Mäkwe Jehová känä Sansonkwe nuainbare erere

1, 2. ¿Kukwe namani bare Sansonbätä yebätä ja kitadre ye ñobätä kwin?

¿BLITATA Sansonbätä ngwane drekebe ngwarbe dreta nüke mä töite? Ni dite krubäte ye bäta nemen mä töite, ¿ñan ererea? Jän ye metre, akwa ni dite krubäte ne käkwe ja mikani ngite, ye medenbätä kukwe tare namani barebätä. Akwa yebiti ta niarakwe ja ngwani metre Jehovai yebätä Jehovakwe ja töi mikani aune kukwe ye tikamananbare kwe Bibliabätä ne kwe nikwe ja kitadre niarabätä.

² Sansón yebiti Jehovakwe kukwe ñan tuabare nuainbare juta kwe Israel ye kräke. Sansón krütani ye bitikäre siklo nikani ruäre ta ngwane, Jehovakwe apóstol Pablo töi mikani niara kädekete nitre tödekaka kädekaninte ye ngätäite (Heb. 11:​32-34). Sansonkwe käre Jehová känänbare ja di mikakäre aune kukwe ñan nuäre ben ja tuani kwe ye ngwane arato. Kukwe ne tä ni dimike krubäte aune dre raba nemen gare nie ja töi kräke kukwe nebätä ye rabai gare nie kukwe ja tötikara nebätä.

SANSÓN TÖ NGWANI JEHOVAI

3. ¿Sribi meden mikani Sansón kisete?

³ Sansón därebare ye ngwane, nitre filisteo nämäne juta Israel ye gobraine aune nämäne mike klabore ja kisete (Juec. 13:1). Nitre filisteo ye käme krubäte yebätä nämäne nitre israelita ngwen ja tare nike krubäte. Aisete, Jehovakwe Sansón dianinkä ne kwe “nitre israelita mikadre kwäre kwe nitre filisteo ye kisete” (Juec. 13:5). ¡Kukwe ñan nuäre! Ye medenbätä, namani tö ngwandre Jehovai Sansón ie.

4. ¿Jehovakwe Sansón dimikani ño? (Jueces 15:​14-16).

⁴ Sansón nämene tö ngwen kwatibe Jehovai ye bämikani kwe bati. Nitre kwati filisteo rükä nikani Lehí, Sansón kakäre ngite kä ye nemenkä Judá raba ruin nie. Nitre Judá yebätä kä jürä namani krubäte. Yebätä niaratre kwe Sansón biani rüe ie. Sansón etebakwe küde mäkäni kö krobu mrä yebiti aune jänikani kwe nitre filisteo ie (Juec. 15:​9-13). Akwa “Ngöbö üai deme käkwe niara mikani dite”, di namani krubäte yebätä ja tikaninte kwe. Ye bitikäre, “burro krä nämäne kwin kwani ie”, yebiti ¡nitre filisteo mil jire kämikani kwe! (Ñäkädre Jueces 15:​14-16 yebätä).b

5. ¿Sansón nämäne tö ngwen Jehovai ye bämikani ño kwe?

⁵ ¡¿Burro kräräkrä yebiti ya?! ¿Ñobätä Sansónkwe rübare burro kräräkrä yebiti? Niarakwe tö ngwandre kwatibe Jehovai ye bäri ütiäte jondron rükäre ye kräke ye nämäne gare kwin ie yebätä. Niara nämäne tö ngwen kwatibe Jehovai yebätä dre kwani käne ie yebiti Jehová töi mikani nemen bare kwe. Tö ngwani kwe yebätä Jehovakwe dimikani ganane.

6. ¿Kukwe namani bare Sansonbätä yebätä dre raba nemen gare nie?

⁶ Ye erere, Jehová raba ni dimike sribi bianta nie juta kwe te ye mike nemen bare, ñan raba nemen bare nie raba ruin nie yebiti ta. Jehová tä ni dimike ye raba ni töi mike ñan krütare. Mäkwe Jehová känändi ja dimikakäre ngwane, niara mä dimikai aune mä mikai dite namani bare Sansonbätä erere, yei mäkwe tö ngwen kwatibe (Prov. 16:3).

7. ¿Jehová känändre ja jie ngwankäre ye kukwe meden köböire nüke gare kwin nie?

⁷ Ja mräkätre kwati tä sribire ju sribebätä, ye tätre tö ngwen Jehovai bämikata kwetre. Mekerabe ja mräkätre nämäne ju ja ükarakrö aune ju mada sribere jondron mada kräke ngwane, sribei ño yebätä nämäne töbike kwin käne. Juta Jehovakwe jatani nirien jötrö ngwarbe yebätä kukwe ruäre kwitani jene. Ja mräkätre ji ngwanka Jehová känänbare ja jie ngwankäre aune kukwe ükaninte mrä kwetre sribi nuainkäre. Ñodre ju sribebare ye köka jatani aune ükate jatani. Bitinkä ja käne Robert, tä sribire ju sribeta kä keta kabre känti käbiti tibien yebätä tä niere: “Ja mräkätre kräke kukwe mrä ne ñan namani nuäre ka ngäbitikäre. Kukwe nuain nämäne ño kena ye erere ñan nuain jatani. Akwa ja mräkätre käkwe ja di ngwani kukwe ne kain ngäbiti ye köböire Jehová nämäne kukwe ne ji ngwen ye namani gare metre”. Kukwe ne tä mike gare metre Jehovata juta kwe jie ngwen ja töi mikakäre nemen bare. Ruäre ngwane nikwe kukwe ne erere ngwandretari jai: “¿Tita Jehová känene ja jie ngwankäre aune tita ja di ngwen käre kukwe ükateta jene ye ka ngäbitikäre?”

JEHOVAKWE SANSÓN DIMIKANI YE KANI NGÄBITI KWE

8. ¿Ñö medei namani krubäte Sansón ie ngwane dre nuainbare kwe?

⁸ Sansón ye abokän ni dite krubäte bämikani kwe ye kukwe madabätä nüke törö mäi arato raba ruin nunye. Ñodre, niarakwe kwra lion aune nitre filisteo 30 kä Asquelón ye murie ketani (Juec. 14:​5, 6, 19). Jehovakwe ñaka Sansón dimikadre akräke kukwe jökrä ye ñan rabadre bare ie nämäne gare kwin ie. Nitre filisteo mil krati jire murie ketani kwe aune namani ngrötö ñö miare ye ngwane, nämäne tö ngwen kwatibe Ngöböi bämikani kwe. Niarakwe ja di ngwandre ñö känene kaibe näre bäri kwin ja di käräbare kwe Jehovai (Juec. 15:18).

9. ¿Sansonkwe kukwe ribebare Jehovai ngwane, Jehovakwe dre nuainbare? (Jueces 15:19).

⁹ ¿Sansonkwe kukwe ribebare Jehovai ye ngwane Jehovakwe dre nuainbare? Kukwe ñan tuabare nuainbare kwe, kä känti ñö ñaka yete ñö mikani betekä kwin kwe. Sansón namanina kwata ngwarbe ñö miare akwa ñö ye ñani kwe ngwane “nükaninte nire jabätä” (ñäkädre Jueces 15:19 yebätä).c Kä nikani kabre ta ye ngwane Jehovakwe Samuel mikani üai deme köböire tärä Jueces ye tike. Ye näire ñö mikani nen dobote nguse Jehovakwe ye nämäne nen känime. Ne madakäre nitre israelita nämäne ñö ye tuin ngwane, niaratrekwe tö ngwandre Jehovai kukwe tare näire ngwane Jehovakwe dimikai nämäne nüke törö ietre.

10. ¿Nikwe dre nuaindre ne kwe Jehovakwe ni dimikadre? (Üai mikadre ñärärä).

¹⁰ Sansón erere ni jökrä rabadre Jehová känene. Kukwe nuain gare nie o kukwe namanina bare nie Jehová mikabätä täte akwa niarakwe ni dimikadre ye nita ribere jai. Nikwe ja töi mikadre bobre aune Jehová aibe köböire kukwe jökrä raba nemen bare nie ye ngwandre törö jai. Jehovakwe ñö biani Sansón ie ye ñani kwe ngwane namaninta dite. Ye erere arato kukwe keta kabre ja üaire bianta Jehovakwe nie ye nikwe kain ngäbiti ngwane ni rabai dite ja üairebiti (Mat. 11:28).

11. ¿Kukwe jökrä ja üaire bianta Jehovakwe nie ye ka ngäbitikäre dre nuaindre? ¿Nitre gurebätä blitani yebätä dre raba nemen gare nie?

¹¹ Ani blite Alexéi yebätä, niara ye nünanka Rusia aune yete ja mikata krubäte rüere, tä Jehová mike täte yebätä. ¿Dreta niara dimike kä ngwen nüke jai? Niara aune muko kwe tätre kukwe ja üaire mike nuaindre käne jai. Alexéi niebare: “Kukwe tä ükaninte kwin tikwe jai ja tötikakäre kukwe ja üairebätä, tita ñäke Bibliabätä aune ja tötikebätä köbö kwatire kwatire. Ne madakäre ti muko aune ti nunta ñäke texto köbö kwatire kwatire kräke yebätä aune orare gwairebe” ¿Kukwe ne tä dre driere nie? Nikwe ñaka tö ngwandre akwle jai, ñakare aune tö ngwandre Jehovai. Rabadre bare nie yekäre nikwe tödeka jakwe mikadre dite. Ja tötikadre Bibliabätä, oradre, nändre gätäbätä aune kukwe driere. Nikwe ye erere nuaindi ngwane Jehovakwe kukwe kwin mikai nemen bare töi kwinbiti ni kräke aune ni dimikai kwe sribire jankunu. Sansón dimikani kwe ye erere ni dimikai kwe.

SANSÓN ÑAN JA NGWANI DI NEKÄ

12. ¿Sansonkwe kukwe meden ñaka kwin nuainbare aune ñobätä ñaka ja erebe käne yebe?

¹² Sansón ye töi nämäne ngite ni erere, ye medenbätä, ruäre ngwane ñan nämäne kukwe kwin den nuaindre jai. Bati niarakwe kukwe diani jai ye köböite kukwe tare namani barebätä, ñobätä ñan aune ñaka Jehová kukwe mikani täte kwe. “Dalila nünanka kä Sorec ye namani tuin nuäre ie yebätä namani mike okwäte jakrä” (Juec. 16:4). Dalila jämi gare Sansón ie ye ngwane tö namani ja mäkäite meri iti filistea yebe. Akwa “ye namani nemen bare Jehová töi köböire nieta ñobätä ñan aune yebiti Jehovakwe kukwe tare mikadre nemen bare nitre filisteo yebätä”. Biti Sansón nikani Gaza nitre filisteo ye ngätäite, yete niara namani meri iti nämäne nemen bati bati nitre brare ben ye gwirete. Ye ngwane Jehovakwe niara mikani dite ne kwe rikadre jukwe ye ngwena jai, kukwe nämäne ükaninte kwin juta ye kriemikakäre ye juankäre ngwarbe (Juec. 14:​1-4; 16:​1-3). Akwa Dalilabätä kukwe jene nämäne nemen bare. Niara ye israelita yebätä ñan namani nuäre Sansón kräke rükäre nitre filisteo ye rüere.

13. ¿Dre nuainbare Dalilakwe Sansón ngökakäre?

¹³ Nitre filisteo tö namani Sansón ngökamana Dalila ie. Ye medenbätä, ngwian käbämikani ere ie aune nakani ngäbiti ie. Akwa, ¿Dalila töi nämäne dre nuainbätä ye ñobätä Sansonkwe ñan gani jire chi? ¿Nämäne tare krubäte kwe yebätä ñan kä mikani ruin kwe jabiti? Kukwe jökrä namani bare ño yebiti ta akwa batire batire dre nämäne Sansón mike dite ye Dalila namani ngwentari ie mrä mada Sansón niebare ie. Ye bitikäre kukwe tare namani bare Sansonbätä, niara di nianinkä aune Jehovakwe ñaka kani ngäbiti (Juec. 16:​16-20).

14. ¿Sansón tö ngwani Dalila ie yebätä dre namani bare bätä?

¹⁴ Sansonkwe tö ngwani bäri Dalila ie Jehová kräke, yebätä ja ngie nuaini kwe. Niara nakani nitre filisteo ie aune okwä dianinkä. Ye bitikäre niara kitani ngite kä Gaza yekänti, kä ye meden ara niarakwe mikani tuin ngwarbe jai aune jukwe dikaninte kwe, yete niara mikani klabore aune mikani jondron ukwe. Ye bitikäre nitre filisteokwe ja ükaninkrö bieta nuainkäre aune jondron kukwakäre ngöbö ngwarbe Dagón ie ñobätä ñan aune niara ara käkwe Sansón mikani niaratre kisete namani nütüre. “Sansón jäkäni küken nämäne ngite yekänti”, biti niara kötai namani aune mikani tuin ngwarbe kwetre jai (Juec. 16:​21-25).

15. ¿Sansonkwe tö ngwaninta Jehovai ye bämikani ño kwe? (Jueces 16:​28-30; üai kena täräkwatabätä mikadre ñärärä).

¹⁵ Sansón kukwe blo krubäte nuainbare, akwa ye ñan aibätä namani kwekebe. Ñakare aune niarakwe rüdre nitre filisteo rüere niebare Jehovakwe ie ye erere tö namani mikai nemen bare (ñäkädre Jueces 16:​28-30 yebätä).d Aisete Sansonkwe bikabare tidrä Jehovabätä aune Jehovakwe “niara tuadremetre ja ngie mike nitre filisteobätä” ribebare kwe ie. Jehovakwe niara kukwe nuain aune ja di bianinta kwe ie. Ye köböire köböitibe Sansonkwe nitre filisteo murie ketani bäri kwati kä jökrä te niarakwe nitre filisteo murie ketani ye kräke.

16. ¿Dre raba nemen gare nie Sansonbätä?

¹⁶ Sansonkwe kukwe blo nuainbare ye köböite kukwe tare namani bare bätä akwa yebiti ta niarakwe ja di ngwani jankunu Jehová töi nuainkäre. Aisete niara erere kukwe tä nainte nie yebätä ni jäkäta olobiti o sribi ruäre diankata nikän. Akwa nikwe ñaka ja di ngwandre nekä ni ütiäte jankunu Jehová kräke ye nikwe ngwandre törö jai (Sal. 103:​8-10). Nita ja mike ngite akwa ni raba nementa ütiäte krubäte Jehová kräke Sansón erere ye ngwandre törö jai.

17, 18. ¿Kukwe namani bare Michaelbätä ye tä mä dimike ño? (Üai mikadre ñärärä).

¹⁷ Michael monso bati nämäne sribire prekursor regular aune siervo ministerial konkrekasionte, nämäne sribire krubäte Jehovakrä. Akwa bati ja mikani ngite kwe yebätä sribire nämene kisete konkrekasionte ye nianinte kän. Niara tä niere: “Ti nämä sribire ja dibiti aune ti ñaka nämäne nemen kwekebe sribikäre Jehová kräke. Akwa drekebe ngwarbe ni rikadre jukwete ta aune ni matadre jukwe ben jai ye kwrere rababa bare tibätä. Jehovakwe ñan ti tuinmetre nämä gare tie akwa tikwe ja ketai niarabe ti nämä ja kete käne ben ye erere aune ti rabaita sribire krubäte konkrekasionte ti nämä nuainne erere, yebätä ti rababa töbike krubäte”.

¹⁸ ¡Bäri kwin Michael ñan ja ngwani di nekä! Niara tä niere: “Tikwe ja töi mikaba nökrö bäri Jehová ken. Ti nämä ja driere brukwä tätebiti ie ti nämä ja tötike aune ti nämä töbiketari kukwebätä yekwe ti dimikaba”. Kä nikani ta angwane sribi bianinta konkrekasionte Michael ie. Nengwane niara abokän ni umbre konkrekasionte aune prekursor regular. Niara tä mike gare: “Ja mräkätre nämä kukwe kwin niere tie aune ti dimike, metrere nitre umbre ti dimikaba yebiti Jehová nämä ti tarere rükaba gare tie. Ti raba niara miketa täte töi jäme biti käne erere ye nüke gare metre tie. Kukwe jökrä namani bare tibätä nebiti nüke gare metre tie nire tä ja mike ngite Jehová rüere aune ja töi kwiteta bökän yebiti Jehovata ngite kite ta”. Michael erere nikwe ja mikadre ngite, akwa nikwe ja töi kwitadre bökän ngwane, ni rabai ütiäte Jehová kräke aune kukwe kwin mikai nemen bare ni kräke ye nikwe ngwandre törö jai. Yekäre nikwe ja di ngwandre täte ja ngwen kwin aune ja ketete dime niarabätä (Sal. 86:5; Prov. 28:13).

19. ¿Kukwe namani bare Sansonbätä yekwe mä dimiri ño?

¹⁹ Kukwe ja tötikara nekänti kukwe namani bare Sansonbätä ruäre aibe nibi gare jai. Niara töi ngite aune ja mikani kwe ngite Dalila yebe, akwa yebätä niarakwe ñaka ja ngwani di nekä, ñakare aune ja di ngwani kwe jankunu Jehová mike täte. Jehovakwe ñaka niara mikani tuin jai ni ñaka ütiäte ye kwrere ñakare aune ye bitikäre Jehovakwe niara ara köböire kukwe ñan tuabare nuainbare. Jehovakwe niara mikani tuin jai ni ni tödekaka metre ye kwrere, ye medenbätä niara kädekaninte kwe nitre käkwe niara mikani täte metre kirabe ye ngätäite, tärä Hebreos kapitulo 11 yekänti. Ni Rün kri Jehová yekwe ni tare krubäte ye medenbätä tä ni mike dite aune nita ja tuin kukwe tare ben ngwane tä ja di bien nie ye käita nemen juto nibätä. Ye medenbätä Sansón erere nikwe kukwe ne ribedre Jehová ie: “Ngöbö tikwe ti ngwen törö jai. Oh, Ngöbö ja di bien tie” (Juec. 16:28).