Hanyoyin Kyautata Yadda Muke Yin Wa’azi—Nuna Yadda Ake Nazari da Menene Ainihi Littafi Mai Tsarki Yake Koyarwa?

Abin da Ya Sa Yake da Muhimmanci: Mai yiwuwa mutane da yawa ba za su fahimce mu ba idan muka ce musu za mu so mu yi nazarin Littafi Mai Tsarki da su. Suna iya ɗauka cewa sai sun shiga wani aji don nazari ko kuma su soma nazari ta hanyar wasiƙa. Saboda haka, maimakon mu gaya musu kawai cewa za mu so mu yi nazari da su, zai dace mu nuna musu yadda ake yin nazari da mutane. A cikin ’yan mintoci, za mu iya nuna wa mutane cewa yin nazarin Littafi Mai Tsarki abu ne mai sauƙi kuma zai wayar da kansu sosai.

Yadda Za Mu Iya Yin Hakan:

Bayan gaisuwa, ka tambayi mai gidan ko ya damu da yadda rayuwa za ta kasance nan gaba.
Ka ambata cewa mutane da yawa sun damu da hakan, sa’an nan ka nuna masa shafin da ke ɗauke da abubuwan da ke cikin littafin nan Menene Ainihi Littafi Mai Tsarki Yake Koyarwa? Ka bayyana masa cewa wannan littafin yana ɗauke da darussa masu sauƙin fahimta a kan koyarwar Littafi Mai Tsarki game da abin da zai faru nan gaba da dai wasu batutuwa. Bayan haka, ka ce ya zaɓi babin da zai so ku tattauna.
Ka ba shi kwafi guda kuma ka taimaka masa ya buɗe babin da ya zaɓa. Ka bayyana masa cewa zai sami amsoshin tambayoyi da ke farkon babin a cikin sakin layin da ke biye.
Ka ce ya karanta sakin layi na farko, idan ya yarda. Bayan haka, ka karanta tambayar sakin layin, kuma ku nemi amsar tare. Ku karanta kuma ku tattauna nassosin da suka goyi bayan amsar. Ka nuna masa yadda ka ja layi a ƙarƙashin amsar a cikin naka littafin.
Ku tattauna sakin layi na gaba, amma ka ce wa mai gidan ya ƙoƙarta ya amsa tambayar ba tare da karanta amsar kai tsaye daga cikin littafin ba.
Ka yaba masa kuma ka shirya da shi don ka dawo ku ƙarasa babin.
Idan zai yiwu, ka gaya masa game da bidiyon nan Yaya Ake Gudanar da Nazarin Littafi Mai Tsarki? a dandalin jw.org/ha.

Ku Bi Shawarar Nan Wannan Watan:

Ku roƙi Jehobah ya taimaka muku ku soma nazari da wani.—Filib. 2:13.
Ku yi ƙoƙari ku nuna ma aƙalla mutum ɗaya yadda ake nazari da Menene Ainihi Littafi Mai Tsarki Yake Koyarwa? ko kuma bidiyon nan Yaya Ake Gudanar da Nazarin Littafi Mai Tsarki? sa’ad da kuke wa’azi.