Zelizalɛmʋn -zaa i

Zida cɛ ˈbhɔ Zoova aˈ ˈˈɲɩn dɩ ˈmɛn -zɔn -nɔɔn ʋʋ ye -baadhɩ- ˈˈɲɩn. ˈDhe -zɩn -duuˈˈ ˈdhi ɛ, Zoova ˈdɩn ʋbʋ aˈ sʋn bho poaˈ ˈmɛn. Ɔ dhbhoɛ ghwlukwajhaaʋn- -duuˈˈ ʋʋ yʋbʋ -glʋˈ zela-. ˈKlaa ʋʋ ˈse ghwlukwajhaaʋn- -ˈnʋn -dheinˈˈ bho po. Ʋa -ghwlaa- ʋbʋ ˈmɛn. Kawɛ- Zoova nʋn -wɛeˈ ʋʋ -ɲnaan -baadhɩ- ˈˈɲɩɛn- in -ɛn?

Babilɔnɩn anˈ ˈbheɔ Nabukodonozɔɔ ɔ jhiIɛ ˈbhlʋɩ ˈdhii ɔɔ yea tʋ aˈ ˈˈdru kpa. Ɔ kpʋan Zelizalɛmʋn ˈbho -dee -ˈnan an, ɔ kpʋn ˈbheɔ Zoakɛn -e ˈbheɔ ɔˈ ˈˈɲnuun- -e tʋvɔʋn- -e ɲʋn ˈbhlea dhbho ɔˈ ˈsrɛ ˈˈdhe ɔ kpʋbʋ Babilɔnɩn. ˈˈGhwlii- -nɩan ˈe Zoova aˈ ˈˈgbu- -klaaˈˈ ˈdhi ɛ, ɔ ˈˈdhui ˈmʋn ˈmɛn -ke ɔ yɩ kpa. ˈBho ɛ ˈdhe ɛ, ɔ poɛ Sedesiasɩ ˈbheɔ ˈbho Zida.

ˈBho -dee -ˈnaan, Sedesiasɩ ɔ ˈjheɛ Nabukodonozɔɔ ŋwɔn. ˈKlaa ˈbhlʋi jhiɔ ˈdhei -e ghwlukwajhaaʋn- -saɩn ˈˈduɔˈˈ ˈsrɩn -wɛeˈ ɔ ˈye Babilɔnɩn anˈ ˈbheɔ ɔˈ ŋwɔn ˈjhe dɩ ˈbhɔ. Zelemi zelɔ -glʋˈ ˈmɛn ɔ ˈnaan: ‘-Bho ˈbhɔ ɔɔˈ ŋwɔn ˈjhe dɩ ɛˈ, tʋ a muɛn ˈkpa-, ˈmɩɛn -e -poadhɩ a muɛn -siie- da Zida.’

Sedesiasɩ -nɩan ˈbheɔ ɔ, ɛ nʋɛn -zɩn -ˈˈmaan -wɛeˈ ɔ -dee Babilɔnɩn anˈ ˈbheɔˈ ɔˈ ghwlu ŋwɔn -bhlaaˈ. Ɔ deeɛ- Ezipʋkɔʋn- anˈ ˈsʋlɩˈˈ sʋnbhopooɛ- i. Nabukodonozɔɔ jha ɔɔˈ ˈsʋlɩˈˈ ʋʋ ye Zelizalɛmʋn bho vɔn. ˈSʋlɩˈˈ -ˈnʋn bin glɔ ˈmɛn. Zelemi -zela Sedesiasi -glʋˈ ɔ ˈnaan: ‘Zoova ˈnaan -bho -to ˈo -manˈ ˈˈjɛ ˈdhe Babilɔnɩn anˈ ˈbheɔ bho ɛˈ, mɔn -e ɲʋn ˈˈtiaˈˈ da ˈˈkwiglɔ- nɔn ˈdhi a muɛn ˈkmʋn -sie-. ˈKlaa -bho se ˈo -manˈ ˈˈjɛ -to ɛˈ, Babilɔnɩnkɔʋn- an muɛn Zelizalɛmʋn ˈˈjhri -po ˈˈdhe ʋʋ ˈye ʋn -gazo ˈdhi po.’ Sedesiasɩ ˈnaan: ‘Ɩn ˈse ˈo ˈman ˈˈjɛ -to i!’

-Zʋn dhueˈ ˈdhe -dieˈˈ zia ˈsʋ ɛ, Babilɔnɩnkɔʋn- anˈ ˈsʋlɩˈˈ ghwa Zelizalɛmʋn anˈ bhloˈ ɔˈ ˈfɔ ˈdhue -wɛeˈ ʋʋ pa ˈo. Ʋʋ poɛ glɔ -e Ɲɔnsoa aˈ ˈˈgbu -klaaˈ ˈˈjhri. Ʋʋ ˈdhbha ɲʋn -duuˈˈ ˈˈdhe ʋʋ kpʋɛn ɲʋn anˈ ˈˈghwluu -ghwluu ʋʋ yʋbʋ -gazo ˈdhi kpa.

Sedesiasɩ ˈple ɔ ˈye ˈo Zelizalɛmʋn ˈghwlʋ, ˈklaa Babilɔnɩnkɔʋn bhla ˈo ɔ ˈdhe. Ʋʋ kpʋɔnˈ ˈbho Zeliko ˈˈbun ˈˈdhe ʋʋ kpɔ Nabukodonozɔɔ. Babilɔnɩn anˈ ˈbheɔ ˈdhbha Sedesiasɩ ɔˈ ˈˈɲnuun ˈmɛn ˈbho ɔɔˈ ˈˈjɛ ˈˈjhibhaˈ. ˈBho ɛ ˈdhe ɛ, ɔ ˈˈdhɔɔ- Sedesiasɩ ˈmɛn ˈˈdhe ɔ poɔ -gazo ˈdhi, ˈdhemɔn ɔ ˈmɛɛn-. ˈKlaa Zoova cɛn ghwlu ˈdhe Zida -cɛ bho ɔ ˈnaan: ‘-Bho zɩn anˈ 70 zi ɛˈ, ˈman muɛn aʋ da Zelizalɛmʋn dhe -jha.’

Ɲʋnjhae- ɲʋn kpa Babilɔnɩn ɛn, dhɛwɛ- -jhii ʋbʋ i -ɛ? Ʋʋ kpʋn ˈo Zoova ˈbun in ˈmɛn?