Dhɛ kɔan dɩ Biiblʋ a dea -jiɛ ˈˈkpe gblein ɛn, ɛmɛn- -nɩn Ɲɔnsoa aˈ ˈBheɔglɔ. Zoova a muɛn ɔɔˈ ˈBheɔglɔ i -jhii -wɛeˈ ˈbhlʋa ˈye -bɔyaˈˈ -deɩn ˈkpa. -Ɛ -nɩn Ɲɔnsoa aˈ ˈBheɔglɔ -ɔ? Ka -a nʋn ɛnˈ jhibho- sʋn -ka ɔ -deea ɲʋn ˈbhlea -a? Dhɛwɛ- ɔ nʋn -ɛn? ˈˈDhe dhɛwɛ- ɔɔ mun -nʋn ˈdhe ˈkmʋn anˈ ɲan -an? ˈCɩaandhɛ- nɛn -e ˈcɩaandhɩ- ˈsɔɔn -ɔn jhia a muɛn ˈe ideedɩ- -ˈnɩn -za.

1. -Ɛ -nɩn Ɲɔnsoa aˈ ˈBheɔglɔ -ɔ, ˈˈdhe ɲɔnwɛ- -nɩn ɔɔˈ ˈBheɔ -ɔ?

ˈBheɔglɔ- -ˈnɔn, ɛ ɲʋnbhleglibha- Zoova ˈde ˈo i. Zezi Klisɩ -nɩn Ɲɔnsoa aˈ ˈBheɔglɔ ɔˈ ˈBheɔ ˈˈdhe -ɔɔ poɔ jie bho ˈdhe jhaʋn ˈdhi. (Matthieu 4:17; Jean 18:36) Dhɛ Biiblʋ a ˈtmʋan ˈdhe Zezi ɔˈ dɩ ˈdhi ka: ‘Ɔɔ muɛn ˈBheɔ -nɩn ˈˈdhe ɔɔˈ ɲʋnbhleɛ ˈse ˈˈtianˈ ˈbhlei.’ (Luc 1:32, 33) Zezi -nɩan Ɲɔnsoa aˈ ˈBheɔglɔ ɔˈ ˈBheɔ, ɔɔ muɛn ɲʋn anˈ klɛɛ nɩan da ˈbhlʋa ˈˈkpe jie bho -po.

2. Ɲʋnwɛ- -nɩn Zezi ˈye ɲʋn ˈbhle -ɛ?

Ɛ se Zezi ɔˈ ˈsʋ ˈye ɲʋn jie bho po -nɩn. Ɲʋn ˈghwlʋa ‘ˈcɛdhri ˈdhii, -ʋʋ sea ghwlu dhueˈ ˈbhle ˈˈdhe -ʋʋ sea ˈbhlʋa nɩan dhueˈ ˈdhi ˈghwlʋ a muɛn ˈbheɔ -nɩn ˈˈdhe ʋʋ ˈye ˈbhlʋa aˈ klɛɛ jie bho po.’ (Révélation 5:9, 10) Ɲʋndiɛ- -nɩn Zezi ɔ mun ɲʋn jie bho po -ɛ? -Da Zezi jhia da ˈbhlʋa ˈˈkpe -dhe ɛ, ɲʋn anˈ mliɔn bhla ˈbho ɔ ˈdhe -ʋʋ ˈkpa kletiɛn. ˈKlaa ɲʋn anˈ 144.000 ˈye ˈe jhaʋn ˈdhi mun -wɛeˈ -ʋʋ ˈye ɲʋn ˈbhle. (Zro Révélation 14:1-4.) Ɲɔnsoa aˈ ˈBheɔglɔ- ˈye kletiɛn -ˈˈwe a klɛɛ sia ˈo jie bho po.​—Psaume 37:29.

3. Dhɛɛdɩ- Ɲɔnsoa aˈ ˈBheɔglɔ ˈdha dhɛ ɔ -zii ɲʋnbhleglibhɩ- sia ˈo -ɛ?

-Bho ˈbhlʋɩbhleʋn an sa dhɩjɛɩn anˈ nʋanˈ i ˈbɔn mɔn -dhe ɛˈ, ʋaˈ sɩn se dhɩ aˈ klɛɛ ʋa ˈbɔan ʋʋ ˈyea nʋn ˈˈkpe -tɛɛn. -Bho ɛɛ sa ˈo ˈbhɔɔ ɛˈ, ˈbhlʋɩbhleʋn -ˈnʋʋn -ʋa- ˈnaan ʋaˈ ˈsʋ ɔˈ dɩ tɔˈ i ˈˈdhe -ʋʋ ˈsea ˈbɔn -ʋʋ ˈyea ɲʋn sʋn bho po ɛ, ʋbʋ- -a jhii ˈbho ʋaˈ gɔˈ ˈˈɩ. ˈKlaa ɲɔn ooˈˈ ɲɔn ˈse ˈo Zezi -ɔ nɩan Ɲɔnsoa aˈ ˈBheɔglɔ ɔˈ ˈBheɔ ɔˈ gɔˈ ˈˈɩ -jhii dhi. Ɲɔnsoa deɛ ˈo “ˈBheɔglɔ- -ɔ ˈse i -zaa i -flɛ.” (Daniel 2:44) Zezi ɔ muɛn ˈbhlʋa aˈ klɛɛ jie bho -po, ɔ ˈse ɲʋn anˈ ˈfɔ dhɛjɛɛn ˈˈdhrui -nʋn in ˈˈdhe ɔ ˈye ˈo ɲʋn -ˈnʋʋn sie. Ɔ -kman ɲʋn anˈ dɩ, ɔ -nmɔn ˈdhi ŋwɔn, ɔ ˈsrɛ ˈˈɩ, ˈˈdhe ɔɔ muɛn ɲʋn dhɛ -tɔɔn -wɛeˈ ɲiɔʋ ˈye bha ˈbhle -kajɔɔnka: ʋʋ ˈye ɲʋndɩkman- -e ˈdhiɲwɔnmɔɛn- -to ˈdhe bha bho ˈˈdhe ʋʋ ˈye ˈˈɩ ˈsrɛ.​—Zro Isaïe 11:9.

4. Ɲʋnbhleglibha- ˈbhlea ˈˈɩkman- klaaˈˈ aa muɛn ˈbhlʋa aˈ klɛɛ jie bho -po

Zezi -kmanˈˈ ɔ ye ˈbhlʋɩbhleʋn anˈ klɛɛ -zii. Zro Matthieu 28:18, -ˈmɛn aʋ ˈtmʋn ideedɩ- nɩn anˈ dɩ:

• Dhɛɛdɩ- Zezi ɔˈ ɲʋnbhleɛ ˈdha dhɛ ɛ -zii -glɔɲiɔn ɔnˈ ɲʋnbhleɛ -ɛ?

ˈBhlʋɩbhleʋn an zianˈˈ -zɔn -ˈnɔɔn, ˈˈdhe ɲʋn nɩan ˈe ʋaˈ ˈbhlʋa ˈdhi aˈ ˈsʋ ʋa po jie bho. ˈˈDhe Ɲɔnsoa aˈ ˈBheɔglɔ ˈdhe? Zro Daniel 7:14, -ˈmɛn aʋ ˈtmʋn ideedɩ- nɩn anˈ dɩ:

• Dhɛ Ɲɔnsoa aˈ ˈBheɔglɔ “ˈsea i -zaa i -flɛ,” dhɛɛdɩ- ɛ -nɩn dhɛjɛɛn -ɛn?

• Dhɛ Ɲɔnsoa aˈ ˈBheɔglɔ ɔ ˈsʋ ˈyea ˈbhlʋa jie bho po ɛ, dhɛɛdɩ- ɛ -nɩn dhɛjɛɛn -ɛn?

5. -Glɔɲiɔn ɔnˈ ɲʋnbhleɛ ɛ muɛn i -gwɛ

Dhɛɛdɩ- Ɲɔnsoa aˈ ɲʋnbhleɛ ˈye ˈo -glɔɲiɔn ɔnˈ ɲʋnbhleɛ -za -a? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: -Ɛ -nɩn Ɲɔnsoa aˈ ˈBheɔglɔ -ɔ?: Ɛɛˈ ˈfɔ (1:41)

• Dhɛwɛ- -glɔɲiɔn ɔnˈ ɲʋnbhleɛ po ˈo -ɛ?

Zro Ecclésiaste 8:9, -ˈmɛn aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhe, ɛ -nmɔn ˈo i Ɲɔnsoa aˈ ˈBheɔglɔ ˈye ˈo -glɔɲiɔn ɔnˈ ɲʋnbhleɛ -za? Dhɛɛdɩ- -ɛ?

6. Ɲʋn -an poa Ɲɔnsoa aˈ ˈBheɔglɔ jie bho jhibho- dɩ -a nɩan ˈe ˈdhi ˈmɛn

Dhɛ -aaˈ ˈBheɔ Zezi nɩan -glɔɲiɔn -dhe ɛ, ɛɛ muɛn -nʋn ɔ ˈye -aaˈ “-ghwɛe ˈjhe ˈdhe dhɩ -a sea ˈˈŋwɛn ˈbhɛɛ ɛˈ dɩ ˈdhi.” (Hébreux 4:15) ˈƝnʋnkpaeˈ -e ɲmai- aˈ 144.000 kpʋan ˈo Zoova ˈˈbuin, “-ʋʋ ˈghwlʋa ˈcɛdhri ˈdhii, -ʋʋ sea ghwlu dhueˈ ˈbhle ˈˈdhe -ʋʋ sea ˈbhlʋa nɩan dhueˈ ˈdhi ˈghwlʋ -nɩn Zezi ˈye ˈbhlʋa jie bho po.”​—Révélation 5:9.

• Dhɛ Zezi -e ɲʋn anˈ klɛɛ -ʋʋ -nɩn ɔn ˈyea ˈbhlʋa jie bho po nɩan -glɔɲiɔn -dhe ɛ, ɛɛ ˈˈduɛ ɲʋn dɩ -ˈgwlɩi? Dhɛɛdɩ- -ɛ?

7. Ɲɔnsoa aˈ ˈBheɔglɔ ɔˈ ˈtee ˈdha dhɛ ɩn ye -glɔɲiɔn ɔnˈ ˈtee -zii

ˈBhlʋɩbhleʋn deɛ ˈo ˈtee dhi -ɩn ˈye ɲʋn ʋa poa jie bho ˈjɛɛn ˈˈdhrui nʋn ˈˈdhe -ɩn ˈyʋbʋ ˈdhei -fuo-. -Ka nɩan dhueˈ -ke ɛ, Ɲɔnsoa aˈ ˈBheɔglɔ deɛ ˈo ˈtee i ɲʋn ɔɔ poa jie bho ˈye ŋwɔn ˈjhe. Zro 1 Corinthiens 6:9-11, -ˈmɛn aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhee, -kawɛ ˈkmʋn an mun -nɩn -bho ɲun anˈ klɛɛ ɛ sa ˈtee Ɲɔnsoa dea ˈo ŋwɔn ˈjhe -ɛ?a

• ˈBhoo- -gwlɩˈˈ ˈdhee, Ɲɔnsoa nɩn ɛnˈ -ka ɔ ˈye ˈo ˈtee de ɲʋn ˈBheɔglɔ ɔ poa jie bho ˈye ŋwɔn ˈjhe? Dhɛɛdɩ- -ɛ?

• Dhɛwɛ- -ɛɛ toɛ -ka ɲʋn -anˈ ˈjhea ˈtee -ˈnɩn ŋwɔn ˈbhɛɛa ʋʋ ˈyea ˈˈɩ zian-?​—-Ŋmʋn ˈdhe ˈˈjhri -mɩɩnˈˈ 11 ˈdhi.

DHƐWƐ- ˈCƖAN-?

Ɲɔnsoa aˈ ˈBheɔglɔ -nɩɛn- -glibha- -ɔ -nɩn ˈe jhaʋn ˈdhi, ɔɔ muɛn ˈbhlʋa aˈ klɛɛ jie bho -po.

Dhɛwɛ- -ˈŋwɔn in -ɛn?

• Ɲʋnwɛ- ˈye Ɲɔnsoa aˈ ˈBheɔglɔ jie bho po -ɛ?

• Dhɛɛdɩ- Ɲɔnsoa aˈ ˈBheɔglɔ ˈdha dhɛ ɔ ye -glɔɲiɔn ɔnˈ ɲʋnbhleglibha -zii -ɛ?

• Dhɩwɛ- Zoova a ˈbɔn ɲʋn ɔɔˈ ˈBheɔglɔ ˈyea jie bho po ˈye nʋn -ɛn?

ˈBƆN DHƖ -ˈNƖƖN ANˈ I ˈŊWƆAN IN

Zezi -tɔɔn ɲʋn -da ˈBheɔglɔ nɩan ˈmɛn.

“Le royaume de Dieu est-il dans votre cœur?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

Dhɛɛdɩ- Zoova aˈ -Bobhlaʋn an bhla ˈo Ɲɔnsoa aˈ ˈBheɔglɔ ˈdhe ˈˈdhe ʋaˈ bhla ˈo -glɔɲiɔn ɔnˈ ɲʋnbhleɛ ˈdhe -ɛ?

Ʋʋ bhla ˈo Ɲɔnsoa ˈa ˈBheɔglɔ ˈdhe ˈdhe ʋa -pɛɛ ɛˈ klɛɛ ˈmʋn (1:43)

-Ŋmʋn dhɛ Biiblʋ ˈtmʋan ˈdhe ɲʋn anˈ 144.000 Zoova za ˈo -ʋʋ -nɩn Zezi ˈyea ɲʋn ˈbhle aˈ dɩ ˈdhi.

“Qui va au ciel?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

-Ɛ po ˈɲnʋnkpaoˈ dhueˈ nɩan ˈe -gazo ˈdhi sʋn bho ˈˈdhe ʋn deɛ -gwlɩˈˈ -ka Ɲɔnsoa aˈ ˈsʋ ˈbhɛɛa ɔ ˈyeɛ nʋn ˈˈdhe ɲʋn nɩan da ˈbhlʋa ˈˈkpe ˈye dhɛ srɛaˈˈ nʋn -ɛn?

“J’ai découvert la solution à l’injustice” (Réveillez-vous!, novembre 2011)

ˈDhe 1914 zʋn ˈdhi Ɲɔnsoa aˈ ˈBheɔglɔ -dee ɲʋn ˈbhleɛ ˈdhe jhaʋn ˈdhi. ˈBhomɔn- -glɔɲiɔn ɔnˈ ɲʋnbhleɛ ɛˈ -dhebhɔɔghwɩ -dee. Ka -a nʋn ɛnˈ jhibho- sʋn -ɛn? Dhɩ -a nʋʋan -ɛ ˈghwlʋa ˈo 1914 zʋn ˈˈkpe ɛ, ɩmɩn- an toɛ. -A -jhii ɩanˈ klɛɛ bho i -a ˈye ɩanˈ dɩ ˈtmʋn dhueˈ dhueˈ.

1. Dhɩwɛ- Biiblʋ -zaa ɲan ʋn ˈtmʋn -ɛn?

Biiblʋ aˈ ˈsɛɛ ɲʋn an ˈdhaa Daniel -zɛɛ ɲan ɛ yeɛ ˈtmʋn -ka Ɲɔnsoa aˈ ˈBheɔglɔ ɔ muan ɲʋnbhleɛ- -dee ˈdhe nɔnˈˈ ɲʋn an ˈdhaa “nɔnˈˈ ˈˈmɛsɔnˈ ɔnˈ” ˈdhegwɛanˈ. (Daniel 4:16, 17) -Zɩn -duuˈˈ zia, Zezi ˈdhaa nɔnˈˈ nɩan dhueˈ “bhlʋɩbhleʋn anˈ nɔnˈˈ, ˈˈdhe ɔ ˈse ˈˈdhru jra ke. (Luc 21:24) -Ka -aa muɛn ˈjhe- ɛ, nɔnˈˈ -ˈnɔn -jra ˈˈdhru ˈdhe 1914 zʋn ˈdhi.

2. -Ɛ ˈghwlʋa ˈo 1914 zʋn ˈˈkpe ɛ, dhɩwɛ- -ɩan- nʋʋɛn ɲʋn an ˈjhe -ɛ?

Zezi ɔˈ dhɛcɩaʋn deeɔ i ʋʋ ˈnaan: “Dhɛwɛ- -ˈyeɛ -to ka jhia ˈˈdhe -a nɩan ˈnɔn ˈkmʋn nʋn anˈ -dhebhɔɔghwɩ ˈdhi -ɛ?” (Matthieu 24:3) -Ɔ -za ʋaˈ ghwlua aˈ kpa ɔ ˈnaan, -bho ɔ ˈkpa ˈBheɔ ˈˈdhe ɔ -dee Ɲɔnsoa aˈ ˈBheɔglɔ ɔˈ jie bho poaˈ aˈ, dhɩ -duuˈˈ ˈye -nʋʋɛn-. Ɩanˈ -ˈnɩɩn -mɩn -nɩn, tʋ -e ˈmɩɛn -e ˈbhlʋa aˈ -treaˈ -e. (Zro Matthieu 24:7.) Dhɛ Biiblʋ -zaa ɲan kenɛnˈ ʋn ˈtmʋan -mɛn -nɩn kplɩn ɲʋn anˈ -da -duuˈˈ a muan ˈbhle ˈdhe “-dhebhɔɔghwɩ ˈdhi” a muɛn -nʋn ˈkmʋn ˈye “ˈˈɩ -kman.” (2 Timothée 3:1-5) -Ɛ ˈghwlʋa ˈo 1914 zʋn ˈˈkpe ɛ, dhɩ Biiblʋ -zaa ɲan ʋn ˈtmʋan -e kplɩn ɲʋn ˈyea ˈbhle ɛ, ɩmɩn- ɲʋn an ˈjhe ˈˈkpe i.

3. Ɲɔnsoa aˈ ˈBheɔglɔ -deea ɲʋn ˈbhleɛ, dhɛɛdɩ- -wɛeˈ ˈkmʋn kmanˈˈ -kaˈ -a?

Zezi ˈkpa Ɲɔnsoa aˈ ˈBheɔglɔ ɔˈ ˈbheɔ ɔ, Zezi -nɩn Satan -e ɔɔˈ -ziisaɩn vɔɛn tʋ. Satan ˈse tʋ aˈ ˈˈdhru kpa. Biiblʋ ˈnaan “ɲʋn ˈˈvile- Satan ˈmɛn da ˈbhlʋa ˈˈkpe ˈˈdhe ɲʋn ˈˈvile- ɔɔˈ -ziisaɩn ˈmɛn -ke.” (Révélation 12:9, 10, 12) Satan ˈkpa ˈcɛn klaaˈˈ, dhɛ nɩan ˈo ɛ, ɔ jhibhiˈ -ka ɔɔˈ i -za nɔnˈˈ sea bho -tɛɛn ɛn. Ɛɛˈ dɩ ɔɔ ˈˈdu ɲʋn ˈkle, ɛɛˈ dɩ dhɩsaɩn -siie- i da ˈbhlʋa aˈ klɛɛ ˈˈkpe. Ɲɔnsoa aˈ ˈBheɔglɔ- -ˈnɔn ɔn muɛn ˈkledɩ- -ˈnɩn anˈ klɛɛ i -za.

KPA DHƐ I ˈŊWƆƐN ƝAN

4. Dhɩ -ɩan- toɛ -ka Ɲɔnsoa aˈ ˈBheɔglɔ -deea ɲʋn ˈbhleɛ ˈdhe 1914 zʋn ˈdhi ɛ

VIDEO: Ɲɔnsoa aˈ ˈBheɔglɔ -dee ɲʋn ˈbhleɛ- ˈmɛn ˈdhe 1914 zʋn ˈdhi (5:02)

Ɲɔnsoa nʋɛnˈ ˈbheɔ Nabukodonozɔɔ ye jha -jha. ˈDhe jha -ˈnɔn ˈdhi ɛ, dhɩ ˈyea -nʋʋɛn- ˈdhe ˈkmʋn anˈ ɲan -mɩn ɔ toɔˈˈ. Jha -ˈnɔn -e dɩ Danɩɛɛ ˈtmʋan ˈdhe ɔɔˈ dɩ ˈdhi an toɛ -ka ɔ ˈdha ˈe Nabukodonozɔɔ ɔˈ ɲʋnbhleɛ -e Zoova aˈ ˈBheɔglɔ ˈbho ɛ.​—Zro Daniel 4:17.a

Zro Daniel 4:20-26, -ˈmɛn -jhii ˈˈtɛʋn- nʋn in -wɛeˈ ideedɩ- nɩan da ˈzɔn da -ˈyɩ ˈe -za:

• (1) Dhɛwɛ- Nabukodonozɔɔ ˈjhe ˈdhe ɔɔˈ jha ˈdhi -ɛ?—-Ŋmʋn ˈdhe ˈˈjhri -mɩɩnˈˈ 20 -e 21 ˈdhi.

• (2) Dhɛẁɛ- -ɛɛ mun tu -ˈnʋn i -jhii -ɛ?​—-Ŋmʋn ˈdhe ˈˈjhri -mɩɩnˈˈ anˈ 23 ˈdhi.

• (3) Dhɛwɛ- -ɛɛ mun -nʋʋɛn- ˈdhe “nɔnˈˈ ˈˈmɛsɔnˈ” ɔnˈ ˈdhegwɛanˈ -an?​—-Ŋmʋn ˈdhe ˈˈjhri -mɩɩnˈˈ anˈ 26 ˈdhi.

Ka jha -ɔɔ ˈtmʋan tu aˈ dɩ nʋn ˈe Ɲɔnsoa aˈ ˈBheɔglɔ bho ˈdha sʋn -ɛn?

ƝANZAADƖ- (Daniel 4:20-36)

ˈBheɔdhɛ-

(1) Tu klaaˈˈ

ˈBheɔdhɛ- -ɲnain

(2) “Aʋ dhbha tu” ˈˈdhe “nɔnˈˈ ˈˈmɛsɔn ˈye zi”

ˈBheɔdhɛ- -dee -dheeˈka

(3) “-Manˈ ˈbheɔdhɛ ɛ muɛn ˈdhee- ˈkwa dhe -jhi”

ˈDhe ɲanzaadɩ -ˈnɩn anˈ ˈbhoɲninsʋn kɔan ɲan ˈdhi ɛ...

• (4) Ɲɔnwɛ- tu -ˈnʋn ˈdha -a?​—-Ŋmʋn ˈdhe ˈˈjhri -mɩɩnˈˈ 22 ˈdhi.

• (5) -Bhlaa ɔ ˈbhɔ ɲʋn ˈbhle dɩ -ɛ?​—Zro Daniel 4:29-33.

• (6) ˈDhe “nɔnˈˈ ˈˈmɛsɔnˈ” -ˈnɔn ɔnˈ ˈdhegwɛanˈ an, dhɛwɛ- -jhii Nabukodonozɔɔ i -dhe -ɛ?​—Zro Daniel 4:34-36.

ƝANZAADƖ- Aˈ ˈBHOƝNƖNSƲN- KƆAN ƝAN

ˈBheɔdhɛ-

(4) Babilɔnɩn -bhlʋa- aˈ ˈbheɔ, Nabukodonozɔɔ

ˈBheɔdhɛ- -ɲnain

(5) ˈBho ˈˈtɛn ti aˈ 606 zʋn ˈdhe ɛ, sean ˈkpa ˈbheɔ Nabukodonozɔɔ ˈˈjhri, ɛ nʋɛnˈ ɔ ˈse ɲʋn jie bho po ˈdhe -zɩn ˈˈmɛsɔnˈ ˈdhi

ˈBheɔdhɛ- -dee -dheeˈka

(6) Nabukodonozɔɔ ɔˈ sean ˈbhɔɔ, ˈˈdhe ɔ ye ɲʋnbhleɛ- -dee

ˈDhe ɲanzaadɩ -ˈnɩn anˈ ˈbhoɲninsʋn anˈ ˈsɔɔn nɛn ˈdhi ɛ...

• (7) Ɲʋnwɛ- tu -ˈnʋn ˈdha -a?​—Zro 1 Chroniques 29:23.

• (8) -Bhlaa ʋʋ ˈbhɔ ɲʋn ˈbhle dɩ -ɛ? Ka -a nʋn ɛnˈ jhibho- sʋn -ka ʋʋ ˈbhɔa ɲʋn ˈbhle dɩ -da Zezi nɩan da ˈbhlʋa ˈˈkpe -dhe -ɛ?​—Zro Luc 21:24.

• (9) -Bhlaa ˈˈdhe -dawɛ ʋʋ -dee ɲʋn ˈbhleɛ -dheeˈ ka -a?

ƝANZAADƖ- Aˈ ˈBHOƝNƖNSƲN ANˈ ˈSƆƆN -NƐN

ˈBheɔdhɛ-

(7) Israɛkɔʋn anˈ ˈbheɔ -ʋʋ ˈdha Ɲɔnsoa aˈ Ɲʋnbhleɛ-

ˈBheɔdhɛ- -ɲnain

(8) Zelizalɛm̀ʋn -zaa i, Israkɔʋn anˈ ˈbheɔ -ˈˈwe ˈbhɔ ɲʋn ˈbhle dɩ ˈmɛn ɛ ye zɩn anˈ 2.520 nʋn

ˈBheɔdhɛ- -dee -dheeˈka

(9) Zezi ˈkpa ˈBheɔglɔ ɔˈ ˈBheɔ ˈdhe jhaʋn ˈdhi

5. -Ɛ tbha ˈo 1914 zʋn ˈˈkpe ɛ, ˈkmʋn zianˈˈ

Po ˈo VIDEO.

VIDEO: -Ɛ tbha ˈo 1914 zʋn ˈˈkpe ɛ, ˈkmʋn zianˈˈ (1:10)

-Bho Zezi ˈkpa ˈbheɔ ɔˈ, -ka ˈkmʋn an muan -nɩn ɛn, ɔ -zɛɛ ɲan ɔ ye ɛɛˈ dɩ ˈtmʋn. Zro Luc 21:9-11, -ˈmɛn aʋ ˈtmʋn ideedɩ- nɩn anˈ dɩ:

• Dhɩ -ɩanˈ dɩ ˈtmʋan ˈdhe Biiblʋ aˈ ˈˈjhri nɩn ˈdhi ɛ, -jɩnwɛ- -ɩan- nʋʋɛn ˈzɩan -man ˈjhe -aeˈˈ -man ˈŋwɔn -ɔn?

Kplɩn ɲʋn ˈyea ˈbhle ˈdhe -glɔɲiɔn ɔnˈ ɲʋnbhleɛ ɛˈ ˈdhegwɛanˈ an, dhbhoi- Pɔʋ ˈtmʋn ɩanˈ dɩ ˈmɛn. Zro 2 Timothée 3:1-5, -ˈmɛn aʋ ˈtmʋn ideedɩ- nɩn anˈ dɩ:

• ˈDhe kplɩn -ˈnɩn ˈˈklu ɛ, -jɩnwɛ- -man ˈjhe ɲʋn jhia ʋn ˈdhe i ˈbhle -ɛ?

6. Ɲɔnsoa aˈ ˈBheɔglɔ ɔˈ ɲʋnbhleɛ ˈye -aʋ ˈkpɩ po

Zro Matthieu 24:3, 14, -ˈmɛn aʋ ˈtmʋn ideedɩ- nɩn anˈ dɩ:

• Dhbho -wɛ -kɔn dɩ -ɔɔ toɛ -ka Ɲɔnsoa aˈ ˈBheɔglɔ -deea ɲʋnbhleɛ -ɛ?

• -Kawɛ -ˈbhɛɛ -ˈye nʋn ˈˈdhe -ˈye dhbho -ˈnɔn nʋn -ke -ɛ?

Ɲɔnsoa aˈ ˈBheɔglɔ -dee ɲʋnbhleɛ ˈmɛn ˈˈdhe -zɔn ɔ ˈyea ˈbhlʋa aˈ klɛɛ jie bho po se bho -tɛɛn. Zro Hébreux 10:24, 25, -ˈmɛn aʋ ˈtmʋn ideedɩ- nɩn anˈ dɩ:

• ‘-Ka -aa ˈjhea -zɔn -ˈnɔn ɔn ˈˈkʋan in’ ɛn, dhɛwɛ- -a ˈye nʋn dhueˈ dhueˈ -ɛ?

DHƐWƐ- ˈCƖAN-?

Biiblʋ aˈ ɲanzaadɩ -e -zɩn ʋn ˈˈsia ˈɲnɩn an toɛˈ -ka Ɲɔnsoa aˈ ˈBheɔglɔ -deea ɲʋnbhleɛ. -Bho -aa sa Ɲɔnsoa aˈ ˈBheɔglɔ ɔˈ bo bhla ˈˈdhe -aa sa ˈˈdhruigbooɛ ˈmʋn mun ɛnˈ, -aa toɛˈ -ka -a dea Ɲɔnsoa aˈ ɲʋnbhleɛ- -gwlɩˈˈ ɛ.

Dhɛwɛ -ˈŋwɔn in -ɛn?

• Dhɛwɛ- -nʋʋɛn- ˈdhe nɔnˈˈ ˈˈmɛsɔnˈ ɔnˈ ˈdhegwɛanˈ Daniɛɛ -zaa ɲan ɔ ˈtmʋn -ɛn?

• Dhɛɛdɩ- deɛ -gwlɩˈˈ -ka Ɲɔnsoa aˈ ˈBheɔglɔ -deea ɲʋnbhleɛ ˈdhe 1914 zʋn ˈdhi -ɛ?

• -Ka Ɲɔnsoa aˈ ˈBheɔglɔ -deea ɲʋnbhleɛ ˈˈdhe deɛ -gwlɩˈˈ ɛ, -kawɛ -ˈbhɛɛ -ˈyeɛ -to -ɛ?

ˈBƆN DHƖ -ˈNƖƖN ANˈ I ˈŊWƆAN IN

Dhɛ ˈsɛɛjhibhoʋn -e ɲʋn -dhee -ˈnʋʋn ˈtmʋan ˈdhe 1914 zʋn ˈdhi ɛ, ɛmɛn- -man mun ˈjhe-.

“Depuis quand ce déclin brutal?” (Réveillez-vous!, avril 2007)

Ɲanzaadɩ- -ɩanˈ dɩ ˈtmʋan ˈdhe Mathieu 24:14 zian- ˈˈjhu dhueˈ ɔˈ ˈkmʋn ˈˈɩn.

“J’aimais le baseball plus que tout au monde!” (La Tour de Garde no 3 2017)

Ka -a nʋn ɛnˈ jhibho- sʋn -ka ɲanzaadɩ- -ɩanˈ dɩ ˈtmʋan ˈdhe Daniel 4 ˈdhi a ˈdha ˈe Ɲɔnsoa aˈ ˈBheɔglɔ bho -ɛ?

“Quand le Royaume de Dieu a-t-il commencé à régner? (1re partie)” (La Tour de Garde, 1er october 2014)

-Ɛɛ toɛ -ka “nɔnˈˈ ˈˈmɛsɔnˈ” -ɔɔˈ dɩ ˈtmʋan ˈdhe Daniel 4 ˈdhi -jra ˈˈdhru ˈdhe 1914 zʋn ˈdhi -ɛ?

“Quand le Royaume de Dieu a-t-il commencé à régner? (2e partie)” (La Tour de Garde, 1er novembre 2014)

Ɲɔnsoa aˈ ˈBheɔglɔ -dee ɲʋn ˈbhleɛ ˈmɛn. ˈDhe nɔnˈˈ dhɛ ˈˈzaan ˈdhi ɛ, ɔɔ muɛn -nʋn dhɩ -duuˈˈ ˈye ˈˈɩ zian- da ˈbhlʋa ˈˈkpe. Dhɩ ˈdhɔɛe ˈBheɔglɔ- -ˈnɔn ɔn muan -nʋn ɛn, -a ˈtmʋn ɩanˈ dɩ.

1. Ka Ɲɔnsoa aˈ ˈBheɔglɔ ɔ mun ˈflɛ -e ˈˈɩ ˈsrɛ- da ˈbhlʋa ˈˈkpe -jha -a?

Zezi nɩan Ɲɔnsoa aˈ ˈBheɔglɔ ɔˈ ˈBheɔ, ɔ muɛn ɲʋnsaɩn -e ɲʋnbhleglibhɩ i -za ˈbho Aamagedɔn tʋ aˈ nɔnˈˈ. (Révélation 16:14, 16) ˈDhe ɛɛˈ nɔnˈˈ tu ˈdhi ɛ, dɩ Biiblʋ -zaa ɲan ʋn ˈtmʋan an muɛn ˈo -ɲnin: “Nɔnˈˈ dhɛ ˈˈzaan gbai -si ˈo, ˈˈdhe ɲʋnsaɩn ˈse i -nɩn in -dheeˈ ka.” (Psaume 37:10) ˈDhe ˈBheɔglɔ ɔˈ ˈsaa ˈmʋn ɛn, Zezi ɔ muɛn -nʋn ˈflɛ -e ˈˈɩ ˈsrɛ- ˈye da ˈbhlʋa aˈ klɛɛ ˈˈkpe -nɩn.​—Zro Isaïe 11:4.

2. -Bho Ɲɔnsoa aˈ -glʋˈdɩ a sa nʋʋɛn da ˈbhlʋa ˈˈkpe ɛˈ, ka ˈkmʋn an mun -nɩn -ɛn?

ˈBho Ɲɔnsoa aˈ ˈBheɔglɔ ɔˈ ɲʋnbhleɛ ɛˈ nɔnˈˈ ɔn, “ɲʋn ˈsrɛaˈˈ a muɛn da ˈbhlʋa ˈˈkpe ˈˈti-, ˈˈdhe ʋʋ ˈye ˈbho ɔ ˈˈkpe -nɩn jheejhee.” (Psaume 37:29) Aʋ -naan tɔˈ i keaˈ, ɲʋn nɩan da ˈbhlʋa ˈˈkpe ɛ, ʋaˈ klɛɛ ɛˈ nʋʋndhɩ ˈsrɛˈˈ, ʋʋ -kman Zoova -e ʋaˈ -boɲiɔn ɔnˈ dɩ. ˈˈDhe ˈbho -ˈmɛn ˈdhe ɛ, ɲɔn ˈse ˈghwɛ ˈkpai-, ɲʋn an muɛn ˈkmʋn -nɩn ˈsʋ ɛ ˈse ˈˈtianˈ ˈbhle i.

3. -Bho ɲʋnsaɩn -zaa i ɛˈ, dhɛwɛ- Ɲɔnsoa aˈ ˈBheɔglɔ ɔ mun -nʋn -ɛn?

-Bho ɲʋnsaɩn -zaa i ɛˈ, Zezi ɔ muɛn ɲʋn ˈbhle- ˈdhe zɩn anˈ 1.000 ˈdhi. ˈDhe ɛɛˈ nɔnˈˈ tu ˈdhi ɛ, ɔmɔn -e ɲʋn anˈ 144.000 -nɩn ɔ ˈyea ɲʋn ˈbhle ɛ, ʋa muɛn ɲiɔʋ sʋn bho -po ʋʋ ˈye ˈˈɩ ˈgba. ˈDhe zɩn anˈ 1.000 -ˈnɩn anˈ ˈdhegwɛanˈ an, ˈbhlʋa a muɛn -bɔyaˈˈ -deɩn ˈkpa-, ˈˈdhe ɲʋn -an muan dɔ ˈˈkpe ˈˈti- ɛ, ʋa muɛn ˈmʋnan in -nɩn dhɛbhleɛ ʋa ˈjheɛ Zoova aˈ ˈtee ŋwɔn. ˈBho -ˈmɛn ˈdhe ɛ, Zezi ɔ muɛn ɔɔˈ ˈˈBho Zoova aˈ ˈBheɔglɔ ˈbho -to. ˈˈDhe Zoova aˈ ‘ɲnɩn an muɛn -vlɛnˈˈ i -za’ -ka ɛɛˈ dhɛ tu ˈsea -nʋʋɛn- -kpɔ dhueˈ ɛ. (Matthieu 6:9, 10) Ɛɛ muɛn -to -ka Zoova nɩan ɲʋnjiebhopoi- ˈdhɔɛe -ɔɔ ˈˈdua ɲʋn ɔɔ poa jie bho ʋaˈ dɩ ɛ. ˈBho -ˈmɛn ˈdhe bhla, Zoova a muɛn Satan -e -ziisaɩn -e ɲʋn anˈ klɛɛ -ʋʋ ˈsea ɔɔˈ ɲʋnjiebhopoɛ- ˈŋwɔɔn- i -za. (Révélation 20:7-10) Dhɩ ˈdhɔɛe Ɲɔnsoa aˈ ˈBheɔglɔ ɔ muan -nʋn ɛn, ɩan muɛn in -nɩn jheejhee.

KPA DHƐ I ˈŊWƆƐN ƝAN

4. Ɲɔnsoa aˈ ˈBheɔglɔ ɔ muɛn -glɔɲiɔn ɔnˈ ɲʋnbhleɛ i -za

“-Glɔɲiɔn ɔn ˈbhle ɔɔˈ -boɲiɔn ˈmɛn ɔɔˈ ˈkle ˈˈduɛ- ɛɛˈ dɩ.” (Ecclésiaste 8:9) Zoova a muɛn ɛɛˈ dhɛ tu i -za ˈdhe ɔɔˈ ˈBheɔglɔ ɔˈ ˈsaa ˈmʋn.

Zro Daniel 2:44 -e 2 Thessaloniciens 1:6-8, -ˈmɛn aʋ ˈtmʋn ideedɩ- nɩn anˈ dɩ:

• Ɲʋnbhleʋn- nɩan ˈzɩan -e ɲʋn -an dubʋ sɩn ˈdhe i ɛ, dhɛwɛ- Zoova -e ɔɔˈ ˈˈjhu Zezi ɔ mubʋ ˈˈdhrui -nʋn -ɛn?

• Dhɩ ˈcɩan ˈdhe Zoova -e Zezi ɔˈ dɩ ˈdhi ɛ, ka ɩn nʋn ʋn sʋn bho -po sʋn ˈˈdhe deɛ -gwlɩˈˈ -ka dhɩ ʋa muan -nʋn ˈsrɛaˈˈ -a?

5. Zezi -nɩn ɛnˈ -ka -ɔ ˈye ˈBheɔ -nɩn

-Bho Zezi -nɩn Ɲɔnsoa aˈ ˈBheɔglɔ ɔˈ ˈBheɔ ɔˈ, ɲʋn ɔɔ muan ˈbhle- ɛ, ɔɔ mubʋ dhɩ ˈdhɔɛe ˈˈdhrui -nʋn. Po ˈo VIDEO -wɛeˈ -ka Zezi nʋɛn ɛnˈ -to sʋn ka ɔɔ ˈbɔan ɔ ˈyea ɲʋn sʋn bho po ˈˈdhe Zoova ˈˈɲɩɔn ɛɛˈ ˈˈɩkmansʋn ɛn, -ˈyeɛ ˈjhe.

VIDEO: Dhɩ Ɲɔnsoa aˈ ˈBheɔglɔ ˈyea nʋn -mɩn Zezi nʋn (1:13)

Dhɩ Ɲɔnsoa aˈ ˈBheɔglɔ ɔ muan -nʋn ɩanˈ -ˈnɩɩn -mɩn Zezi nʋn -da ɔ nɩan da ˈbhlʋa ˈˈkpe -dhe ɛ. -Bɔyaˈˈ -dɩ -ɩanˈ dɩ ˈtmʋan da ˈˈtɛʋn- nɩan da ˈzɔn ˈdhi ɛ, -jɩnwɛ- -man ˈbɔn -ɩn ˈye ˈˈdoo- -ɩn ˈye ˈo ɲnin -ɛn? -Bho -ˈye dhɩ -duuˈˈ i ˈŋwɔn ˈdhe ɩanˈ dɩ ˈdhi ɛˈ, -ˈmɛn zro Biiblʋ aˈ ˈˈjhri nɩan ˈo -bɔyaˈˈ -dɩ -ˈnɩn ˈˈjhibhaˈ.

6. ˈKmʋn an muɛn ˈdhɔɛe ˈmʋn -nɩn ˈdhe ɲan ˈdhe Ɲɔnsoa aˈ ˈBheɔglɔ ɔˈ ˈsaa ˈmʋn

VIDEO: Dhɩ ˈdhɔɛe -ɩan- muan -nʋʋɛn- ˈdhe ˈkmʋn anˈ ɲan (4:38)

Zro Psaume 145:16, -ˈmɛn aʋ ˈtmʋn ideedɩ- nɩn anˈ dɩ:

• Dhɛ Zoova a muɛn -nʋn “ɲɔn ooˈˈ ɲɔn ɔnˈ -pɛɛ ˈyea bhlu” ɛ, dhɛwɛ- ɛɛ po ˈbhoo- -gwlɩˈˈ -ɛ?

DHƐWƐ- ˈCƖAN-?

Ɲɔnsoa aˈ ˈBheɔglɔ ɔ muɛn Ɲɔnsoa aˈ -glʋˈdɩ ˈbho -ɲnian-. Ɔɔ muɛn -nʋn ˈbhlʋa aˈ klɛɛ ˈye -bɔyaˈˈ -deɩn ˈkpa -wɛeˈ ɲʋn nmɔan ˈdhe Zoova ˈˈjhriɛ ˈdhei ˈye ˈbho ɔ ˈˈkpe ˈˈti ˈˈdhe ʋʋ ˈyeɔ ˈˈɲɩn jheejhee.

Dhɛwɛ- -ˈŋwɔn in -ɛn?

• Ka Ɲɔnsoa aˈ ˈBheɔglɔ ɔ mun Zoova aˈ ˈɲnɩn vlɛnˈˈ i -za sʋn -nʋn -ɛn?

• -Ka Ɲɔnsoa aˈ ˈBheɔglɔ ɔ muan ˈdhɩ -ɩanˈ ˈghwlu Ɲɔnsoa cɛan ˈbho -ɲnian, dhɛɛdɩ- -a ˈbhɛɛ -a ˈyeɛ -gwlɩˈˈ de -ɛ?

• ˈDhe dhɩ aˈ klɛɛ Ɲɔnsoa aˈ ˈBheɔglɔ ɔ muan -nʋn ˈˈklu ɛ, -jɩnwɛ -ɩan- nʋn ʋn ˈˈtʋn -ɛn?

ˈBƆN DHƖ -ˈNƖƖN ANˈ I ˈŊWƆAN IN

Dhɛ Aamagedɔn tʋ ˈdha, ɛmɛn- -man mun ˈcɩan-.

“Qu’est-ce que la bataille d’Armaguédon?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

Dhɩ -ɩan- muan -nʋʋɛn- ˈdhe nɔnˈˈ Zezi ɔɔ ˈdhaa “ˈKlejheɛ- -klaaˈˈ” ˈdhi ɛ.​—Matie 24:21

“Qu’est-ce que la grande tribulation ?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

-Ka ʋaˈ ˈkmʋn an muan -nɩn ˈdhe -bɔyaˈˈ -deɩn ˈdhi ɛ, ɛmɛn- ˈˈgbuzɔncɛ- dhueˈ -a naan tɔˈ i.

-Naan dhɩ -ˈyea nʋn ˈdhe ˈkmʋn -dhee ˈdhi aˈ dɩ tɔˈ i (1:50)

ˈDhe -bo ɲʋn an ˈdhaa “J’étais tourmenté par de nombreuses questions,” ˈdhi ɛ, -ka poitikɩnʋin dhueˈ nʋan ɔɔˈ ideedɩ aˈ ˈdhezaaˈ ˈjhe sʋn ɛn, ɩmɩn anˈ dɩ ɛɛˈ ˈtmʋn.

“La Bible transforme des vies” (La Tour de Garde, 1er janvier 2012)