“-Manˈ ˈbheɔglɔ ˈye jhi”

Zoova cɛn ghwlu ɔ ˈnaan: ‘-ˈˈVɩnghwlu -e ˈklejheɛ -e ˈghwɛ -e ˈmɛanˈ ˈse i -nɩn in ˈbhodhe. ˈMan muɛn ʋbʋ ˈˈmɩɩnin ˈˈjhrii -za. Dhɩsaɩn- nɩan tɛnˈˈ -dhe ɛ, ʋʋ ˈse ɩanˈ dɩ -glʋˈ bho -po i.’

Zoova poa Adan -e Ɛvʋ ˈbho Edɛnɩn -gle ˈdhi -dhe ɛ, ɔɔ ˈbɔn ʋʋ ˈye ˈkmʋn -nɩn ˈdhe ˈmʋnan -e ˈflɛ ˈmʋn -dhe. Ʋʋ ˈye ʋaˈ ˈˈBho nɩan ˈe jhaʋn ˈdhi ˈˈɲɩn ˈˈdhe ʋʋ ˈye ˈˈɲnuun ˈghwlʋ -wɛeˈ ʋʋ ˈye ˈbhlʋa ˈˈjhi -dhe. -Bho Adan -e Ɛvʋ ˈse Zoova ŋwɔn ˈjhe mɔn -dhe ɛ, dhɛ ɔɔ ˈbɔan ˈbho -deenanˈ -dhe ɛ, ɛ ˈse ˈˈɩ ziian-. Dhɛ ˈsɛɛ- nɛn tɔɔan -abʋ mɛn -nɩn, dhɩ aˈ klɛɛ ɩanˈ ghwlu ɔɔ cɛan, ɩan ɲnin ˈo ˈmɛn. Ɔɔˈ ˈbheɔglɔ ɔ muɛn ˈˈniman -duuˈˈ da ˈbhlʋa ˈˈkpe -jha, -ka ɔ nʋan ɛɛˈ ˈtmʋn sʋn ˈdhe Ablaamʋn bho ɛ.

ˈDhe nɔnˈˈ dhɛsaanˈˈ ˈdhi ɛ, Satan -e ɔɔˈ -ziisaɩn- -e ɲʋnsaɩn- anˈ klɛɛ ˈye i -zaa. Ɲʋn anˈ klɛɛ ɛ muɛn Zoova ˈˈɲɩn-. -A ˈse ˈghwɛ ˈkpa i ˈˈdhe -a ˈse ˈmɛn in ˈbhodhe. -Bho -aa sa ˈe ˈˈɲɩnɔn bho ˈghwlʋ ɛˈ, -a ˈye ˈkpɩ ˈbhle ˈˈdhe ˈkmʋnɩɩɛn ˈye -aaˈ ˈmʋnan ˈbhle. ˈBhlʋa ˈye -bɔyaˈˈ -deɩn ˈkpa. Ɲʋn anˈ klɛɛ ɛ muɛn dhiidhɩ ˈdhɔɛeˈ -dhi ˈˈdhe ʋa muɛn kupeɛˈ i -de ˈdhe ʋbʋ aˈ ˈˈjɛ ɛɛˈ -ˈˈgbu ˈdhi. Ɲʋn anˈ klɛɛ ɛ muɛn ɲʋn -dhɛdhɛ ˈbhle-. Ʋʋ ˈse ˈdhiŋwɔnɲnin in ˈˈdhe ʋʋ ˈse ŋwɔn -kman in. ˈKwladhiˈ nmiin ˈse ɲʋn in -bhlee dhi ˈˈdhe -a ˈsɩ i -plee dhi -ke.

-Zɔn Zoova a muan ɲʋn ˈmɛan ˈkmʋn dhe jha aˈ -dee ɛ, ɛɛ muɛn ˈmʋnan ˈbhle- ˈjɛɛn-. Ɲʋn -ˈˈɲɩan Ɲɔnsoa ˈdhe tɛnˈˈ kmʋn ˈdhi -ɛ nɩan Abɛlɩ -e Noe -e Ablaamʋn -e Sara -e Moizɩ -e Ritɩ -e Ɛsɩtɛɛ -e Davidɩ -e -ˈnʋʋn ɛn, -aa muɛn ʋbʋ -gblee. Ʋʋ -nɩn -aa muɛn dhbho -nʋn -dadhueˈ -wɛeˈ ˈbhlʋa ˈye -bɔyaˈˈ -dein- ˈkpa. -Aa muɛn dhbho ˈdhɔɛeˈ -duuˈˈ ˈbhle- jheejhee -a ˈye nʋn.

Zoova a ˈbɔn -ˈye ˈe -bɔyaˈˈ -dein- ˈdhi -nɩn. -Man muɛn dhɩ -duuˈˈ ˈcɩan- ˈdhe ɔˈ dɩ ˈdhi -ka ˈseɛ ˈtɔ i -naan kpɔ dhueˈ ɛ. ˈKpaa- Zoova i zɔn ooˈˈ zɔn ˈdhe -manˈ ˈkmʋn anˈ klɛɛ ˈdhi!