ˈBheɔglɔ- gwɛa tu -klaaˈˈ a

ˈDhe ˈˈmaʋnglʋ- dhueˈ ˈdhi ɛ, Nabukodonozɔɔ -jha jha -ɔ ˈbhle -faʋn-. Ɔ ˈdha ɔɔˈ ˈtɔdhinɩʋn -wɛeˈ ʋʋ ˈye jha -ˈnɔn ˈˈkpei zela ˈklaa ʋʋ se ɛɛˈ nʋanˈ ˈbhɛɛ-. Ɛɛ ˈbhɔɔ ˈbho ɛ, ɔ ˈdha Daniɛ.

Nabukodonozɔɔ -ghwluɛ- ˈe Daniɛ bho ɔ ˈnaan: “ˈDhe ˈman jha ˈdhi ɛ, ˈɩn ˈjheɛ tu dhueˈ. Tu -ˈnʋn ˈbhɛ ˈˈɩ ˈjɛɛn ˈsʋ ʋn ye ˈe jhaʋn ˈdhi ɲnin. -Da ooˈˈ da ɲɔn -nɩn da ˈbhlʋa ˈˈkpe ɛˈ, ɔ ˈbhɛɛˈ ɔ ˈye tu -ˈnʋn ˈjhe -dhe. Ʋanˈ ŋwɩn -nmɔn ˈˈjhrii ˈˈdhe ʋn poɛ ˈˈbhi -duuˈˈ. Nmiian an jhiɛ -fɔanˈ ˈbho ʋanˈ vli ˈzɔn ˈˈdhe nɩmɩn an poɛ ˈdhro ˈdhe ʋanˈ ˈdhae jha. ˈSʋ dhbhoozuu- dhueˈ -ghwlʋˈ ˈe jhaʋn ˈdhi -ʋn ˈˈsi i -ʋn ˈˈghwɔ -ʋn ˈnaan: ‘Aʋ dhbha tu -ˈnʋn -ˈmɛn aʋ cɛn ʋanˈ ˈdhae-. ˈKlaa aʋ ˈˈtai- ʋanˈ -zooˈˈ -e ʋanˈ ˈsɩn in ˈdhe glu ˈˈdhe aʋ bhlʋ ˈˈnman -e nɩnɛn -ˈgbla ˈdhi. Tu -ˈnʋn anˈ -pɛɛ nɩan ɲiɔn -pɛɛ -dhe ɛ, ɛ ˈye nmiin ɛnˈ -pɛɛ ˈkpa ˈˈdhe ɛ ˈye kaˈ -sie- ˈsʋ ˈdhe nɔnˈˈ -ˈˈmɛsɔnˈ ˈdhi. Ɲʋn anˈ klɛɛ ˈyɩ jhibho- -ka Ɲɔnsoa nɩan ˈˈdhrujhei- ˈˈdhe ɔ ˈbhɛɛa ɔ ˈyea ˈBheɔglɔ ɲɔn ɔɔ ˈbɔan ˈˈɲɩn ɛn.”’

Zoova ˈtmʋʋn Daniɛ dhɛ jha -ˈnɔn ˈdha a ˈmɛn. -Faʋn -dee Daniɛ ɛˈ nʋanˈ ˈmɛn. Ɔ -ghwluɛ ˈe Nabukodonozɔɔ bho ɔ ˈnaan: “Oo ˈbheɔ, ˈman ˈbɔn -dhe jha -ˈnɔn ˈye ˈe -ˈman ˈmʋnɲɛʋn bho ˈdha -dhe ˈklaa -mɔn ɔ ˈdha ˈe bho. Tu -klaaˈˈ ɲʋn dhbha a, ɛ nɩn -mɔn. -Manˈ ˈbheɔglɔ ɔ muɛn ʋn ˈkwa ˈghwlʋ- ˈˈdhe -ˈye -peiˈˈ ˈˈdhrui dhi -ka nmiin ɛn nʋan. ˈKlaa dhɛ dhbhoozuu- ˈnaan ɲʋn ˈˈtai tu -ˈnʋn anˈ -zooˈˈ -e ʋanˈ ˈsɩn in ˈdhe glu ɛ, -man muɛn ˈbheɔ ˈkpa- -kenɛnˈ.”

-Zʋn dhueˈ zia, Nabukodonozɔɔ ɔ nan in ˈbho ɔɔˈ ˈbheɔgbu ˈˈjhibhaˈ -wɛeˈ ɔɔ ŋmʋʋn Babilɔnɩn ˈˈkpei ˈˈdhe ɔ ˈnaan: “ˈˈKwiglɔ- nɔn -nmɔn ˈˈjhrii ˈjɛɛn-! ˈˈDhe ɛ nɩn ˈmɔn- poɔ! Ɲɔn -ˈyea ˈʋn -zii- ɔ se nɩn!” Ɔ ˈˈsiaˈˈ ghwluaˈ a, ghwlu dhueˈ -ghwlʋˈ ˈe jhaʋn ˈdhi -ʋn ˈnaan: “Nabukodonozɔɔ! Ɛ -gwɛ jha: -Manˈ ˈbheɔglɔ ˈghwlʋɛ ʋn ˈkwa.”

ˈSʋ Nabukodonozɔɔ ˈkpa sɩnan ˈˈjhri. -Ka ˈkwladhiˈ -nmiin nɩan ˈkamɔn- ɔ ˈkpa. Ɲʋn zɔ ˈdhe ɔɔˈ ˈbheɔgbu ˈdhi. ˈDhe nmiian ˈˈklu -mɔn ɔ ˈˈti. Ɔɔˈ ˈˈmɩɩn -tɛn in -bho ˈjhe -ˈnan jiiˈˈ ɛˈ nain- ˈˈdhe ɔɔˈ -jikɔin- -ˈnan nɩmɩn an -jikɔin-.

-Zɩn -ˈˈmɛsɔnˈ zia, Nabukodonozɔɔ ɔˈ ˈˈdhru ˈdhi ˈkpa ta aˈˈ -ka ɔ nɩan -dhe ɛ ˈˈdhe Zoova poɔ Babilɔnɩn anˈ ˈbheɔ. ˈSʋ ɔ ˈnaan: “ˈMan bhleeɛ Zoova bho, jhaʋn anˈ ˈBheɔ. -Kaan bhla ˈɩn jhibhiˈ -ka Zoova nɩan ˈˈdhrujhei- ɛ. Ɲʋn -ʋa- ˈbhɛɛa ʋaˈ ˈˈjɛ ˈˈɩ ɛ, ɔɔ jhʋbʋ jha ˈˈdhe ɲɔn ɔɔ ˈbɔan -mɔn ɔɔ ˈˈɲɩn ˈbheɔglɔ.”