -e ɲʋn -nɩn ɔ nan bho.’

-Bho Kore mun ˈe Moizɩ bho ˈdhe Ɲɔnsoa aˈ -pooˈˈ ˈdhi mɔn -dhe ɛˈ, Datanɩn -e Abiramʋn -e ʋaˈ ˈˈgbuzɔncɛ ˈse ˈe mun. Zoova -ghwluɛ ˈe Israɛkɔʋn bho ʋʋ ˈye Kore -e Datanɩn -e Abiramʋn anˈ -peeˈˈ bho -tɛɛn. Israɛkɔʋn ˈˈdooˈ ʋʋ ye dhɛ Zoova ˈtmʋan nʋn. Datanɩn -e Abiramʋn -e ʋaˈ ˈˈgbuzɔncɛ ˈghwlʋ ˈe ʋaˈ -peeˈˈ ˈdhi ʋʋ ye i -ɲnan ˈbho ɩn ˈˈjhibhaˈ. ˈSʋ ˈbhlʋa -kaiɛn ŋwɔn ʋʋ ye glu pa! ˈDhe Ɲɔnsoa aˈ -pooˈˈ ˈdhi ɛ, nɛn ˈghwlʋ ˈe ˈˈjha ɛ ye Kore -e ɲʋn anˈ 250 -nɩn ɔn nan -siin-.

Zoova -ghwluɛ ˈe Moizɩ bho ɔ ˈnaan: ‘ˈTmʋʋn- ˈcɛdhri aˈ ˈˈdhrujheʋn- anˈ klɛɛ ʋʋ ˈye ʋn ʋaˈ tu ˈˈɲɩn. ˈCre ʋbʋ aˈ ˈɲnɩn ˈbho ʋbʋ aˈ tu ˈˈkpe. ˈBho Levi cɛ ɛˈ tu ˈˈkpe ɛ, ˈcre Aarɔn ɔnˈ ˈɲnɩn. Po ti -ˈnɩn anˈ klɛɛ ˈdhe -pooˈˈ ˈdhi. Ɲɔn ˈman muan ˈo -za a, ɔɔˈ tu a muɛn ˈvaɩnˈ -po.’

Zɔn -ˈnɔɔn zɩan, Moizɩ muɛn ti -ˈnɩn anˈ klɛɛ ˈbho aˈ ˈˈdhe ɔ toɩ ˈdhe ˈcɛdhri aˈ klɛɛ ɛˈ ˈˈdhrujheʋn- bho. Aarɔn ɔnˈ tu poɛ ˈvaɩn -e amandɩ -bhi -ˈˈvluaˈˈ. ˈKamɔn-, Zoova nʋn ɛnˈ -to sʋn -ka ɛ nɩan Aarɔn -mɔn ɔ za ˈo ˈyea ˈsraazai- -klaaˈˈ -nɩn ɛn.