Diridre ye ngwane ni mada ngübadrebätä bätärekä
1. ¿Jehovata ni kä tibienbätä ngübarebätä bätärekä ye tä bämike ño?
1 Ngöböta ni kä tibienbätä ngübarebätä bätärekä, ñobätä ñan aune niara tö nitre tuai ja mäke ben (Éxo. 34:6; Sal. 106:41-45; 2 Ped. 3:9). Ngöböta ni ngübarebätä bätärekä ye tä bämike kukwe keta kabrebiti; keteiti bäri ütiäte ye abokän Gobran Kwe kukwei drieta kä jökräbiti tibien. Kä nikanina bäsi mil krobu ta Jehová tä nitre brukwä kwin töi mike näin ja kokwäre, aune täbe nuainne kä nengwane (Juan 6:44). ¿Jehovata ni ngübarebätä bätärekä ye ni raba bämike ño nita kukwe dirire ye ngwane?
2. ¿Kukwe drieta yekänti ni raba bämike ño nita ni mada ngübarebätä bätärekä?
2 Kukwe drieta ju ju te. Nitre jämi ja töi mike kukwe Ngöbökwe yebätä yei nita niken kukwe ‘driere jankunu’, angwane Jehová tä ni ngübarebätä bätärekä ye erere nita ja töi mike (Hech. 5:42). Nitre ñaka töta nemen ni kukwe nuai, tätre nemen ni kötaire, tätre ja mike kukwe drieta nikwe ye rüere, akwa nita niaratre ngübarebätä bätärekä (Mar. 13:12, 13). Arato, nitre tö kukwe mikai gare jai ye ñaka tä kwen gwi nie, akwa yebiti ta nita ja di ngwen kukwe metre mike gare ni jökrä ie, angwane yebiti nita bämike nita ni mada ngübarebätä bätärekä.
3. Nita nitre tuinbiti aune tötike Bibliabätä ye ngwane, ¿ñobätä ja töi mikadre nitre ye ngübarebätä bätärekä?
3 Nitre ja tötikaka Bibliabätä. Kri mu nökata ye ngübata bätärekä ne kwe ririadre. Ni raba kri mu ye ngübare kwin, akwa ye ñan aibätä ririai jötrö ngwarbe (Sant. 5:7). Ye erere arato ni ñaka tä nirien bengwairebe kukwe ja üairebiti, ñakare aune nuainta bätärekä bätärekä (Mar. 4:28). Kukwe ñaka tuin kwin Ngöböi abokän nitre ja tötikaka nibe ruäre tätre mike täte o nuainne, aune ye ñaka nuäre tuanemetre kräketre. Niaratre käkwe ja töi kwitadre jötrö ngwarbe ye ñaka ribedre ietre; ñakare aune nikwe niaratre ngübadrebätä bätärekä ne kwe Ngöbö üai käkwe niaratre töi kwitadre (1 Cor. 3:6, 7).
4. ¿Ja töi mikata ni mada ngübarebätä bätärekä ye käkwe ni dimikai ño dirire kwin ni mräkätre ñaka kukwebätä yei?
4 Ni mräkätre ñaka kukwebätä. Ni mräkätre ñaka kukwebätä yei kukwe metre rabadre gare ie ni tö; ñongwane ni raba kukwe mikata täte nikwe ye mike gare ietre ye nita ngübarebätä bätärekä, akwa nikwe nuaindre ye ngwane ñaka kukwe mikadre gare krubäte ietre (Ecl. 3:1, 7). Nita kukwe kwin bämike niaratre okwäbiti bätä nita juto biare kukwe Ngöbökwe mikakäre gare ietre, akwa nuaindre töi jämebiti aune mikadre tuin ütiäte jai (1 Ped. 3:1, 15). Nita dirire ye ngwane nikwe nitre mada ngübadrebätä bätärekä ye köböire sribi ye nuaindi kwin aune ye käkwe kä mikai juto ni Rün kä kwinbiti yebätä.