Dhɛwɛ- -ˈbhɛɛ -ɛ ˈye -aʋ sʋn bho po ˈˈdhe -a ˈye ˈo dhɛjɛɛn -za -a ˈye nʋn -ɛn?

-Aaˈ klɛɛ ˈbhleɛ dhɩ -a ˈye ˈo -za -a ˈye nʋn. Dhɩ aˈ -da -duuˈˈ -aa za ˈo ˈbhɛɛ ɩn ˈye -aʋ dhɛjɛɛn- -aeˈˈ dhɛsaʋn- ˈˈdhrui nʋn. Ɩn ˈbhɛɛ -ke ɩn ˈye -jhbhɛɛ- nɩan ˈo -abʋ -e Zoova ˈɲnɩn in -kuu -aeˈˈ ɩn ˈyeɛ ˈkɔɔ-. Dhɩ -ˈnɩɩn -a ˈbhɛɛa -a ˈyea ˈo -za -a ˈyea nʋn ɩn ka: -Da -aa ˈbɔan -a ˈyea -nɩn -aeˈˈ -ka -a ˈyea nʋn -a ˈyea ˈghwɛi ˈjhe -e ɛmɛn -e -bho -a -nɩn ɲɔn ˈye ˈˈbhli ˈˈtii -aeˈˈ -a -nɩn ɲɔn ˈse ˈˈbhli ˈˈtii- ɛˈ. -Bho -a -za ˈo dhɛjɛɛn -a nʋɛn ɛnˈ, -aaˈ ˈkmʋn an muɛn ˈdhɔɛe ˈmʋn -nɩn ˈˈdhe -aa muɛn ˈe Zoova ˈˈjhriɛ ˈdhe i -nmɔn.

1. -Kawɛ Biiblʋ ˈbhɛɛ ʋn ˈye ʋn sʋn bho po -wɛeˈ -ˈye ˈo dhɛjɛɛn -za -ˈye nʋn -ɛn?

-Bho ˈye ˈo dhɛ -za -ˈye nʋn ɛnˈ, bhae- Zoova ɔ ˈye ʋn sʋn bho po ˈˈdhe zro Biiblʋ -wɛeˈ -ka ɔɔ nʋan dhɛ -man ˈbɔan -ˈyea nʋn ɛɛˈ ˈjhe sʋn ɛn, -ˈyeɛ i ˈŋwɔn. (Zro Proverbes 2:3-6.) ˈDhe dhɩ -ˈnɩɩn ˈdhi ɛ, Zoova -toɛ- ˈo ˈtee ɲʋn ˈye ˈˈjhriɛ ˈˈdu. -Bho -man sa ˈtee -ˈnɩn ŋwɔn ˈjhe ɛˈ, -man za ˈo dhɛjɛɛn-.

ˈˈDhe -bho -ˈye dhɛ nʋn -wɛeˈ Biiblʋ ˈse dhɛ ooˈˈ dhɛ ˈtmʋn ˈdhe ɛɛˈ dɩ ˈdhi ˈdhe? -Ka ɛ ˈjhe ɛ -nɩn ɛnˈ, Zoova a muɛn ʋn sʋn bho -po -wɛe “-jie ˈyea ˈo ˈˈkpe -naan,” -ˈyeɛ jhibho-. (Isaïe 48:17) -Kawɛ? ˈSrɩn -nɩn ˈo -ɩn -ˈbhɛɛˈ -ɩn ˈye ʋn sʋn bho po. ˈSrɩn nɩan ˈe Biiblʋ ˈdhi ɛ, ɛ nɩn tɔˈdɩ- -ɩan- tɔɔn -abʋ Ɲɔnsoa aˈ tɔˈinaansʋn -e ɔɔˈ dhɩjhesʋn. -Zɔn -ˈnɔɔn -bho -aa sa Biiblʋ aˈ -bo dhueˈ ˈdhii zro ɛˈ, -aa ˈjheɛ Ɲɔnsoa aˈ dhɩjhesʋn-. -Bho -a jhibho- Ɲɔnsoa aˈ dhɩjhesʋn ɛnˈ, -a ˈbhɛɛˈ -a ˈye dhɩ -ɩan- nʋɔn ˈtʋn ˈo -za -a ˈye nʋn.

2. -Bho -a ˈye ˈo dhɛ -za -a ˈye nʋn ɛnˈ, dhɛwɛ- -a ˈye tɔˈ i -naan -an?

Biiblʋ ˈnaan: “Ɲɔn nɩan tɔˈ ˈdhi ɔɔ ˈsrooɛ ɔɔˈ -nan bhʋ -ˈgwlɩi.” (Proverbes 14:15) Dhɛ -ˈmɛn ˈdhaa -mɛn -nɩn -bho -a ˈye ˈo dhɛ -za -a ˈye nʋn ɛnˈ, -a ˈye tɔˈ i -naan -kajɔɔnka. -Bho -a ˈye ˈo dhɛ -za aˈ, -a ˈye -aaˈ ˈˈjɛ i dee-: “Biiblʋ aˈ ˈsrɩn -wɛ -ɩn ˈbhɛɛ -ɩn ˈye ʋn jie bho po -ɛ? Dhɛ ˈman muan ˈo -za ˈyea nʋn ɛn, ɛɛ muɛn -nʋn ˈman -glʋˈ ˈye bhlu? Dhɛ ˈman muan ˈo -za ˈyea nʋn ɛn, dhɛwɛ- ɛɛ mun ɲʋn -ˈnʋʋn ˈˈdhrui -nʋn -ɛn? ˈˈDhe -jɛn kɔandɩ -ˈyea -man ˈˈjɛ i dee -mɛn -nɩn, ɛɛ muɛn Zoova ˈmʋnan in -po?”​—Deutéronome 32:29.

Zoova -nɩn ɛnˈ -ka ɔ ˈye -aʋ dhɛ nɩan dhɛjɛɛn -e dhɛsaʋn ˈtmʋʋn-. -Bho -a jhibho- ɔɔˈ ˈtee -e ɔɔˈ ˈsrɩn -kajɔɔnka ˈˈdhe -aa sɩ ˈˈjhriɛ ˈˈdu ɛˈ, -aa kuuɛ -aaˈ -glʋˈ i. -Glʋˈ -nɩɛn- dhɛ -ɛ -nɩn ˈe ɲiɔn ˈmʋn -ɛɛ poɔ sʋn bho ɔɔ yea dhɛjɛɛn -e dhɛsaʋn ˈˈɩ jhibho. (Romains 2:14, 15) -Glʋˈ ˈjɛʋn an poɛ -aʋ sʋn bho -aa yea ˈo dhɛjɛɛn za -aa yea nʋn.

KPA DHƐ I ˈŊWƆƐN ƝAN

3. ˈˈTai- Biiblʋ i ʋn ˈye ʋn jie bho po

VIDEO: ˈˈTai- Biiblʋ aˈ ˈsrɩn in ɩn ˈye ʋn jie bho po (5:54)

• -Baanˈ- -wɛ Zoova nʋn -aʋ ˈˈdhrui -ɛ?

• Dhɛɛdɩ- Zoova ˈˈɲɩn -aʋ ˈˈkpeiflɔɛn -ɛn?

• Dhɛwɛ- ɔ ˈˈɲɩn -aʋ -wɛeˈ -a ˈye -aaˈ -glʋˈ dhbho -nʋʋn -kajɔɔnka -a?

-Bho -ˈye Biiblʋ aˈ ˈsrɩn anˈ kpɔ dhueˈ ˈjhe ɛˈ, zro Éphésiens 5:15, 16. -ˈMɛn dhɩ -ˈyea nʋn ˈˈdhe -ˈyea “-manˈ nɔnˈˈ dhbho -nʋʋn -kajɔɔnka,” aʋ ˈtmʋn ɩanˈ dɩ. Ɩanˈ -ˈnɩɩn ka:

• Zro Biiblʋ ˈdhii jheejhee.

• -Nɩn -kʋan- -aeˈˈ ˈɲnɔn, ˈˈɲnuunbhlei-, ˈˈjhu ɲmau- -aeˈˈ ˈˈjhu -ɲnʋnkpaoˈ ˈdhɔɛe.

• Mun ɲɔnsoagbu aˈ ˈˈdhruigbooɛ ˈmʋn jheejhee.

4. -Tɔɔn -manˈ -glʋˈ dhɛ -wɛeˈ -ˈye ˈo dhɛjɛɛn -za -ˈye nʋn

VIDEO: “-ˈBhle -glʋˈ ˈjɛʋn jheejhee” (5:13)

• ˈDhe video nɔn ˈdhi ɛ, ka ˈdhoudhi -ɲnʋnkpaoˈ -ˈnʋn nʋn ʋanˈ -glʋˈ dhɛ -tɔɔn sʋn ˈˈdhe ʋn -za ˈo dhɛ -ɛɛ nʋan Zoova ˈtʋn -ɛn?

Dhɛɛdɩ- dhɛ -a ˈyea nʋn ɛn, ɲʋn -ˈnʋʋn ˈseɛ ˈo -za i -ɛ? Zro Hébreux 5:14, -ˈmɛn aʋ ˈtmʋn ideedɩ- nɩn anˈ dɩ:

• Dee- ɲɔn in -wɛeˈ ɔ ˈtmʋʋn- mʋn dhɛ -ˈyea nʋn -bho ɛ se ˈˈɩkman- mɔn -dhe ɛˈ, dhɛwɛ- -aaˈ ˈˈjɛ ˈye nʋn -ɛn?

• Dhɩwɛ- -ˈbhɛɛ -ɩn ˈye ʋn sʋn bho po -wɛeˈ -ˈye -manˈ -glʋˈ dhɛ -tɔɔn ˈˈdhe -ˈye ˈo dhɛjɛɛn -za -ˈye nʋn -ɛn?

5. -ˈJhe ɲʋn -ˈnʋʋn anˈ -glʋˈ ŋwɔn

Ɛ se dhɛ -nɩan- dhueˈ ɲʋn anˈ klɛɛ za ˈo ʋa nʋn -nɩn. -Ka -aa ˈjhea ɲʋn -ˈnʋʋn anˈ -glʋˈ ŋwɔn, ka -a ˈye ɛɛˈ -to sʋn nʋn -ɛn? -A -naan dɩ aˈ kpɛ ˈsɔɔn nɩn tɔˈ ˈˈkpe i:

Dɩ 1: -Bho ʋan sa dhbho nʋn -aeˈˈ ʋn -nɩn ʋanˈ dhaiˈˈ -ˈˈwe -nɩn -da dhueˈ ɛˈ, ˈdhoudhi -ɲnʋnkpaoˈ dhueˈ -kman patalɔn gbɔ -tbha -dɩ. Ʋanˈ dhɛmʋnpaasʋn -ˈnʋn anˈ nʋn ˈdhoudhi -ɲnʋnkpaeˈ nɩan ˈe ʋanˈ ɲɔnsoagbu- -dhee ˈdhi ˈtʋn.

Zro Romains 15:1 -e 1 Corinthiens 10:23, 24, -ˈmɛn aʋ ideedɩ- nɩn anˈ dɩ:

• -Bho -a tbha ˈo Biiblʋ aˈ ˈˈjhri -ˈnɩn ˈˈkpei ɛˈ, dhɛwɛ- ˈdhoudhi -ˈnʋn ˈbhɛɛˈ ʋn ˈye ˈo -za ʋn ˈye nʋn -dhe -ɛ? -Bho -man sa ˈbɔn -ˈye dhɛ nʋn ˈˈdhe ɲɔn -nɩn dea i ɔɔˈ -glʋˈ aˈ ˈŋwɔɔɛn ɛnˈ, dhɛ -man mun -nʋn -ɛn?

Dɩ 2: ˈDhoudhi dhueˈ jhibhiˈ -ka Biiblʋ ˈsea ka nʋn ɲʋn anˈ ˈnan -e nmɔn -dhe, ˈklaa ɔmɔn ˈnaan ɔ ˈse nmɔn ŋwɔn -ˈdɩn in. -Zɔn dhueˈ ɔ -nɩn ˈdhoudhi -ˈˈwe ˈkpa -da dhueˈ ˈsʋ ɔ ˈjheɛ -ˈnʋʋn -ʋa- ˈnan nmɔn.

Zro Ecclésiaste 7:16 -e Romains 14:1, 10, -ˈmɛn aʋ ˈtmʋn ideedɩ- nɩn anˈ dɩ:

• -Bho ˈdhoudhi -ˈnɔn -naan Biiblʋ aˈ ˈˈjhri -ˈnɩn tɔˈ ˈˈkpei ɛˈ, dhɛwɛ- ɔɔ mʋn ˈo -za ɔ ˈye nʋn -ɛn? -Bho -ˈjhe ɲɔn ɔɔ sa dhɛ -manˈ -glʋˈ aˈ ˈŋwɔɔan nʋn ɛnˈ, dhɛwɛ- -ˈbhɛɛ -ˈye nʋn -ɛn?

Dhɛwɛ- -ˈbhɛɛˈ -ˈye nʋn ˈˈdhe -ˈye ˈo dhɛjɛɛn -za -ˈye nʋn -ɛn?

1. Dee- Zoova i ɔ ˈye ʋn sʋn bho po ˈˈdhe -ˈye ˈo dhɛjɛɛn -za -ˈye nʋn.​—Jacques 1:5.

2. -Bhlii Biiblʋ -e -aaˈ ˈsɛɩ -e ˈmʋnfeesɛɩ ˈdhii -wɛeˈ ˈsrɩn -ɩan- ˈtmʋan ɛnˈ dɩ ɛ, -ˈyɩ i ˈbɔn. -ˈBhɛɛˈ -ˈye ˈdhoudhi -ɔ jhibha dhɩ -duuˈˈ ˈdhe ɲɔnsoadhɛ ˈdhi i dee- -ke.

3. -Naan tɔˈ i -wɛeˈ dhɩ -man muan ˈo -za, dhɛ ɩn ˈbhɛɛa ɩn ˈyea -manˈ -glʋˈ -e ɲʋn -ˈnʋʋn anˈ -glʋˈ ˈdhrui nʋn ɛn, -ˈyɛ jhibho-.

DHƐWƐ- ˈCƖAN-?

-Bho -a ˈye ˈo dhɛ -za -a ˈye nʋn ɛn, -ka Zoova a nʋan ɛɛˈ ˈjhe sʋn -e dhɛ ɛ ˈbhɛɛa ɛ ˈyea ɲʋn -ˈnʋʋn ˈˈdhrui nʋn ɛn, ɩmɩn- -a ˈye tɔˈ ˈˈkpe i -naan ke tɛnˈˈ.

Dhɛwɛ- -ˈŋwɔn in -ɛn?

• -Kawɛ -ˈbhɛɛ -ˈye ˈo dhɛ -ɛɛ nʋan Zoova ˈtʋn -za?

• -Kawɛ -ˈbhɛɛ -ˈye -manˈ -glʋˈ dhɛ -tɔɔn?

• -Kawɛ -ˈbhɛɛ -ˈyeɛ -to -ka -man ˈjhea ɲʋn -ˈnʋʋn anˈ -glʋˈ ŋwɔn -ɔn?

ˈBƆN DHƖ -ˈNƖƖN ANˈ I ˈŊWƆAN IN

Dhɛ ˈyea -jhbhɛɛ nɩan ˈo mɔn -e Zoova ˈɲnɩn i -kuu ɛ, -kawɛ -ˈbhɛɛ -ˈyeɛ ˈo -za?

“Prenons des décisions qui honorent Dieu” (La Tour de Garde, 15 avril 2011)

Dhɩwɛ- Zoova a jhii dhi -wɛeˈ ɔɔ ˈˈdu -aʋ ˈsrɩn -ɛn?

Zoova a poɛ ɔɔˈ ˈcɛ jie bho (9:50)

Dhɛ poa ˈˈjhu dhueˈ sʋn bho -wɛeˈ ɔ za ˈo dhɛ -ɛɛˈ nʋanˈ kmanˈˈ an, ɛmɛn- -man mun ˈjhe-.

Dhɩ aˈ klɛɛ nmɔan ˈˈjhrii an ˈghwlʋɛ ˈe Zoova bho (5:46)

-Bho Zoova se ˈo ˈtee -to ˈdhe dhɛ -man ˈbɔan -ˈyea nʋn ɛnˈ dɩ ˈdhi ɛˈ, -ka -ˈbhɛɛa -ˈyea nʋn ˈˈdhe -ˈyea dhɛ -ɛɛ nʋan Zoova ˈtʋn ˈo -za a, ɛmɛn- -man mun ˈjhe-.

“Vous faut-il un commandement pour tout?” (La Tour de Garde, 1er décembre 2003)