Nita ja tarere ye mikadre bäri dite jankunu

1, 2. a) ¿Ñobätä apóstol Pablo käkwe niebare ja taredre ye abokän töi kwin “bäri kri”? b) ¿Kukwe ngwantarita medenbätä nikwe ja kitai?

APÓSTOL Pablo blitabare töi kwin keta kabrebätä, ñodre: tödeka, tö ngwanta aune ja tare, akwa “ja tare ye abokän bäri kri” niebare mrä kwe (1 Cor. 13:13). ¿Ñobätä niebare kwe? Nita tö ngwen kukwe käbämikata kä mrä bä nuäre yebätä ye nikwe ñaka ribedi jai, ñobätä ñan aune rabaira bare. Akwa Jehová aune ja mräkätre ye abokän nikwe taredre jankunu. Ñobätä ñan aune nikwe ja taredi kärekäre.

² Nikwe käre ja taredi, ye medenbätä ani töbike kukwe ngwantarita ketamä nebätä. Kena, ¿ñobätä nikwe ja taredre kwärikwäri? Ketebu, ¿nita ja mräkätre tarere ye ni raba bämike ño? Ketamä, ¿nita ja tarere ye ni raba mike ño bäri dite?

¿ÑOBÄTÄ NIKWE JA TAREDRE KWÄRIKWÄRI?

3. ¿Kukwe meden ütiätebätä nikwe ja taredre kwärikwäri?

³ ¿Ja taredre kwärikwäri ye ñobätä kwin krubäte? Keteiti ye abokän nikwe ja taredi ngwane, ni abokän kristiano erametre nikwe bämikai. Jesukwe niebare nitre ja tötikaka kwe ie: “Munkwe ja taredre kwärikwäri tita niere munye, ne kwrere munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:35). Ne madakäre, ja tare ye köböire nita nemen keteitibe. Ye medenbätä Pablokwe niebare, mun rabadi ja mäke “era metre jabe kwärikwäri” (Col. 3:14). Aune kukwe mada ütiäte bätä ja taredre. Apóstol Juan kukwe tikani ja mräkätre kristiano ie “nire nire käta Ngöbö tarere ye käkwe mräkä taredre arato” (1 Juan 4:21). Ye medenbätä nita ja mräkätre tarere ngwane, nita Jehová tarere.

4, 5. Jehová tareta aune ja mräkätre tareta ye ja erebe mä raba bämike ño?

⁴ ¿Ngöbö taredre ye ñobätä ja erebe ja mräkätre taredre yebe? Kukwe ne rükadre gare nie yekäre ani bämike, ni brukwä tä sribire ño ni ngrabare yebe yebiti. Ni brukwä tä kwin o ño ye mikakäre gare jai doctor tä kise mike ni kise bikin yebiti. ¿Kukwe bämikata ne tä dre driere nie?

⁵ Ni därie tä bete jötrö krubäte o bätäre dikaro yebiti tä nemen gare doctor ie ni brukwä tä kwin o ñakare, ye erere arato nita Jehová tarere ye tä dite o ño mikakäre gare jai, nita ja mräkätre tarere o ño yebiti raba nemen gare nie. Ni ñaka ja mräkätre tarere krubäte ye ngwane Jehová ñan tare nikwe raba nemen gare nie. Akwa nita ja mräkätre tarere ye nita bämike bä kabre ie ngwane Jehová tare nikwe rabai gare nie.

6. ¿Ni ñan ja mräkätre tarere rabadre gare nie ngwane ñobätä ni mikadre mokre? (1 Juan 4:​7-9, 11).

⁶ Ni ñaka ja mräkätre tarere krubäte ngwane rabadre ni mike mokre. Ñobätä ñan aune nita ja kete Jehovabe ye tä kukwe kri te. Ye mikani gare apóstol Juankwe kukwe nebiti: ‘Ñobätä ñan aune nire ie mräkä tuin abokän nuäre taredre, akwa tä tarere ñakare, ¿se abokän Ngöbö tuin ñakare ye abokän tareta era kwe ya? Ñakare jire chi’ (1 Juan 4:20). ¿Kukwe ne tä dre driere nie? Nikwe ja mräkätre taredi ngwane Jehovakwe ni kai ngäbiti (ñäkädre 1 Juan 4:​7-9, 11 yebätä).

¿NITA JA TARERE KWARIKWARI YE BÄMIKA RABA ÑO?

7, 8. ¿Nita ja tarere kwärikwäri ye ni raba bämike ño?

⁷ “Munkwe ja tare kwärikwäri”, kukwe nieta ne tä kwen bä kabre Bibliabätä nie (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Akwa ja tare ye abokän tä nirien ni brukwäte; ñan raba tuin jire. ¿Nita ja mräkätre tarere ye ni raba bämike ño, ne kwe jutuadre? Nita kukwe niere aune ja ngwen ño yebiti ni raba bämike.

⁸ Ja mräkätre tare nikwe ye ni raba bämike kukwe keta kabrebiti. Biblia tä kukwe ruäre mike gare nie: “Munkwe kukwe metre nie jai kwärikwäri” (Zac. 8:16). Munkwe nüna “jäme jabe kwärikwäri” (Mar. 9:50). “Munkwe ja mikadre bäri ütiäte jae kwärikwäri. Yebtä munkwe ja kitadre bäri” (Rom. 12:10). “Munkwe ja ka ngäbti kuin kwärikwäri” (Rom. 15:7). “Munkwe ñan ja ngie mika amne […] munkwe kukwe ye dian jabti ta kwärikwäri” (Col. 3:13). “Kukwe mun itire itire kwe, ye ie munkwe kötä mika gwaire jökrä ja die mikakäre kwärikwäri kärekäre köbö kwatirekwatire. Munkwe ja die mikadre kore ne ngwane, nikwe nünandre ño ükaninte Kristokwe ye mikadi täte munkwe” (Gál. 6:2). “Munkwe blita kukwe nebtä ja die mikakäre kwärikwäri” (1 Tes. 4:18). “Munkwe ja mika bäri dite nünakäre” (1 Tes. 5:11). “Munkwe blita Ngöböbe jakrä kwärikwäri” (Sant. 5:16).

9. ¿Nita nitre mada dimike yebiti tare nikwe nita bämike ie ñobätä nie raba? (Üai mikadre ñärärä).

⁹ Nita ja mräkätre tarere bämikadre ño miri gare párrafo 8 ye keteiti ani mike gare bäri nguseta jai. Pablokwe niebare: “Munkwe blita kukwe nebätä ja die mikakäre kwärikwäri”. ¿Ja die mikata kwärikwäri yebiti ja mräkätre tare nikwe nita bämike ye ñobätä nita niere? Tärä keteiti tä kukwe bibliabätä mike gare yete kukwe griegore biti “munkwe blita kukwe nebätä ja die mikakäre kwärikwäri” ye abokän “ni iti tä ni dimike nita ja tuin kukwe tare ben” ye gärätä. Aisete ja mräkä iti tä ja tuin kukwe tare ben ye ngwane nita juto biarbe dimikakäre ye köböire nita dimike näin jankunu ji ja nire kokwäre yebiti. Ja mräkä iti tä ja tare nike yebätä tä muen krubäte ngwane nita juto biarbe dimikakäre yebiti nita bämike tare nikwe (2 Cor. 7:​6, 7, 13).

10. ¿Nitre mada töi mikadre jäme aune dimikadre ye ñobätä nuainta gwairebe nie raba?

¹⁰ Ni mada mikata tuin bobre jai ngwane di mikata aisete kukwe ketebu ye nuainta gwairebe. ¿Ñobätä nieta? Ñobätä ñan aune ni iti tä ja tuen kukwe tare ben ngwane tä nemen tuin bobre nie yebätä kukwe ruäre nuain töta nemen dimikakäre. Aisete käne ni ye tä nemen tuin bobre nie biti ni töta nemen töi mikai jäme. Ye erere nemen bare Jehovabätä. Pablokwe niebare nitre tä nemen tuin bobre Ngöböi yebätä töta nemen dimikabätä. Aune Ngöbö ie nita nemen ruentari tare kärekäre (2 Cor. 1:3). Nita nemen ruentari tare ye medenbätä ni iti mikata nemen tuin bobre jai mikata gare. Jehová ye abokän nierare ni mikaka ruentari tare jai, ne madakäre Jehová töi kore yebätä niara töita nemen nita ja tare nike bätäkä ngwarbe ngwane ni dimikabätä (2 Cor. 1:4). Nita ngrötö ñö miare ye ngwane nita ñö ñain ye köböire nita nementa dite, ye erere arato Jehová tö ni töi mikai jäme aune ni dimikai nita ja tuin kukwe tare ben ye ngwane. ¿Dre raba ni dimike nitre mada töi mike jäme aune dimike Jehová erere? Ja töi mikadre kwin keta kabre nitre töi mikakäre jäme. Ruäre bätä ani ja kite.

11. Colosenses 3:12 aune 1 Pedro 3:​8, ¿tä kukwe niere erere töi kwin meden raba ni dimike nitre mada tarere aune dimike?

¹¹ ¿Dre ni dimikai nitre töi mike jäme aune ja tarere jankunu köbö kwatirekwatire? Nikwe ja töi mikadre töi kwin ne erere nuainne: ja töi mikadre nitre mada töi mike nüke gare jai, nitre mada tarere aune kukwe kwin nuainne nitre mada kräke (ñäkädre Colosenses 3:12; 1 Pedro 3:8 yebätä). Nitre mada mikadre tuin bobre jai aune töi kwin keta kabre mada ye tä nikwe ngwane nitre tä ja tuin kukwe tare ben ye ñan rabai tare ni kräke dimikakäre. Jesukwe mikani gare krörö: “Ni moto ño aune ni töi ño ye kwrere nita blite ne aisete ni moto kwin ne ngwane nita blite kwin ni mada mada die mikakrä” (Mat. 12:​34, 35). Nibira gare metre nie nita ja mräkätre dimike yebiti nita niaratre tarere nita bämike ye ütiäte krubäte.

¿JA TARETA YE MIKADRE ÑO DITE JANKUNU?

12. a) ¿Ñobätä nikwe ja ngübadrebiti? b) ¿Kukwe ngwantarita meden mikai gare jai?

¹² Ni jökrä tö kukwe ne mikai täte: “Ani ja tarere kwärikwäri” (1 Juan 4:7). Akwa Jesukwe ni mikani mokre ne nikwe ñaka käi kwitadrekä jabiti: “Bäsi ni jökrä ñan rabadi ja tarere kwärikwäri” (Mat. 24:12). Akwa nitre ja tötikaka kwati Jesukwe yekwe ñaka ja taredi ye ñan ai gäräbare kwe. Nitre ja ngwanka käme ñaka tä ja tarere yebätä nikwe ja ngübadrebiti ne kwe nikwe ñaka ja ngwandre ye erere. Kukwe nebe töbätä, ani kukwe ngwantarita ne mike gare jai: ¿ja mräkätre tareta metre o ñakare ye raba nemen gare nie?

13. ¿Nitre mada tare nikwe ye ñongwane ñan raba nemen nuäre ni kräke bämikakäre?

¹³ Kukweta nemen bare nibätä ye ngwane ño nita ja ngwen aune ja töi mike ño yebiti nita ja mräkätre tarere erametre o ñakare raba nemen gare nie (2 Cor. 8:8). Kukwe keteiti ye Pedrokwe kädekaninte: “Nita ja tarere era metre kwärikwäri angwane, ni mdata ja mike ngite ni rüere angwane nita juto biare denkä jabti ta, aisete munkwe ja taredre kri kwärikwäri, ye abko bäri kuin” (1 Ped. 4:8). Aisete ni mräkätre tä ja mike ngite o tä kukwe tare nuainne nibätä ye ngwane nita niaratre tarere nuäi ye tä nemen gare nie.

14. 1 Pedro 4:​8, tä niere erere ¿nikwe ni mada taredre ño? Mä raba bämike keteiti.

¹⁴ Pedrokwe kukwe tikani yebätä ani ja kite bäri nguseta. Bersikulo 8 yekänti kenanbe niebare kwe: “ja taredre erametre”. Kukwe griegore biti “ja taredre era metre” ye abokän ja tare ye “tä nirien jankunu” meden gärätä. Bersikulo nekänti kukwe ketebu bätä blitata ye abokän ja taredre kri kwärikwäri: ye abokän ngite kitakata ta ni madabiti yebätä blitata. Mesa tä ngianinkä, jurore aune tä käme ye ngwane dänkwä metateta biti jue mikakäre ne kwe ñan jutuadre, ye erere arato ja tare yebiti ngite kitata ta ni madabiti, akwa ñan batibe o bobu aibe ñakare aune bä kabre, dänkwä metateta mesabiti ye erere. Kukwe miri gare nebiti dänkwä metateta ye abokän ngite kitakata ta ni madabiti ye gärätä.

15. ¿Nita ja mräkätre tarere erametre ye ngwane dre nuainta? (Colosenses 3:13).

¹⁵ Nikwe ja mräkätre taredre kri krubäte ne kwe rabadre nuäre ngite kitakäre tabiti ñan raba nemen nuäre ni kräke nuainkäre yebiti ta (ñäkädre Colosenses 3:13 yebätä). Nita ngite kite ta ni madabiti ye ngwane nita tarere era metre nita bämike aune Jehová ni kadre ngäbiti ie ni tö nita bämike, ¿dre mada raba ni dimike ngite kiteta ni madabiti tä ja mike ngite ni rüere bätä tätre kukwe nuainne ñan tä nemen tuin kwin nie ye ngwane?

16, 17. ¿Ja mräkätre tä ja mike ngite ni rüere ye juankäre tabiti dre mada raba ni dimike? Mä raba mike gare keteiti. (Üai mikadre ñärärä).

¹⁶ Mäkwe ja töi mika kukwe kwin nitre madabätä aune ñaka kukwe blo bätätre yebätä. Mäta ja mräkätre kwati ben kä ngwen juto jabätä ye bämike ja töite. Köbö ye ñan kä rikwitadrekä mäbiti yekäre mäkwe ja töi mikadre foto denkä krämä. Foto keteite yebätä ja mräkä iti üai tä ngedenkä blo, ¿ye ngwane, mäkwe dre nuaindre? Bengwairebe mäkwe üai ye diandrekä aune ketebu känti ja mräkätre jökrä tä kä juto biti ye aibe mäkwe tuanemetre, ¿ñan ererea?

¹⁷ Foto tä nikwe ye abokän kukwe ngwandre törö jai ye kwrere. Kukwe kwin namani bare ja mräkätre ben abokän aibe tä nüke törö nie. Ni iti käkwe kukwe nuainbare o kukwe niebare abokän ñan namani kwin mä kräke ye ngwane, ¿mäkwe dre nuaindre? ¿Ñobätä mä ñan kukwe ye kai kwitekä jabiti foto tä ngedenkä blo diankata ye kwrere? (Prov. 19:11; Efes. 4:32). Ja mräkä iti ben nikwe kukwe keta kabre kwin nuainbarera ye medenbätä rabai nuäre ni kräke kukwe ruäre blo nuaindre kwe ye käi kwitakakäre jabiti. Bäri kwin “foto bä nuäre” ye aibe ükadre.

¿JA TAREDRE YE ÑOBÄTÄ ÜTIÄTE KÄ NENGWANE?

18. ¿Kukwe meden ütiätebätä blitani kukwe ja tötikara nekänti?

¹⁸ ¿Ñobätä ni tö ja mräkätre tarei jankunu? Ñobätä ñan aune nibira gare nie erere, nita ja mräkätre tarere ngwane nita Jehová tarere. ¿Nita ja mräkätre kukwebätä tarere ye ni raba bämike ño? Rabadre bare nie yekäre nikwe ja di ngwandre kukwe kwin niere ietre töi mikakäre jäme. Aune, nuainkäre jankunu, nikwe niaratre mikadre tuin bobre jai. ¿Nita ja mräkätre tarere ye tädre ño dite jankunu? Nikwe ja di ngwandre ngite kite ta nitre madabiti.

19. ¿Nikwe ja taredre erametre ye ñobätä ütiäte kä nengwane?

¹⁹ ¿Ja taredre erametre kä nengwane ye ñobätä ütiäte krubäte? Pedrokwe kukwe niebare nebätä ani töbike: “Kä mrä kitera nüke […] aisete munkwe ja taredre kri kwärikwäri” (1 Ped. 4:​7, 8). ¿Kä krüte kitera bäri ja ken ye medenbätä nikwe dre ngübadre? Jesukwe blitabare nitre ja tötikaka kwebätä ngwane niebare kwe: “Munta tödeke tibiti ye dokwäre ni kwati nünanka kä ketareketare temen mätä rabadi munbätä” (Mat. 24:9). Ni tö sribire jankunu Jehová kräke ja mikai ni rüere yebiti ta yekäre ni tädre keteitibe ja mräkätre ben. Satana tö ni ñäkäibiti akwa ja rädi ngwarbe kwe, nikwe ja taredi erametre ye ngwane. Ñobätä ñan aune ja tare ye köböire abokän nikwe ja ketai kwin jabe kwärikwäri (Col. 3:14; Filip. 2:​1, 2).