Kukwe Ngöbökwe tä driere

¿Ñobätä Ngöbö kädekadrete kä kwe yebiti?

Kukwe ruäre mätä ngwentari jai ye mikata gare Biblia mäkwe yebätä. Mä törba angwane nitre testiko Jehovakwe raba kukwe ye mike gare mäi.

1. ¿Ñobätä Ngöbökwe ja kädekani akwle?

Ni kä yebiti ni kädekadre ie ni jökrä töta nemen. ¿Ñobätä? Nitre ruäre mikata ütiäte angwane “ji ngwanka käne” nieta ietre, akwa ye ñaka kä jeñe kwetre. Ni kä yebiti ni nüke gare nitre madai. “Däkien kri”, “Ngöbö dite krubäte” bätä “Ni ni Sribekä” nieta Ngöböi (Génesis 15:2; 17:1; Eclesiastés 12:1). Akwa, niarakwe ja kädekani akwle, ne kwe niara rükadre gare bäri kwin nie, aune nikwe ja mäkädre ben. Niara kä Jehová. (Mäkwe ñäkä Isaías 42:8 yebätä.)

Nitre kukwe kwitaka tätre Ngöbö kä ye denkä Bibliabätä, täte tätre “Ngöbö” o “Däkien” mike, akwa Biblia ye tikani kukwe hebreore ye ngwane Ngöbö kä nämene tikani mil kwä kükü närebätä. Ne tä mike gare Ngöbö kä rabadre gare nie ie niara tö. (Mäkwe ñäkä Isaías 12:4 yebätä.)

2. ¿Ñobätä ütiäte Ngöbö kä rabadre gare nie?

Ngöbö kä ño ye ñan aibe rabadre gare nie, ñakare aune nikwe ja mäkädre kwin ben arato. Ngöbö kä Jehová ye abokän “niara töita ño ye tä mike nemen bare” meden gärätä. Kukwe ne kätä mike gare Ngöbö raba kukwe ño ño nuainne niara töi mikakäre nemen bare. Niara kä rabadre gare nie angwane nikwe tö ngwain kukwe käbämikata kwe ye mikai nemen bare metre kwe (Salmo 9:10). Nire nire tä niara kä ye mike gare jai aune kädeke kä kwe yebiti ye tä tödeke ie aune töta nemen niara mikai käne. Jehovata käbämike niarakwe nitre ye kriemikai. (Mäkwe ñäkä Salmo 91:14 yebätä.)

3. ¿Ñobätä Ngöbö tö nikwe niara kä mikadre gare jai?

Nikwe Ngöbö kä mikadre gare jai angwane kukwe kwin raba nemen nikwe. ¿Dre kwin raba nemen nikwe? Ni raba ja kete niarabe aune nüne kärekäre. Ye medenbätä, Ngöbö tö niara kä rabadre gare nitre madai. (Mäkwe ñäkä Juan 17:3 bätä Romanos 10:13, 14 yebätä.)

Ngöbö töita ño, tä ja ngwen ño, tä kukwe ükete ño bätä kukwe käbämikata kwe, yebätä Jesukwe blitabare angwane nämene Ngöbö kä mike gare nitre madai. Kä nengwane, nitre nänkä Kristo jiebiti tätre sribi ye erere nuainne kä jökräbiti tibien. Nitre jökrä ye ‘juta kwe niara kä ngwanka’. (Mäkwe ñäkä Hechos 15:14 bätä Juan 17:26 yebätä.)

4. ¿Ngöbökwe ja kä ye mikai ño deme?

Ni kwati tä Ngöbö kä ye mike käme, ye medenbätä niarakwe ja kä ye mikai deme. Nitre kwati tä niere Ngöbökwe ñaka Kä tibien ne sribebare, ye medenbätä ñaka mikadre täte. Nitre mada tä niere niara ñaka töita nibätä aune kukweta nemen bare nibätä ye niara köböite. Nitre tä kukwe ngwarbe niere Ngöbö rüere ye ñaka nuaindi jankunu kwetre, ñobätä ñan aune, nitre tä niara kä ye mike käme niarakwe mikai ja ngie nuin. (Mäkwe ñäkä Salmo 83:17, 18 yebätä.)

Gobran Ngöbökwe käkwe gobrantre kä nebätä gaite aune nitre mikai nüne jäme kwe Kä tibien nebätä, ye ngwane Ngöbökwe ja kä ye mikai deme (Daniel 2:44). Ni jökrä ie köböra nemen gare Jehová aibe Ngöbö metre. (Mäkwe ñäkä Ezequiel 36:23 bätä Mateo 6:9 yebätä.)

¿Mä abokän dre nuain? Mäkwe ja tötikadre Ngöbö Kukwei yebätä aune ja ketadre nitre niara tarekä yebe rökrakäre niara ken. Jehovakwe ja kä ye mikai deme ye ngwane nitre niara mikaka täte metre ye ñaka käi kwitaikä jabiti kwe (Malaquías 3:16).

Mä törba kukwe mikai gare bäri jai angwane mäkwe ñäkä kapitulo 1 tärä ¿Dre drieta erametre Bibliakwe? yebätä.

[Jondron üai bämikani página 18]

Täräkwata kwani yebätä Ngöbö kä tä tikani kukwe hebreore