Ʋʋ ˈse ˈkɔi glu po

ˈBheɔ Nabukodonozɔɔ ˈjhea -baadhɛ- -klaaˈˈ ˈdhe ɔɔˈ jha ˈdhi ɛ, ɔ ˈˈdhuɛ- ˈsanʋnˈ ˈmʋn ɔ ye -baadhɛ- -klaaˈˈ dhueˈ nʋn. Ɔ -ɲnɛɛn dhi ˈdhe Dura aˈ -doʋnˈˈ ˈdhi ˈˈdhe ɔ ˈdha ɲʋn kɔandɩ ˈbho ɔɔˈ ˈbhlʋa ˈdhi -ʋʋ ˈdhe ˈˈklu Sadrakɩ -e Mesakɩ -e Abɛnego nɩan, ʋʋ ˈye i ˈgboo- ˈbho ɛ ˈˈjhibhaˈ. ˈBheɔ ˈnaan: ‘-Bho aʋ ˈŋwɔn -gaʋn- -e -ziplʋ -e -vʋɔˈ ɔˈ ghwlu ɛˈ, aʋ po ˈkɔi glu ˈbho -baadhɛ- ˈˈjhibhaˈ! Ɲɔn ooˈˈ ɲɔn ˈsea ˈkɔi glu -po i ˈbho -baadhɛ- ˈˈjhibhaˈ a, ɲʋn an muɔn ˈe nɛn ˈmʋn -po.’ Eble -ɲmai- -mɩɩnˈˈ nɩan taan, ʋaˈ muɛn ˈkɔi glu -po ˈbho -baadhɛ- ˈˈjhibhaˈ -aeˈˈ ʋʋ ˈye Zoova aˈ ˈsʋ ˈˈɲɩn?

ˈSʋ ˈBheɔ ˈnaan ˈbhleʋn -dee dhɩ -bhlaaˈ. Ɲʋn anˈ klɛɛ poɛ ˈkɔi glu ʋʋ ye -baadhɛ- ˈˈɲɩn. Sadrakɩ -e Mesakɩ -e Abɛnego ɔˈ ˈsʋ ˈse ˈkɔi glu po. Ɲʋn ˈjhʋbʋ -ʋʋ ˈtmʋʋn ˈBheɔ -ʋʋ ˈnaan: ‘Eble -ˈˈwe taan nʋn ˈse ˈbɔn ʋʋ ˈye -manˈ -baadhɛ- ˈˈjhibhaˈ -gbɛɛ.’ Nabukodonozɔɔ ˈnaan ɲʋn jhʋbʋ ˈbho ɔ ˈˈjhibhaˈ ˈˈdhe ɔ ˈnaan: ‘ˈYeɛ dhe -za ˈyeɛ nʋn -kenɛnˈ. -Bho aʋ se -baadhɛ- ˈˈɲɩn ɛnˈ, ɲʋn ˈye aʋ ˈˈvile- ˈdhe nɛn -ˈŋman -klaaˈˈ ˈdhi. Ɲɔnsoa -ɔ ˈyea aʋ zeie- ˈdhe ˈe ˈkwa a, ɔ se -nɩn.’ Ʋʋ ˈnaan: ‘-A ˈseɛ ˈbɔn mɔn -ˈyeɛ dhe -za -kpɛ ˈsɔɔn. -Aaˈ Ɲɔnsoa ˈbhɛɛˈ ɔ ˈye -aʋ ˈpʋʋ-. ˈˈDhe -bho ɔ ˈseɛ nʋn mɔn -dhe ɛˈ, Oo ˈBheɔ, -a ˈse -baadhɛ- ˈˈjhibhaˈ -gbɛɛ i.’

Nabukodonozɔɔ ˈkpa ˈcɛn ˈjɛɛn-. Ɔ -ghwluɛ- ˈe ɔɔˈ dhbhonʋʋn- bho ɔ ˈnaan: ‘Aʋ po nɛn -ˈŋman -ˈnɔn ɔnˈ nɛn ˈˈkpe kpɛ -ˈˈmɛsɔnˈ!’ ˈBho -ˈmɛn ˈdhe ɛ, ɔ ˈtmʋʋn- ɔɔˈ ˈsʋlɩˈˈ ˈmɛn ɔ ˈnaan: ‘Aʋ san ɲʋn nʋn aʋ ˈyʋbʋ ˈdhe nɛn -ˈŋman ˈmʋn po!’ ˈSʋlɩˈˈ -ˈnʋn an ˈˈkʋʋain nɛn -ˈŋman -ˈnɔn in ɛn, ɛ ziɛ nɛnˈ ɛ ye -jieˈˈ zi ˈsʋ ʋaˈ klɛɛ ˈmɛɛn. Eble -ˈˈwe nɩan taan -ˈga i ˈdhe nɛn -ˈŋman -ˈnɔn ˈdhi. ˈKlaa Nabukodonozɔɔ ŋmʋan ˈe nɛn -ˈŋman ˈdhi ɛ, ɔ ˈjheɛ ɲʋn ɲiɛn -ʋa- nan ˈdhe nɛn ˈmʋn. -Faʋn an nʋɔnˈ. Ɔ deeɛ- ɔɔˈ dhbhonʋʋn dhi ɔ ˈnaan: ‘Ɛ -se ɲʋn taan -a po ˈe nɛn -ˈŋman ˈmʋn? ˈMan ˈjheɛ ɲʋn ɲiɛn ˈˈdhe ʋaˈ dhueˈ gɔ dhbhoozuu-!’

Nabukodonozɔɔ ˈˈkʋʋan- nɛn -ˈŋman in ˈˈdhe ɔ -ghwlu ˈe ʋbʋ bho ɔ ˈnaan: ‘Aʋ ˈˈsi zɔnˈ, aʋbʋ Ɲɔnsoa nɩan ˈe ˈˈjha aˈ -da tɛan anˈ dhbhonʋʋn-!’ Ɲʋn anˈ klɛɛ ˈjhea Sadrakɩ -e Mesakɩ -e Abɛnego ʋa ˈghwlʋa ˈe nɛn -ˈŋman ˈmʋn ɛn, taiˈ ˈˈmaan ʋbʋ ˈmɛn. Ʋaˈ ku -e ʋaˈ ˈˈmɩɩn -e ʋaˈ ˈmʋnpaadhɩ- ˈse sin ˈˈdhe nɛn ɛnˈ ˈnʋn mɔn se ˈbho ʋbʋ ˈˈbun -nɩn.

Nabukodonozɔɔ ˈnaan: ‘Sadrakɩ -e Mesakɩ -e Abɛnego ɔˈ Ɲɔnsoa ˈbhɛ ˈˈɩ. Ɔ dhbhoɛ ɔɔˈ dhbhoozuu- -wɛeˈ ɔ zeie- ʋbʋ. Ɲɔnsoa -nɩn ɔ ˈyea dhɛ dhueˈ -nɩn ɔ se -nɩn.’

-Ka Eble -ˈˈwe taan -ˈnʋn nʋan, -man ˈbɔn -ˈye ˈo Zoova ˈˈbun in kpʋn -ka dɩ ˈˈjhe ɩn -nɩn mɔn -dhe ɛˈ?