Nikwe ‘ni mada taredre aune mikadre tuin bobre jai’
1. ¿Nitre tä dre ribere bäri jai kä nengwane?
1 Kä nengwane nitre kwati tä ja di ribere bäri. Kukwe tare tä nakainkä kä jökräbiti tibien ye tä nitre kwati mike ulire krubäte, kä ñaka nuäre bätätre aune kukwe kwin ñaka kräketre tätre nütüre. Nitre kwati krubäte tätre ja di ribere ye gare ni kristiano ie, ye medenbätä nikwe niaratre mikadre tuin bobre jai dimikakäre (Mat. 22:39; Gál. 6:10). ¿Ni töita ni mada dimikabätä ye ni raba bämike ño?
2. ¿Nita ni mada mike tuin bobre jai ye bämikadre ño?
2 Nitre mikata tuin bobre jai yebätä sribi ye nuainta. Ngöbö aibe raba ni dimike nünankäre jäme (2 Cor. 1:3, 4). Jehovata ni nübaire nikwe ‘ni mada taredre aune mikadre tuin bobre jai’, bätä nikwe kukwe kwin Gobran kwe yebätä ye driedre nitre madai ye tä nuainmana nie arato (1 Ped. 3:8). Nikwe sribi ye nuaindi jankunu angwane ‘nitre tä ulire’ ye nikwe dimikai, ñobätä ñan aune Gobran Ngöbökwe ye aibe käkwe ja tare nikata ye mikai krüte (Isa. 61:1). Nitre Jehová mikaka täte ye tuin bobre ie, ye medenbätä köböra kukwe tare ye mike krüte aune ye bitikäre kä tibien ne ükaite kwin kwe (2 Ped. 3:13).
3. ¿Jesukwe ja töi mikani nitre mada kräke ye erere ni raba nuainne ño?
3 Jesús nitre mikani tuin ño jai ye erere nuaindre. Jesús nämene kukwe driere nitre kwati ie, akwa niara nämene ni itire itire ye mike tuin ütiäte jai. Nitre ye nämene kukwe ja üaire ribere jai ye nämene gare ie, nitre ye namani tuin ie obeja ngübaka ñaka kwrere ye käkwe niara töi mikani dirire bätärekä ietre (Mar. 6:34). Nikwe nuaindi Jesús erere angwane, ye käkwe ni töi mikai nitre mike tuin bobre jai; nita blite ño bentre aune nita kä mike ño ja ngwärebätä yebiti nikwe kukwe ye bämikai ietre. Arato, kukwe drie ye nikwe nuaindre käne aune kukwe meden ütiäte nitre kräke yebätä nikwe blitai bentre (1 Cor. 9:19-23).
4. ¿Ñobätä nikwe “ni mda mda [...] [mikadre] ruin bobre jae”?
4 Nita Gobran Ngöbökwe kukwei driere bätä nita ja töi mike ni mada dimikabätä ye köböire nitre kwati krubäte kä jökräbiti tibien tä kukwe kwin ye kain ngäbiti. Nikwe “ni mda mda [...] [mikadre] ruin bobre jae”, yebiti Ngöbö Jehová ni mikaka tuin bobre jai ye nikwe käikitaikä aune kä mikai juto niarabätä (Col. 3:12, Kukwe Kuin Ngöbökwe [KKN]).