Zezi -za ˈo Sɔlɩ

Sɔlɩ ˈghwlʋʋ ˈdhe Taasɩ, ɔ -nɩɛn Rɔmʋnkɔin -ke -dhe. Ɔ -nɩɛn Faiziɛn -dhe ˈˈdhe ɔ jhibho- Zifʋ -ˈˈwe aˈ ˈtee ˈmɛn -kajɔɔnka. Ɔ ˈɲɛn kletiɛn -ˈˈwe ˈmʋn ˈmɛn -dhe ˈjɛɛn-. Ɔɔ pa ʋbʋ aˈ -ˈˈgbi ˈdhii ɔɔ yea ˈɲnʋnkpaeˈ -e ɲmai kpʋ ɔɔ yʋbʋ -gazo- ˈdhi po. -Da ɲʋn -duuˈˈ ˈkpa ˈcɛn ʋʋ tbhaa Zezi ɔˈ dhɛcɩain Etiɛnɩn ˈseiˈˈ dhi ˈsʋ ʋʋ ˈdhbhɔ ɔ, ɔ -ɲnain ˈbho ʋbʋ ˈˈbun -dhe ɔɔ yʋbʋ jha ŋmʋn.

ˈKlaa, ɛ se kletiɛn -ˈˈwe nɩan ˈo Zelizalɛmʋn anˈ ˈsʋ Sɔlɩ ɔ ˈbɔn ɔ ˈye ˈkle ˈˈdu -nɩn. Ɔ -ghwluɛ ˈe ˈsraazai- -klaaˈˈ bho ɔ ˈyeɔ Damasɩ dhbho -wɛeˈ ɔ ˈye kletiɛn -ˈˈwe nɩan ˈe kpʋn -ke. Sɔlɩ ɔ ˈˈkuan ˈˈkwiglɔ- -ˈnɔn in ɛn, ɔɔ ŋmʋan ˈe ˈsʋ nɛn -ŋwan ɔ ˈdhe bhoi ˈsʋ ɔ ˈgai. Ɔ ˈŋwɔn ghwlu dhueˈ -ʋn ˈnaan: ‘Sɔlɩ, dhɛɛdɩ- -man ˈˈdu ˈʋn ˈkle -ɛ?’ Sɔlɩ deeɛ dɩi ɔ ˈnaan: ‘Ɛ ɲɔnwɛ-?’ Ghwlu -ˈnʋn ˈnaan: ‘Ɛ ˈmɔn- Zezi. Mun Damasɩ ˈˈdhe ɲʋn ˈye ʋn dhɛ -ˈyea nʋn -tɔɔn.’ ˈSʋ Sɔlɩ ˈˈdhɔɔˈ. Ɲɔn kpʋɔn -jieˈˈ -wɛeˈ -ɔ -pɔɔ ˈdhe ˈˈkwiglɔ ˈdhi.

Kletiɛn dhueˈ -nɩn ˈo Damasɩ -dhe -ɔɔˈ ˈɲnɩn -nɩn Ananiasɩ. Ɔ ˈjheɛ ˈjheedhɛ- dhueˈ -ɛ ˈdhe ˈdhi Zezi -ghwlu ˈdhe ɔ bho ɔ ˈnaan: ‘Mun ˈdhe Zida ˈˈŋwɛn ˈdhe kpein- ɲʋn an ˈdhaa -Dhianfɔ bho dee- Sɔlɩ ɔˈ dɩ i.’ Ananiasɩ ˈnaan: ‘ˈBhlei-, ˈɩn ˈŋwɔn dɩ -duuˈˈ ˈdhe ˈˈjhu -ˈnɔn ɔnˈ dɩ ˈdhi! Ɔɔ poɛ -manˈ dhɛcɩaʋn -gazo ˈdhi!’ ˈKlaa Zezi ˈnaan: ‘Mun ˈdhe ɔ bho. ˈƖn za ˈo Sɔlɩ ˈmɛn ɔ ˈye -bɔyaˈˈ bo bhla ˈbhlʋɩ -duuˈˈ ˈdhii.’

Ananiasɩ ˈjhea Sɔlɩ ɛ, ɔ -ghwluɛ ˈdhe ɔ bho ɔ ˈnaan: ‘Sɔlɩ, ˈman ˈdhoudhi, Zezi dhbho ˈʋn ˈmɛn ˈnɔn -ɔn bho -wɛeˈ -ˈye i ˈjhe -dheeˈ ka.’ Ɔ gwɛa ghwluaˈ ˈsʋ Sɔlɩ ɔ ˈjheɛi. Ɔ ˈcɩan dhɩ -duuˈˈ ˈdhe Zezi ɔˈ dɩ ˈdhi ˈˈdhe ɔ ˈkpa dhɛcɩain-. Sɔlɩ -jhiiɛ- ˈˈnin zɔnˈ ˈˈdhe ɔ -nɩn kletiɛn -ˈˈwe -ˈnʋʋn -dee -bo -bhlaaˈ Zifʋ -ˈˈwe aˈ dhruigboogbi ˈdhii. -Naan ˈtɔ i ke aˈ: Zifʋ -ˈˈwe ˈjhea Sɔlɩ ɔɔ bhla Zezi ɔˈ bo ɛ, ɛ ˈˈmaan ʋbʋ -taiˈ! Ʋʋ ˈnaan: ‘Ɛ -se ˈˈjhu -ɔɔ kpʋan Zezi ɔˈ dhɛcɩaʋn -dhe ɛ?’

ˈDhe -zɩn taan ˈdhi ɛ, Sɔlɩ bhla bo ˈdhe ɲʋn nɩan ˈo Damasɩ bho. Zifʋ -ˈˈwe ˈɲɛn Sɔlɩ ˈmʋn ˈmɛn ˈˈdhe ʋa ˈbɔn ʋʋ ˈyeɔ ˈdhbha. ˈDhoudhi -ˈˈwe ˈŋwɩɩn ɛn, ʋʋ poɛ Sɔlɩ sʋn bho ɔ ye ple ɔ ye ˈo ˈghwlʋ. Ʋʋ deɔ ˈdhe -toɛˈˈ ˈdhi ʋʋ yeɔ ˈo ˈˈkwiglɔ- ɔˈ -ˈbhlo ɔˈ ˈbo ˈˈɩ -jhaa.

Sɔlɩ ɲnian Zelizalɛmʋn ɛn, ɔ ˈbɔn ˈdhoudhi -ˈˈwe i. ˈKlaa ʋbʋ a pleeɔ i. ˈSʋ ˈdhoudhiˈ dhueˈ nmɔan ɲʋn ˈkwa -ɔ ˈɲnɩn nɩan Baanabe ɛ, ɔ poɛ ˈdhoudhi -ˈˈwe sʋn bho ʋʋ yeɛ -gwlɩˈˈ de -ka Sɔlɩ ziian kplɩn ˈˈɩn ˈjɛɛn ɛn. ˈDhe -pɛɛikuɛ- ˈmʋn ɛn, Sɔlɩ -nɩn ɲɔnsoagbu- -nɩan ˈo Zelizalɛmʋn -dee -bo -bhlaaˈ ˈmɛn. Ɛɛ ˈbhɔɔa ˈbho ɛ, ɲʋn ˈdhɔɔ Pɔʋ.