Mäkwe diri bäri kwin: nitre ja tötikaka yekwe ja tötikadre käre ye mäkwe drie ietre

Ñobätä ütiäte. Ni ja tötikaka rabadre ünä kukwe ja üairebiti yekäre, kukwe nguseta drieta Bibliakwe ye mikadre nemen bäri ja töite aune ja brukwäte kwe (Heb. 5:12–6:1). Erametre, ja tötikakäre ja di ngwandre krubäte, ñobätä ñan aune kukwe meden niena gare nie aune kukwe meden tä nemen gare nie bätä nuaindre ño yebätä töbikadretari (Prov. 2:1-6). Nitre ja tötikaka Bibliabätä tö kukwe meden mikai gare jai ye niaratre rabadre känenentari akwle tärä sribeta nikwe yebätä. Kukwe meden nemen gare ietre ye tätre ja di ngwen nuainne angwane, ye käkwe dimikai kä ngwen nüke jai kukwe tare ben ja tuadi kwetre ye ngwane (Luc. 6:47, 48).

Nuaindre ño:

Ja tötikata batire batire ye ngwane, oradre Jehovai ye ütiäte krubäte mäkwe mika gare ie (Juan 14:26; 1 Cor. 2:10).
Kenanbe mäkwe nie ni ja tötikaka yei rabadre ja mike juto ja tötika Bibliabätä ye känenkri. Kukwe meden bäri ütiäte mikata gare ye täräi mikadrekä ño kwe ye mäkwe drie ie aune mätä nuainne ño ye mäkwe mika tuare ie tärä mäkwe yebiti.
Mäkwe nie ni ja tötikaka yei kukwe niedre kwe ja kukweire. Mäkwe ñaka kukwe ngwantari ie ne kwe ñäkädre jerekäbe kwe täräbätä.
Mäkwe ni ja tötikaka ye töi mika ñäke Bibliabätä mantre jetebe. Kukwe ükaninte ni dimikakäre ñäke Bibliabätä ye raba kwen ie Internet käi jw.org yekänti ye mäkwe nie ie. Ja di ngwandre akwle ñäkäkäre Bibliabätä ne kwe nuain jatadre käre, akwa ja di ngwandre ye köböire kukwe kwin rabai bare (Sal. 1:2, 3).
Ni ja tötikaka tö kukwe Bibliabätä mikai gare jai ye raba känene ño Watchtower TÄRÄ JÖKRÄ INTERNETE yekänti ye mäkwe drie ie. Tärä meden medenbätä ja tötikata bäri gätäte aune símbolo meden tärä yekwe ye mäkwe dimika känene.

Mäkwe kukwe ne nuain sö krati:

Mäkwe ja tötika subtítulo o kapitulo keteitibätä, ye bitikäre ni ja tötikaka ie kukwe meden namani gare ye niedreta kwe kukwe braibebiti ye mäkwe ribe ie. Gwäune mä ñaka ni mada tötike jire angwane, texto keteiti Bibliabätä o párrafo keteiti täräkwata Ni Mikaka Mokre yebätä ye mäkwe nie kukwe braibebiti. Ye käkwe mä dimikai kukwebätä mätä ñäke ye mike nüke gare bäri kwin jai.