Zoova ˈnaan Zelemi mun ɔ ˈye bo bhla

Zoova -za ˈo Zelemi ɔ ˈye ɔɔˈ ghwlukwajhaai- -nɩn. Ɔ ˈnaan ɔ bhla bo ˈdhe ɲʋn ˈˈtiaˈˈ ˈdhe Zida bho. ˈˈDhe ɔ ˈyʋbʋ ˈtmʋʋn- ʋʋ ˈye dhɩsaɩn- ʋa nʋan bho ˈbhɔ. ˈKlaa Zelemi -ghwluɛ eˈ ɔ bho ɔ ˈnaan: ‘Zoova, ˈɩn -nɩɛn- ˈˈjhuzaan-, ˈɩn se ˈbhɛɛ- ˈye ˈe ˈcɛ -ˈnʋn bho -ghwlu.’ ˈˈDhe Zoova ˈnaan: ‘-Faʋn- anˈ nʋn ʋn -dhe, dhɛ -ˈyea ˈtmʋn ɛn, ˈman muɛn ʋn ˈtmʋʋn-. ˈˈDhe ˈman mʋɛn ʋn sʋn bho -po.’

Zoova -ghwluɛ ˈe Zelemi bho ɔ ˈnaan: ˈgboo- ˈcɛ ɛˈ ɲankɔʋn- dhi, -ghwaa- -jhae- dhi ˈbho ʋbʋ ˈˈjhibhaˈ ˈˈdhe -ˈyʋbʋ dɩ nɩn ˈtmʋʋn-: ‘-Ka -jhae- nɛn nʋan i -ghwaa- sʋn ɛn, ˈkamɔn- Zelizalɛmʋn ˈye i ghwaa-.’ Zelemi nʋan ˈdhɛ Zoova ˈtmʋn an, ɲankɔʋn- ˈkpa ˈcɛn. ˈSraazai- dhueˈ -ɔ ˈɲnɩn nɩan Pasuu poɔ ˈkpa -dhounˈˈ. ˈˈDhe ɔ ˈyeɔ dhɛsaʋn- ˈˈdhrui nʋn ɛn, ɔ poɛ ɔɔˈ bhɩ -e sɩn ˈdhe tu ˈdhi. Zelemi ˈse i zia- ˈdhe ˈˈmaʋnglu- aˈ ˈklɛɛ ˈdhi. Zɔn zɩan, Pasuu zeiɔˈ. ˈSʋ Zelemi ˈnaan: ‘Ɛ -kman anˈˈ -wɛ ˈbhla. ˈƖn ˈse -bo -bhla i -dheeˈ ka.’ ˈKlaa, ɔ ˈbhɔ -bo -bhla dɩ ˈmɛn? ˈˈƖɩn-. Ɔ -naan tɔˈ i ˈˈdhe ɔ ˈnaan: ‘-Ka nɛn nɩan, ˈkamɔn- Zoova aˈ ghwlu -nɩn ˈdhee ˈmʋn. ˈƖn ˈse ˈbhɛɛ- ˈye -bo -bhla dɩ ˈbhɔ.’ Ɛɛˈ dɩ ɔ kpa ˈcɛ ɛˈ -glʋˈ zela- ɲan.

-Zɩn -pla zia, ɲɔn -dhee -ˈnɔɔn ˈkpa ˈbheɔ ˈbho Zida -bhlʋa- ˈdhi. -Bo Zelemi ɔn bhla, ɔɔ ɲaan ˈsraazaʋn- -e ghwlukwajhaʋn- -saɩn- dhi. Ʋʋ -ghwluɛ ˈe ˈbheɔ ɔˈ ˈˈɲnuun bho ʋʋ ˈnaan: ‘ˈˈJhu nɔn ˈye ˈmɛn.’ ˈKlaa Zelemi -ghwluɛ ˈe ʋbʋ bho ɔ ˈnaan: ‘-Bho aʋ ˈdhbha ˈʋn ɛnˈ, ɛ nɩn ɲɔn ˈsea dhɛ nʋn aʋ ˈdhbha. Dɩ ˈman ˈtmʋan ɩan ˈghwlʋɛ ˈe Zoova bho, ɛ ˈse ˈman -ˈglʋdɩ -nɩn.’ ˈSʋ ˈbheɔ ɔˈ ˈˈɲnuun ˈnaan: ‘Ɲʋn ˈse ˈˈjhu nɔn ˈdhbha i.’

Zelemi kpa -bo -bhlaa ɲan ˈˈdhe ɛ ˈyea ˈo ˈbhɔɔ- ɔ, ˈbheɔ ɔˈ ˈˈɲnuun- ˈkpaˈcɛn. Ʋʋ ghwluɛ ˈe ˈbheɔ bho ɔ ˈye ɲʋn ˈtmʋʋn- ʋʋ ˈye Zelemi ˈdhbha. ˈBheɔ ˈnaan ʋʋ ˈbhɛɛ ʋʋ ˈye ˈdhɛ ʋa ˈbɔan Zelemi ˈˈdhrui nʋn. ˈBheɔ ɔɔˈ ˈˈɲnuun- ˈˈdhua- Zelemi mʋn ˈsʋ, ʋʋ ˈˈvilɔ ˈdhe ˈˈkaobhie- -gbauˈˈ ˈdhi, ˈnɔɔn- ˈpɔɔ ˈˈjhia -wɛeˈ ɔ ˈye ˈmɛn. Zelemi -dee glu -paaˈ ˈmɛn ˈdhe ˈpɔɔ ˈdhi.

Ebɛdɩmelɛkɩ -nɩɛn ˈbheɔ ɔˈ dhbhonʋʋn- anˈ dhueˈ -dhe. Ɔ muɛn ˈe ˈbheɔ bho ˈˈdhe ɔ ˈnaan: ˈBheɔ ɔˈ ˈˈɲnuun ˈˈvilɛ- Zelemi ˈdhe ˈˈkaobhie- -gbauˈˈ ˈdhi! -Bho ɔ ˈˈtaiɔ i ˈdhe mɔn ɔnˈ, ɔɔ muɛn ˈmɛn-.’ ˈBheɔ -ghwluɛ ˈe ɔ bho ɔ ˈnaan, ɔ ˈˈdhuo ɲmai aˈ -kwla taan ˈmʋn, ʋʋ -nɩn ɔ ˈye Zelemi ˈdhe ˈˈkaobhie- ˈdhi -za. -Ka -man nʋan ɛɛˈ ˈjhe sʋn kaan, -ka dɩ ˈjhe ɩn -nɩn mɔn -dhe ɛˈ, Zelemi ˈse -bo -bhla dɩ ˈbhɔ. ˈBhoo- -gwlɩˈˈ ˈdhee, -ka Zelemi nʋan ɛ se ˈkamɔn- -a ˈye nʋn -nɩn?