Ɲʋn -ˈˈvilɛ Daniɛ ˈdhe -blae- aˈ ˈˈbhieˈˈ ˈdhi

Mɛdɩkɔin- Darisɩ -nɩɛn ˈbheɔ -ke -dhe ˈbho Babilɔnɩn. Ɔ ˈjheɛ ˈˈkpei -ka Daniɛ nɩan ɔɔˈ -nɛn ka. Ɛmɛn- dɩ ɔ poɔ ˈˈdhrujhei- ˈbho ɲʋnbhleʋn nɩan ˈo Babilɔnɩn ˈˈdhru. Ɲʋnbhleʋn -ˈnʋn anˈ -pɛɛ ɛ ˈˈghweeɛ Daniɛ ˈˈɩ ˈˈdhe ʋa ˈbɔn ʋʋ ˈyeɔ dhɛsaʋn ˈˈdhrui nʋn -dhe. Ʋʋ jhibhiˈ -ka Daniɛ ɛ bhaea Zoova -kpɛ taan ˈdhe zɔn ˈdhi ɛ, ɛɛˈ dɩ ʋʋ ˈtmʋʋn Darisɩ ʋʋ ˈnaan: ‘Ooˈbheɔ, ɲʋn ˈye ˈo ˈtee i de -wɛeˈ ɲʋn anˈ klɛɛ ˈye -manˈ ˈsʋ bhae-. Ɲɔn ooˈˈ ɲɔn -ɔɔ muan ˈtee -ˈnɛn ŋwɔn -bhlaa a, ɲʋn ˈyeɔ ˈe -blae- aˈ ˈˈbhieˈˈ ˈdhi -ˈˈvile-.’ Dhɛ ʋʋ ˈtmʋan nʋɛn Darisɩ ˈtʋn ˈˈdhe ɔ ˈŋwɔɔn- ˈbho ˈmɛn ɲʋn ˈye ˈo ˈtee -ˈnɛn in de.

Daniɛ ˈŋwɩɩn -ka ɲʋn dea ˈo ˈtee -dhee -ˈnɛn in ɛn, ɔ pa ˈdhe ɔ bho ˈˈgbu. ˈˈDhe -ka ɔɔ nʋan see ɛ, ɔ poɛ ˈkɔi glu ˈbho fenɛtrɩ ˈkaian ˈˈŋwɛn ˈˈjhibhaˈ -wɛeˈ ɔɔ bhae Zoova. Ɲʋn -bue- -ʋa- nʋɔn -gwlɛnˈ bho pa ˈdhe ɔ bho ˈˈgbu ɛ, ʋʋ -jhɛɛɔ- -bhae- -ˈnan. Ʋʋ pleˈ ʋʋ ye ˈe Darisɩ bho mun ˈˈdhe ʋʋ -ghwlu ˈdhe ɔ bho ʋʋ ˈnaan: ‘Daniɛ ɛ bhlaa -manˈ ˈtee ŋwɔn. Ɔɔ bhaeɛ ɔɔˈ Ɲɔnsoa -kpɛ taan ˈdhe zɔn ˈdhi.’ Darisɩ -kman Daniɛ ɛˈ dɩ ˈˈdhe ɔ ˈse ˈbɔn ɔ ˈye ˈmɛn. -Ka ɔ ˈyea nʋn -wɛeˈ ɲʋn ˈsea Daniɛ ˈdhbha i, ɛmɛn- ɔ ˈbɔn nʋanˈ in ˈdhe -zɔn -ˈnɔn ɔnˈ klɛɛ ˈdhi. ˈKlaa, ˈbheɔ mɔn ɔnˈ ˈˈjɛ se ˈbhɛɛ- ɔ ˈye ˈtee ɔ dea ˈo dhi ˈˈɩ zian-. Dɩ kpʋn Darisɩ ˈmɛn ˈsʋ ɔ ye ɔɔˈ ˈsʋlɩˈˈ ˈtmʋʋn- ʋʋ ye Daniɛ ˈdhe -blae- kman ŋwɔn ɔnˈ ˈˈbhieˈˈ ˈdhi -ˈˈvile-.

ˈDhe ˈˈmaʋn -glʋ -ˈnʋn ˈdhi ɛ, Darisɩ ˈˈduɛˈˈ Daniɛ ɛˈ -zɔnˈ ˈjɛɛn ˈsʋ ˈˈɲɩnɔn ˈseɔ nʋn. Zɔn zɩan, ɔ kpa pleeaˈ ˈdhe -blae- aˈ ˈˈbhieˈˈ ˈˈŋwɛn ˈˈdhe ɔ ˈdha Daniɛ ɔ ˈnaan: ‘-Manˈ Ɲɔnsoa ˈpʋʋ ʋn ˈmɛn?’

Darisɩ ˈŋwɔn ɲɔn dhueˈ ɔˈ ghwlu. Ɛ nɩn Daniɛ! Daniɛ -ghwluɛ ˈe Darisɩ bho ɔ ˈnaan: ‘Zoova aˈ dhbhoozuu- kan -blae-’ aˈ ŋwɔn ˈˈŋwɛn. Ɩn ˈse ˈʋn dhɛsaʋn- ˈˈdhrui nʋn.’ ˈMʋnan an nʋn Darisɩ ˈmɛn! Ɔ ˈnaan ɲʋn -za Daniɛ ˈdhe -blae- aˈ ˈˈbhieˈˈ ˈdhi. Gɔˈ dhɛzaanˈˈ ka se ˈbho Daniɛ ˈˈbun -nɩn. ˈSʋ ˈbheɔ ˈnaan: ‘Aʋ -ˈˈvile- ɲʋn bhla Daniɛ dɩ ˈˈkpe ˈdhe -blae- aˈ ˈˈbhieˈˈ ˈdhi.’ Ɲʋn -ˈˈvila ɲʋn -ˈnʋn ˈdhe ˈˈbhieˈˈ ˈdhi ɛ, -blae- dhi ʋbʋ ˈmɛn.

Darisɩ ˈnaan ɲʋn po ghwee nɛn ˈdhe ɔɔˈ ˈcɛ bho: ‘Ɲʋn anˈ klɛɛ ˈye Daniɛ ɛˈ Ɲɔnsoa -plee. Ɔ zeiɛ Daniɛ ˈdhe -blae- ˈkwa.’

-Man bhae Zoova ˈmɛn zɔn ooˈˈ zɔn -ka Daniɛ nʋan?