Ghwlu -ˈcreeɛ- ˈbho ˈˈgbu -gwlɩˈˈ

Kaan ka bhla, Balɩtazaa mɔn -nɩn ˈbheɔ ˈbho Babilɔnɩn. -Zɔn dhueˈ ˈsʋ ɛ, ɔ ˈdha ɲʋn anˈ ˈˈghwlu dhueˈ -ʋʋ kɔan dɩ ˈbho ɔɔˈ ˈbhlʋa ˈdhi ˈbho fɛtɩ dhueˈ ˈmʋn. Ɔ ˈtmʋʋɛn- ɔɔˈ dhbhonʋʋn- ʋʋ ˈyeɔ ˈˈgain- -nʋʋan ˈsanʋnˈ Nabukodonozɔɔ -za ˈe Zoova aˈ ˈˈgbu ˈdhi -jha. Balɩtazaa -e ɲʋn jhia ɔɔˈ fɛtɩ ˈmʋn ˈnaan- ˈˈgain -ˈnɩn ˈdhi ˈˈdhe ʋʋ ˈbhɛɛ ʋaˈ gɩlɩ ˈˈɩ. Ʋʋ nʋan ka -dhe ɛ, sʋn dhueˈ ˈghwlʋ ˈˈdhe -ʋn -dee ˈcreea ˈbho ˈˈgbu -gwlɩˈˈ -da ʋa dhiia dhɛ.

-Faʋn an nʋn Balɩtazaa ˈmɛn. Ɔ ˈdha ɔɔˈ jhriinʋʋn- ˈˈdhe ɔ cɛn ghwlu ˈdhe ʋbʋ bho ɔ ˈnaan: ‘Ghwlu ˈcreea ˈbho ˈˈgbu -gwlɩˈˈ ɛ, ɲɔn -ɔɔ mun ˈdhii -zro ˈˈdhe dhɛ ʋn ˈdhaa -ɔɔ muɛn ˈˈkpei zela- a, ˈman muɛn -nʋn ɔ ˈye ɲʋn ˈbhlea ˈˈɩkman- da Babilɔnɩn ʋaˈ taan nɔn -nɩn.’ ˈKlaa jhriinʋʋn- anˈ dhueˈ ka ˈse ˈbhɛɛ- ɔ ˈye ghwlu ˈcreea ˈbho ˈˈgbu -gwlɩˈˈ ˈˈkpei zela-. ˈSʋ ˈbheɔ ɔˈ ˈdhou paˈ ˈˈdhe ʋn ˈnaan: ‘ˈˈJhu dhueˈ -nɩn ˈo -ɔɔˈ ˈɲnɩn nɩn Daniɛ -ɔɔ zela dhɩ ˈˈkpei ˈdhe Nabukodonozɔɔ bho -dhe. Ɔ ˈbhɛɛˈ ɔ ˈye dhɛ ghwlu nʋn ˈdhaa ˈˈkpei zela-.’

Ɲʋn ˈdha Daniɛ ˈmɛn ɔ ye ˈo ˈbheɔ ˈˈjhibhaˈ jhi. Balɩtazaa -ghwluɛ ˈdhe ɔ bho ɔ ˈnaan: ‘-Bho ˈbhɛɛ -ˈye ghwlu nʋn ˈdhii zro ˈˈdhe -ˈyʋ ˈˈkpei zela aˈ, ˈman muɛn ʋn -ˈblʋnpodhɛ- -nʋʋan ˈsanʋnˈ -blʋnˈ -po ˈˈdhe ˈyeɛ nʋn -ˈye ɲʋn ˈbhlea ˈˈɩkman- da Babilɔnɩn ʋaˈ taan nɔn ˈkpa.’ Daniɛ ˈnaan: ‘ˈƖn ˈse -ˈman -baanˈ- ˈbɔn. ˈKlaa ˈman ye ghwlu -ˈnʋn ˈˈkpei zela-. -Manˈ ˈˈbho Nabukodonozɔɔ ˈbhɛɛ ɔɔˈ ˈˈjɛ ˈˈɩ ˈˈdhe Zoova -jhɔ jha. Jhibho- dhɩ aˈ klɛɛ jhiiɔ i ˈmɛn, ˈklaa ˈse Zoova ŋwɔn ˈjhe ˈsʋ -ˈˈgain- -nʋʋan ˈsanʋnˈ -ɩn ˈghwlʋa ˈdhe ɔɔˈ ˈˈgbu ˈdhi ɛ, -man ˈnaaɩn divɛn ˈdhi. Ɛmɛn- dɩ Ɲɔnsoa ˈcre ghwlu nʋn: Mene, Mene, Tekɛlɩ -e Paasinɩn. Dhɛ ghwlu -ˈnɩn ˈdhaa ɛmɛn- -nɩn Mɛdɩ -e Pɛsɩkɔʋn an muɛn Babilɔnɩn -kpʋn ˈˈdhe ˈse ˈbheɔ -nɩn in ˈbhodhe.’

-Bho ˈjhe Babilɔnɩn -ˈnaan ˈˈkwiglɔ- ɲʋn se ˈbhɛɛ- ɲʋn ˈye kpʋn. Ɔ -pooɛ -bhleˈ -klaeˈˈ ˈdhei ˈˈdhe ˈˈnin biɔnˈ. ˈKlaa ˈdhe ˈˈmaʋnglʋ- nɩan dhueˈ ˈdhi ɛ, Mɛdɩ -e Pɛsɩkɔʋn jhiɛ ˈˈkwiglɔ- -ˈnɔn bho -vɔanˈ. Pɛsɩkɔʋn anˈ ˈBheɔ Sirisɩ -zaa ˈˈnin jieˈ -wɛeˈ ɔɔˈ ˈsʋlɩˈˈ ˈye ˈbho ɛ ŋwɔn -cɛɛn ˈˈdhe ʋʋ ˈye ˈˈkwiglɔ ɔˈ -kwli -jhɛɛ. Ʋʋ ɲnian ˈo ɛ, -kwli ˈse ˈˈŋwɛn -kaan! ˈSʋlɩˈˈ pa ˈo ˈmɛn ʋʋ ye glɔ kpʋn ˈˈdhe ʋʋ ye ˈbheɔ ˈdhbha. Sirisɩ ˈkpa ˈbheɔ bhla ˈbho Babilɔnɩn.

Ɛ ˈsea -zʋn dhueˈ nʋn ˈsʋ ɛ, Sirisɩ poɛ ghwee- ɔ ˈnaan: ‘Zoova ˈtmʋʋn- ˈmʋn ˈmɛn ɔ ˈnaan ˈɩn po ɔɔˈ ˈˈgbu nɩan Zalizalɛmʋn ˈkpa. Ɲɔn ooˈ ɲɔn ˈdhe ɔɔˈ ˈcɛ ˈˈklu -ɔɔ ˈbɔɔan -ɔ ˈyea -ˈˈgbu ˈkpa -po -dhbho sɩn ˈdhei de ɛ, ɔ ˈbhɛɛˈ ɔ ˈye mun.’ Zelizalɛmʋn zaa dhi ɛ, -zɩn anˈ 70 zia, Zifʋ -ˈˈwe muɛn ˈdhe ʋaˈ ˈbhlʋa ˈdhi dhe -ka Zoova nʋan ɛɛˈ ˈtmʋn sʋn ɛn. -ˈˈGain ɲʋn -nʋʋan ˈsanʋnˈ -e ˈghwɛi ˈmʋn ɩmɩn -e dhɩ -ˈnɩɩn Nabukodonozɔɔ -za ˈe Zoova aˈ ˈˈgbu ˈdhi ɛ, Sirisɩ nʋɛnˈ ɲʋn yɩ dhe kpa. -Man ˈjhe -ka Zoova nʋan Sirisɩ i -jhii sʋn ˈˈdhe ɔ poa ɔɔˈ ˈcɛ sʋn bho ˈmɛn?