ˈBheɔglɔ- -ɔɔˈ ɲʋnbhleɛ sea ˈˈtianˈˈ ˈbhle ɛ

ˈDhe ˈˈmaʋnglʋ- dhueˈ ˈdhi ɛ, ˈBheɔ Nabukodonozɔɔ -jha jha dhueˈ -ɔ ˈbhle -faʋn-. Ɛ nʋɛnˈ ɔ se ˈbhɛɛ- ɔ ˈye ˈmʋn. Ɔ ˈdha ɔɔˈ jhriinʋʋn- ˈˈdhe ɔ -ghwluˈ ˈdhe ʋbʋ bho ɔ ˈnaan: ‘Aʋ zela ˈman jha -ˈnɔn ˈˈkpei.’ Ʋʋ ˈnaan: ‘ˈTmʋʋn -abʋ -manˈ jha -ˈnɔn ɔnˈ dɩ, Oo ˈbheɔ.’ ˈKlaa Nabukodonozɔɔ ˈnaan: ‘ˈˈƖɩn-! Aʋbʋ ˈye ˈʋn ˈman jha aˈ dɩ ˈtmʋʋn-. -Bho aʋ seɛ nʋn ɛnˈ ˈye aʋ ˈdhbha.’ Ʋʋ ghwluɛ ˈe ɔ bho -kenɛnˈ ʋʋ ˈnaan: ‘-Bho ˈtmʋʋn- -abʋ -manˈ jha aˈ dɩ ɛˈ, dhɛ ɔ ˈdha a, -aa muɛn ɛɛˈ dɩ ˈtmʋn-.’ Ɔ ˈnaan: ‘Aʋa ˈbɔn aʋ ˈye ˈʋn ˈˈsrɛ i -poo. Aʋ ˈtmʋʋn- ˈmʋn ˈman jha aˈ dɩ!’ Ʋʋ ghwluɛ ˈe ˈbheɔ bho ʋʋ ˈnaan: ‘-Glɔɲiɔn- ˈyea ɛɛˈ dhɛ tu nʋn ɔ se -nɩn. Dhɛ -man deea i se ˈbhɛɛ- ɛ ˈye -nʋʋɛn-.’

Nabukodonozɔɔ ˈkpa ˈcɛn ˈjɛɛn- ˈsʋ ɔ ˈnaan ɲʋn ˈdhbha ˈtɔdhinɩʋn nɩan ˈo ˈbhlʋa ˈdhi aˈ klɛɛ. -ˈMɛn ɲʋn ˈye Daniɛ, Sadrakɩ, Mesakɩ, -e Abɛnego ˈdhbha -ke. Daniɛ deeɛ- ˈbheɔ nɔnˈˈ -dhɛzaan in. ˈSʋ ɔmɔn -e ɔɔˈ dhaiˈˈ -ˈˈwe bhaeɛ- Zoova -wɛeˈ ɔ ˈyʋbʋ sʋn bho po. Dhɛwɛ- Zoova nʋn -ɛn?

ˈDhe jha ˈdhi ɛ, Zoova -tɔɔɛn- Daniɛ Nabukodonozɔɔ ɔˈ jha ɛmɛn- -e dhɛ jha -ˈnɔn ˈdha -e. Zɔn zɩan, Daniɛ muɛn ˈe ˈbheɔ ɔˈ dhbhonʋin bho ˈˈdhe ɔ ˈnaan: ‘-Manˈ ˈdhbha -e ˈtɔdhinɩʋn- nɩan da ˈbhlʋa nɔn ˈdhi -dhe. ˈƖn ˈbhɛɛˈ ˈye ˈbheɔ ɔˈ jha ˈˈkpei zela-.’ Dhbhonʋin kpa Daniɛ ˈbho Nabukodonozɔɔ ˈˈjhibhaˈ. Daniɛ -ghwluɛ ˈe ˈbheɔ bho ɔ ˈnaan: ‘Dhɩ -ɩan muan -nʋʋɛn- ˈdhe ɲan -mɩn Ɲɔnsoa -tɔɔn mʋn. ˈDhe -manˈ jha ˈdhi ɛ, -jheɛˈ -baadhɛ- -klaaˈˈ dhueˈ. Ɛɛˈ ˈˈdhru -nʋʋɛn ˈsanʋn, Ɛɛˈ duu -e ɛɛˈ sɩn -nʋʋɛn ˈghwɛi. Ɛɛˈ ˈˈkwli -e ɛɛˈ ˈˈkpau -nʋʋɛn ˈˈnman. ˈˈDhe ɛɛˈ bhɩ -nʋʋɛn nɩɩɛn -e mɛn. ˈSouˈˈ dhueˈ ˈghlʋ ˈe trʋ ˈˈkpe -ʋn bhla -baadhɛ- ɛˈ bhɩ. -Baadhɛ- ˈkpa -gbuɔˈˈ pʋɔˈ ɔ kpa. ˈSouˈˈ -ˈnʋn ˈkpa trʋ -klaaˈˈ -ʋn ˈˈjhi ˈbhlʋa aˈ klɛɛ.’

ˈˈDhe Daniɛ de ˈo -kenɛnˈ ɔ ˈnaan: ‘Dhɛ -manˈ jha ˈdha a ɛ ka: -Baadhɛ- ɛˈ ˈˈdhru -nʋʋan ˈsanʋnˈ ɛn, ɛ nɩn -manˈ ˈbheɔglɔ-. ˈGhwɛi ɛ, ɛ nɩn ˈbheɔglɔ- -ɔɔ muan -jhi ˈbhoo- ˈdhe ɛ. ˈˈNman an, ɛ nɩn ˈbheɔglɔ- -ˈnɔɔn -ɔ ˈye ˈbhlʋa aˈ klɛɛ ˈbhle -ke. ˈBheɔglɔ- -ɔɔ muan ˈo -tbha a, ɔɔ muɛn ˈˈɩkman- -ka nɩɩɛn nɩan. -Bho ɛɛ sa ˈo ˈbhɔɔ ɔˈ, ˈbheɔglɔ- -ˈnɔɔn ɔn muɛn -jhi -ɔ ˈye ˈfɛ ˈghwlʋ. Ɔɔˈ ˈfɛ -ˈnɩɩn ˈye i ku -ka nɩɩɛn nɩan ˈˈdhe ˈfɛ -ˈnɩɩn ˈse i -ku i -ka mɛn nɩan. ˈSouˈˈ ˈghwlʋa ˈe trʋ ˈˈdhru ɛ, ɛ nɩn Ɲɔnsoa aˈ ˈBheɔglɔ-. Ɔ muɛn ˈbheɔgwlɛ- -ˈnɩn anˈ klɛɛ i -ghwaa- ˈˈdhe ɔɔˈ ɲʋnbhleɛ ˈse ˈˈtianˈˈ ˈbhle i.’

Nabukodonozɔɔ poɛ ˈkɔi glu ˈbho Daniɛ ˈˈjhibhaˈ, ɔ poɛ ˈˈjhibha ˈbho ˈbhlʋɔ-. Ɔ ˈnaan: ‘-Manˈ Ɲɔnsoa -tɔɔn mʋn ˈman jha ˈmɛn. Gela -nɩn ɔ ˈyea gʋɔ- ɔ, ɔ se -nɩn.’ ˈBheɔ Nabukodonozɔɔ ˈse Daniɛ ˈdhbha. Ɔ poɔ ˈˈdhrujhei- ˈbho ˈtɔdhinɩʋn anˈ klɛɛ ˈdhru ɛmɛn- -e ˈbho Babilɔnɩn -bhlʋa- aˈ ˈfɔ dhueˈ ˈˈkpe. -Ka Zoova nʋan Daniɛ ɛˈ bhaeghwlu ˈŋwɔɔn- sʋn ɛn, -ˈjheɛ ˈˈkpei ˈmɛn?