Ɲmai- -mɩɩnˈˈ ɲiɛn ˈjheɛ Zoova ŋwɔn

Nabukodonozɔɔ kpa ˈbheɔ ɔˈ ˈˈɲnuun nɩan Zida Babilɔnɩn, -wɛeˈ ɔ ˈtmʋʋn ɔɔˈ dhbhonʋɩn- dhueˈ -ɔɔˈ ɲnɩn nɩan Asɩpenazɩ ɔ ˈye ʋaˈ dɩ ˈˈdu. Ɔ ˈnaan ɔ ˈbɔn ɲmai -mɩɩnˈˈ -ʋʋ nmɔan ˈˈjhrii ˈˈdhe -ʋʋ -cɛanjhrii ˈdhe ʋbʋ ˈˈklu. Ɲʋn ˈyʋbʋ dhɛ -tɔɔn ˈdhe -zɩn taan ˈdhi ˈˈdhe ʋʋ ˈye ɲʋn -klaeˈˈ ˈkpa ˈbho Babilɔnɩn. Ʋʋ ˈye dhɛdhiizroɛ- -e ˈcrea -e Akadɩɛn ghwlu nɩan Babilɔnɩnkɔʋn anˈ ghwlu aˈ poaˈ ˈcɩan. ˈˈDhe ʋʋ ˈye dhiidhɩ- ˈbheɔ -e ɔɔˈ ˈˈgbuzɔncɛ ɛɛ dhia dhi. ˈDhe ʋbʋ ˈˈklu ɛ, ˈdhe -mɔn Daniɛ -e Anania -e Misaɛlɩ -e Azaria -nɩn. Asɩpenazɩ ˈˈɲɩɛnˈˈ ʋbʋ Babilɔnɩn -kɔʋn anˈ ˈɲnɩn: Bɛlisazaa -e Sadrakɩ -e Mesakɩ -e Abɛnego. Dhɩ ɲʋn an muan ɲmai -mɩɩnˈˈ -ˈnʋn -tɔɔn ɛn, ɩn ˈyeɛ nʋn ʋʋ ˈye Zoova ˈˈɲɩn dɩ ˈbhɔ?

Daniɛ -e ɔɔˈ ˈdhaiˈˈ -ˈˈwe nɩan taan an ˈbɔn ˈjɛɛn- ʋʋ ˈye Zoova ŋwɔn ˈjhe. Ʋʋ jhibhiˈ -ka ʋʋ ˈsea ˈbheɔ ɔˈ dhiidhɩ- -dhi i ɛ, dhɛ nɩan ˈo ɛ, dhɩ Zoova aˈ ˈtee ˈnaan ɲʋn anˈ dhi -dhe ɛ, ɩmɩn- ˈbheɔ ɔ dhi. ˈSʋ ʋʋ -ghwluɛ ˈe Asɩpenazɩ bho ʋʋ ˈnaan: ‘-Kɔngɩnˈ -manˈ ˈˈɲɩn -aʋ ˈbheɔ ɔˈ dhiidhɩ- -dhe.’ ˈKlaa Asɩpenazɩ ˈnaan: ‘-Bho aʋ ˈse ˈbheɔ ɔˈ dhiidhɩ dhi ˈˈdhe aʋ ˈkpa ˈghwɛ ɛˈ, ɔɔ mʋɛn ˈʋn ˈdhbha-!’

ˈSʋ tɔˈ dhueˈ ˈkpa ˈo Daniɛlɩ -gwlɩˈˈ. Ɔ -ghwluɛ- ˈe ˈˈjhu -ɔɔ dea ʋbʋ ˈdhei bho ɔ ˈnaan: ‘-Kɔngɩnˈ ˈˈɲɩn -aʋ dhɩŋwɩn -e ˈˈnin ɛnˈ ˈsʋ ˈdhe ˈghwɩ -bue- ˈdhi. ˈBho ɛ ˈdhe ɛ, -ˈmɛn -ŋmʋn -abʋ -e ɲmai- -ʋa- dhia ˈbheɔ ɔˈ dhiidhɩ jha.’ ˈˈJhu -ɔɔ dea ʋbʋ ˈdhei ˈŋwɔɔn- ɛɛˈ dhɛ tu ˈmɛn.

ˈGhwɩ -bue- zɩa, Daniɛ -e ɔɔˈ dhaiˈˈ -ˈˈwe nɩan taan -flɔn ku ˈzɔn in ʋʋ ye ɲmai- sia ˈo -zii. ˈMʋnan an nʋn Zoova ˈmɛn dhɛ ʋʋ ˈjheɔ ŋwɔn ɛɛˈ dɩ. Ɔ ˈˈɲɩɛnˈˈ Daniɛ ˈtɔdhinɩɛn- -wɛeˈ ɔ ˈye jhɩ -e ˈjheedhɩ i ˈŋwɔn.

Ɲʋn gwɛa ʋbʋ dhɛ -tɔɔn -ˈnan an, Asɩpenazɩ kpʋbʋ ˈbho Nabukodonozɔɔ bho. ˈBheɔ -nɩn Daniɛ -e Anania -e Misaɛlɩ -e Azaria -ghwluˈ. Ɔ ˈjheɛ ˈˈkpei -ka ʋʋ -cɛan ˈˈjhrii ʋʋ -ziia ɲmai- aˈ klɛɛ sia ˈo ɛ. Ɔ za ˈo ʋbʋ ˈmɛn ʋʋ ˈye dhbho nʋn ˈdhe ɔɔˈ ˈbheɔgbu ˈdhi. -Bho ɔ ˈye dhɛ kɔandɩ nʋn -zɔn ˈnɔɔn ɔnˈ, ɔɔ deeɛ- ʋbʋ ˈsrɩn in. Zoova nʋɛnˈ ʋʋ ye tɔˈ ˈdhi -nɩn ɛ ye jhriinʋʋn -e ˈbheɔ ɔˈ ˈtɔdhinʋʋn anˈ klɛɛ -zii.

-Bho Daniɛ -e Anania -e Misaɛlɩ -e Azaria -nɩn ˈe ˈdhebhaˈ mɔn -dhe ɛˈ, ʋʋ ˈse ˈˈmae- -ka ʋʋ nɩan Zoova aˈ dhbhonʋʋn- ɛn. ˈˈDhe mɔn ˈdhe, -bho -manˈ ˈcɛ se i ˈˈkʋan- anˈ, -man muɛn ˈo Zoova ˈˈbun in -kpʋn?