Zezi jhiɛ ˈkmʋn dhe

Zezi ˈmɛan, ˈˈjhu dhueˈ ˈbhlea ˈˈghwliɛ -ɔ ˈɲnɩn nɩan Zozɛʋ ɛ, ɔ deeɛ- Pilatɩ i -wɛeˈ ɲʋn ˈye Zezi ɔˈ ˈˈku ˈbho tu -gwlɩˈˈ -za. Ɔ ˈˈfian- Zezi ɔˈ ˈˈku ˈfɛɛn in, ɔ poɔ ˈcran -ˈbhlea ˈnʋn ˈdhɔɛeˈ kwii ˈˈdhe ɔ poɔ ˈdhe -drɛɛn -dhee ˈdhi. Ɔ deɛ ˈsouˈˈ -klaaˈˈ ˈbho -drɛɛn ˈˈŋwɛn. ˈSraazaʋn- anˈ ˈˈdhrujheʋn- -ghwluɛ- ˈe Pilatɩ bho ʋʋ ˈnaan: ‘-Bho -a se dhɛ ooˈˈ dhɛ nʋn ɛnˈ, ɔɔˈ dhɛcɩaʋn ˈye ɔɔˈ ˈˈku ˈmʋn ˈˈdhuo- ˈˈdhe ʋʋ ˈye ka nʋn ɔ jhiɛ ˈkmʋn dhe.’ Pilatɩ -ghwluɛ- ˈdhe ʋbʋ bho ɔ ˈnaan: ‘Aʋ kan -drɛɛn ˈˈŋwɛn ˈˈklɔ ˈˈklɔ -ˈmɛn aʋ po ˈo ˈsʋlɩˈˈ ʋʋ ˈyeɛ ˈdhei -de.’

ˈBho ˈghwɩ aˈ taan -zɔn ˈˈkpe ɛˈ -drʋʋn pɛɛn, ˈɲnʋnkpaeˈ mun ˈnɔn- -drɛɛn nɩan. Ʋʋ nʋan ka -dhe ɛ, ˈsouˈˈ paoˈ nɩan ˈo -drɛɛn ˈˈŋwɛn ˈghwlʋ ˈo ˈmɛn. ˈSʋ ˈɲnʋnkpaeˈ -ˈnʋn anˈ dhueˈ -ʋanˈ ˈɲnɩn nɩan Mai ˈghwlʋa Madala a, ʋn ˈˈdooˈ ʋn ye ˈe Piɛɛ -e Zan bho mun. Dhbhoozuu- dhueˈ -nɩn ˈe -drɛɛn ˈdhi -ʋn ghwlu ˈe ˈɲnʋnkpaeˈ sia ˈo bho -ʋn ˈnaan: ‘-Faʋn- anˈ nʋan aʋ -dhe. Zezi jhiɛ ˈkmʋn dhe. Aʋ mun aʋ ˈye ɔɔˈ dhɛcɩaʋn ˈtmʋʋn- ʋʋ ˈyeɔ -jhɛɛ ˈdhe Galile.’

Mai -jhɛɛa Piɛɛ -e Zan ˈsʋ ɛ, ʋn -ghwluɛ- ˈe ʋbʋ bho ʋn ˈnaan: ‘Ɲɔn ˈˈdhuo- Zezi ɔˈ ˈˈku ˈmʋn!’ Piɛ -e Zan pleˈ ʋʋ ye ˈnɔn- -drɛɛn nɩan mun. Ʋʋ ɲnian ˈe ɛ, -drɛɛn flɔn ˈdhii. ˈSʋ ʋʋ muɛn ŋmɛinˈˈ dhe.

Mai muan ˈe -drɛɛn ˈdhi dhe ɛ, ʋn ˈjheɛ dhbhoozii- ˈsɔɔn ˈdhe ɛ ˈdhi. Ʋn -ghwluɛ ˈdhe ɩn bho ʋn ˈnaan: ‘Da ʋʋ poa ˈman ˈBhlei ɛ, ˈɩn se ˈo jhibho-.’ ˈSʋ ʋn ˈjheɛ ˈˈjhu dhueˈ. ˈBho ʋn -gwlɩˈˈ -dhe ɛ, ɛ nɩn ˈˈjhu -ɔɔ ˈˈduaˈˈ gle -ˈnɛn ɛnˈ dɩ. Ʋn -ghwluɛ- ˈdhe ɔ bho ʋn ˈnaan: ‘-Kɔngɩnˈ, ˈtmʋʋn- ˈmʋn, -dawɛ poɔ -ɔ?’ ˈKlaa ˈˈjhu -ˈnɔn -ghwluɛ- ˈdhe ʋn bho ɔ ˈnaan: “Mai!” ˈBhomɔn- ʋn ˈjhibhi -ka ɛ nɩan Zezi ɛ. Ʋn ˈˈghwɔ ɔˈ ʋn ˈnaan: “Ɲʋndhɛtɔɔin-!” ˈSʋ ʋn ˈˈduɔˈˈ -gwlɩˈˈ. Zezi -ghwluɛ- ˈdhe ʋn bho ɔ ˈnaan: ‘A mun a ˈye ˈman ˈdhoudhi -ˈˈwe ˈtmʋʋn- -ka a ˈjhea ˈʋn ɛn.’ Mai pleˈ ˈˈdoo- ʋn ye ˈe dhɛcɩaʋn bho mun. ˈˈDhe ʋn ˈtmʋʋn ʋbʋ -ka ʋn ˈjhea Zezi ɛ.

Ɛɛ ˈbhɔɔ ˈbho ˈdhe -zɔn nɩan dhueˈ ˈdhi ɛ, dhɛcɩaʋn ˈsɔɔn -ʋa ˈghwlʋ Zelizalɛmʋn -ʋa- mun Emaisɩ. ˈˈJhu dhueˈ ˈkpaa- ʋbʋ i. Ɔ deeɛ- ʋbʋ i ɔ ˈnaan: “Dhɛwɛ- -ɛɛˈ dɩ aʋa ˈtmʋn -ɛn?” Ʋʋ ˈnaan: ‘Dhɛ zia ˈnɔn ˈghwɩ ˈsɔɔn nɩn ˈdhi ɛ, seɛ jhibho-? ˈSraazaʋn- anˈ ˈˈdhrujheʋn ˈdhbha Zezi ɛ, ɛɛ nʋɛn ghwɩ taan bhla. Kaanbhla, ˈɲnʋnkpaeˈ -ˈnʋʋn ˈnaan ɔ jhiɛ ˈkmʋn dhe!’ ˈˈJhu -ˈnɔn deeɛ- ʋbʋ i ɔ ˈnaan: ‘Dɩ ghwlukwajhaaʋn ˈtmʋan, aʋ dɩ -gwlɩˈˈ ˈmɛn? Ʋʋ ˈnaan Klisɩ ˈye ˈmɛn ˈˈdhe ɔ ˈye ˈkmʋn dhe jhi.’ Ɔ kpa ˈcreedhɩ aˈ ˈˈkpei zela ɲanˈdhe ʋbʋ bho. Ɔ ɲnian Emaisɩ ɛ, dhɛcɩaʋn ˈtmʋʋn- ˈˈjhu -ˈnɔn ˈmɛn ɔ nɩn ʋbʋ ˈye -dadhueˈ -sie-. Ʋʋ ˈyea dhɛ dhi ɛ, ɔ bhaea ˈbho -dipɛnˈ ˈˈkpe sʋ, ʋʋ ˈjheɛ ˈˈkpei -ka ɛ nɩan Zezi ɛ. ˈKlaa ɔ ˈˈmaan- ˈbho i.

Dhɛcɩaʋn nɩan ˈsɔɔn ˈˈdooˈ ʋʋ ye Zelizalɛmʋn mun ˈdhe ˈˈgbu -ʋn ˈdhe ˈdhi dhbhoʋn -ˈgbooa ˈˈdhrui ɛ. -Wɛeˈ dhɩ aˈ klɛɛ -nʋʋan, ʋʋ ˈtmʋʋn- ʋbʋ ɩanˈ dɩ. Ʋbʋ aˈ klɛɛ nɩan ˈe ˈˈgbu ˈsʋ ɛ, Zezi ŋwaan ˈbho ʋbʋ ˈɲnin. ˈBho -deenanˈ -dhe ɛ, dhbhoʋn seɛ -gwlɩˈˈ de -ka ɛ nɩan Zezi ɛ. ˈKlaa ɔ -ghwluɛ ˈe ʋbʋ bho ɔ ˈnaan: ‘Aʋ -ŋmʋn ˈman sɩn jha, aʋ ˈtʋn ˈʋn dhi. Ɛ ˈcreeɛˈ -dhe -ka Klisɩ ˈyea ˈkmʋn dhe jhi ɛ.’