NITA JA NGWEN ÑO
¿Ñokänti ni raba ja tötike bäri kwin Bibliabätä?
Ni nuateta ye ngwane nikwe ja ngwandre metre Daniel erere, ¿ñan ererea? Daniel nämene ja tötike nguseta Ngöbö Kukweibätä (Da 9:2). Ja tötikadre nguseta Bibliabätä, ¿ye raba ni dimike ño ja ngwen metre jankunu? Ni dimikai tö ngwen bäri Jehovata kukwe käbämike abokän rabai bare metre yei (Jos 23:14). Arato Ngöbö rabai bäri tare nikwe aune yekwe ni töi mikai ja ngwen kwin (Sl 97:10). Akwa, ¿nuaindre ño? Töbike kukwe nieta ja känenkäre nebätä.
¿Drebätä ja tötikadre? Nita ja tötike ngwane, nikwe ja tötikadre gätä kräke arato. Nita ñäke Bibliabätä ngwane, kukwe ñaka nüke gare nie ye kräke nikwe kä diandrekä jai kukwe ye mikakäre gare bäri kwin jai ye käkwe ni dimikai krubäte. Ne madakäre, kukwe nieta Bibliabätä, üai deme tä ni töi mike kukwe keta kabre nuainne, apóstol Pablo sribibare misionero o jondron sribebare Jehovakwe yebätä nitre ruäre tä ja tötike nguseta. Biblia yebätä nita kukwe ngwentari jai ngwane, ni raba tike jai ja tötikakäre bäri kukwe yebätä ja känenkäre.
¿Medente kukwe raba kwen nie? Video Programa sribebare kukwe ütiäte Bibliabätä ye mikakäre gare jai ye raba ni dimike kukwe yebätä. Ñodre, Daniel käkwe jondron nire krikri krubäte tuani nieta kapitulo 7 yekänti ye tä juta bäri dite meden meden bämike yebätä ni raba ja tötike.
¿Kä nuäi te nikwe ja tötikadre? Ni tädre kwin kukwe ja üairebiti ye kräke nikwe ja tötikadre käre. Ni raba ja tötike ora braibe te aune bätärekä jatäri ni raba ja tötike bäri raire. Ja tötikadre Ngöbö Kukweibätä ye abokän jondron ütiäte ükani känänta ye kwrere: kukweta nemen gare bäri nie ngwane, ni törbai ja tötikai bäri nguseta (Pr 2:3-6). Nikwe Ngöbö Kukwei taredi bäri aune nikwe ja tötikai käre Bibliabätä (1Pe 2:2).
JONDRON NIRE KRIKRI KRUBÄTE NIETA DANIEL KAPITULO 7 YEKÄNTI, ¿YE TÄ DRE BÄMIKE?
Da 7:4
Da 7:5
Da 7:6
Da 7:7
KUKWE MADA NGWANTARITA:
¿Kukwe nieta Daniel 7:8, 24 yete ye namani bare ño?
KUKWE MADA JA TÖTIKAKÄRE JA KÄNE:
Jondron nire krikri krubäte nieta Revelación kapitulo 13 yekänti, ¿ye tä dre bämike?