Ogenderere Kukuza Obuzigire Bwawe ku Yehova n’oku Bandi

1. Bukweri buhe waliyigire amango orhondera kuyiga Ebiblia?

K’OCHIYIBUKIRE ebintu byoshi wayigaga amango ohwanza kuyiga Ebiblia? Nkabaga walisomerwe oku rhegeera oku Mungu ajira ezino. Nkabaga wali siimisizwe n’okumenya oku Mungu arhalibuza abantu omu muliro gw’echihenama. Kandi walisiimisizwe oku rhegeera oku hano hofi-hofi wabona abazigirwa bawe bafire n’okulama haguma nabo omu gulu lihya-hya lye paradizo.

2. Olekere okuyiga obukweri bwe Biblia, mandi majambere mahe wajirire? (Waefeso 5:1, 2)

² Oku wanaliri wayiga Echinwa cha Mungu, ku n’obuzigire bwawe ku Yehova bwaligenderere kukula. Obola buzigire bwakushunika kukolesa ebi waliri wayiga. Warhola n’ensimikiro zinja ziyumangire oku makanuni me Biblia. Wayiga kuwaza n’okukola ebintu binja bulala walilonzeze kusiimisa Mungu. Nka kulala omwana anayiganya omuzere ogwerhe obuzigire, nawe waliri wayiganya Yisho w’embingu.​—Osome Waefeso 5:1, 2.

3. Bibazo bihe rhwakachibaza?

³ Rhwakachibaza ntya: ‘Ka obuzigire bwani ku Yehova bugenderere kukomera zene kulusha amango nabaga Mukristu? Kurhenga amango mbatizwa, nayiganyire Yehova bwenene si, omu kuyereka obuzigire ku bene-berhu na bali-berhu?’ Akaba “obuzigire rhwaligwerhe oku murhondero” bwayinjire bwahola, rhurhakwanene kuvunika omurhima. Ebili nk’ebyola byalihikiire Abakristu b’omukagana ka burhanzi. Yesu arhabajahikaga, nerhu arharhujahika. (Ufu. 2:4, 7) Amenyere oku rhwakashuba kugwarha obuzigire nk’oburhwaligwerhe amango rhuhwanza kuyiga okuli.

4. Bichi rhwaganirako mu gunola mwazi?

⁴ Mu gunola mwazi rhwaganira gurhe rhwakagenderera kukuza obuzigire bwerhu ku Yehova n’okubandi. Naho rhwayiga oku bilolere emigisho miguma rhwagwarha amango rhwamazigira bwenene Yehova na bene-berhu na bali-berhu.

OKUZE OBUZIGIRE BWAWE KU YEHOVA

5-6. Bibazo bihe Paulo alihurene omu mango m’akasi kage k’amahubiri, aliko bichi byalimushunikire agenderere kukolera Yehova?

⁵ Entumwa Paulo alisimisizwe n’akalamo kakwirire omu kasi ka Yehova, aliko aliri alwisa ebibazo kamama. Mango manene Paulo aliri ajira olugenzi lulehere, na mw’agola mango birhaliyorohere kubalama. Amango Paulo aliri abalama mango maguma aliri ahurana “obuhanya bw’enyinji” ‘n’obuhanya bw’ebishambo.’ Hali n’amango abanzi bage baliri bamukubirha. (2 Ko. 11:23-27) Ababo b’Abakristu nabo barhaligwerhe eshukrani amango moshi, oku bintu aliri abakolera omu kubarhabala.​—2 Ko. 10:10; Flp. 4:15.

⁶ Bichi byarhabalaga Paulo agenderere kukolera Yehova? Kugerera Amandiko, Paulo aliyigire binene oku bilolere engeso za Yehova n’oku byaliri ageramo yenyine. Paulo achizera kweri oku Yehova Mungu amuzigire. (Ro. 8:38, 39; Efe. 2:4, 5) Kandi Paulo ahikira kuzigira Yehova bwenene. Paulo aliyerekene obuzigire bwage ku Yehova “omu kukolera n’okugenderera kukolera abachesibwa.”—Ebr. 6:10.

7. Injira ehe nguma rhwakakomeza m’obuzigire bwerhu ku Yehova?

⁷ Rhwakakuza obuzigire bwerhu ku Mungu, omu kuyiga Echinwa chage oku bushiru. Amango oli wasoma Ebiblia, ochihangane kurhegera bichi buli musitari guderhere oku bilolere Yehova. Oje wachibaza ntya: ‘Gurhe eyila ngani eyerekene oku Yehova ananzigira? Mpanvu zihe eyila ngani empere z’okuzigira Yehova?’

8. Nka gurhe esala lyakarhurhabala rhukuze obuzigire bwerhu ku Mungu?

⁸ Eyindi njira rhwakakuza m’obuzigire bwerhu ku Yehova, kuli kumufungulira omurhima gwerhu buli mango omu sala. (Zb. 25:4, 5) Yehova naye, anaja ashubiza oku masala merhu. (1 Yo. 3:21, 22) Mwali-werhu w’omu Asie oyirikirwe Khanh, aderhere ntya: “Burhanzi nalizigire Yehova kugerera ebinayigaga oku bimulolere. Aliko amango mbona gurhe ali ashubiza oku masala mani, nashuba kumuzigira bwenene kulusha. Echola charhumire nalonza kujira ebintu bimusimisize.”b

OKUZE OBUZIGIRE BWAWE OKU BANDI

9. Nka gurhe Timoteo aliyerekene oku aliri akomeza obuzigire bwage ku bene-babo na bali-babo?

⁹ Enyuma wa myaka migeke Paulo amalire kuba Mukristu, abuganana n’omurhabana mwinja oyirikirwe Timoteo. Timoteo alizigire Yehova, kandi alizigire n’abantu. Paulo abwira Abanyafilipi ntya: “Intawindi ngwerhe ogwerhe oborhere buli kuguma n’obwage [Timoteo] washishikala bwinja-bwinja emilago yenyu.” (Flp. 2:20) Ahala Paulo arhaliri aderha oku buhashe Timoteo agwerhe b’okurheganya bwinja ebintu, changwa obuhashe bwage bw’okuderha embere y’abantu boshi. Aliko Paulo alibwene okuntu Timoteo azigiire bene-babo na bali-babo bwenene. Ntangangane, ebibaga Timoteo aliri alambagirira byaliri byamulingiriza oku nyorha nene.​—1 Ko. 4:17.

10. Nka gurhe mwali-werhu Anna n’eba baliyerekene obuzigire baligwerhe ku bene-babo na bali-babo?

¹⁰ Nerhu rhunalonza enjira rhwakarhabalamo bene-berhu na bali-berhu. (Ebr. 13:16) Waza oku bintu mwali-werhu muguma oyikikirwe Anna agereremo rhwaganiragako omu mwazi gugerere. Enyuma w’okuhurana echihusi chikalihire, yewe n’eba baja kurhangula enju ya mulala muguma gw’Abahamirizi ba Yehova babugana eyi echisusu ch’enju chagendere. N’echola charhuma emishangi (emyambaro) y’ogola mulala yazinga yoshi. Mwali-werhu Anna aderhere ntya: “Rhwarhola emishangi yabo, rhwayimesha, rhwayigoma, n’okubagalulirayo eyi ekunjirwe. Kurhwabo, ebirhwajiraga byaliri bintu bigeke, aliko echola charhumire rhwagwarha obwira bukomere bunagenderere kukomera kuhika zene.” Obuzigire Anna n’eba baligwerhe ku bene-babo na bali-babo bwalibashunikire babahereze oburhabale.​—1 Yo. 3:17, 18.

11. a) Gurhe abandi banachiyunva amango rhwamabayereka obuzigire? b) Nk’oku olwandiko lwa Mezali 19:17 luyerekene, gurhe Yehova anachiyunva amango rhwamayerekana obuzigire?

¹¹ Amango rhwamayerekana obwinja n’okuyerekana oku rhuzigiire abandi, rhwanarhegera oku rhuli rhwachihangana kuyiganya Yehova. Kandi nkabaga bakayerekana eshukrani oku bwinja rhwabayerekere kulusha okuntu rhwabo rhurhaliwazize chiro. Mwali-werhu Khanh rhwabaga rhwashambereko burhanzi, ayibukire n’obusiime balala boshi bamuherezaga oburhabale. Aderhere ntya: “Ingwerhe shukrani nene ku bali-berhu boshi bazigirwa baliri bampeka omu kasi k’amahubiri. Baliri bayinja kuntola eka, n’okumpamagala rhusangire haguma akalyo, banaliri bachizera oku nahikire eka n’obuholo. Zene indi nabona oku ebyola byalibahemere akasi kanene bwenene. Banalijirire ebyola byoshi oku buzigire.” Nechi, arhali abantu boshi babarhubwira koko oku birhwabajirire. Mwali-werhu Khanh aderhere ntya oku bilolere balala bamurhabalaga: “Nalilonzeze kubahemba oku bwinja boshi banyerekere, aliko ntalimenyere ngahe boshi balamire. Aliko Yehova yewe ayinjiho, indi nasalira oku yewe nji abandipire.” Mwali-werhu Khanh aderhere okuli. Yehova anabona buli chintu chinja choshi rhunajirira abandi, chiro chaba chigeke bwenene. Yehova anabona oku, okuntu rhwachihanire kuli kw’akachiro bwenene n’oku liri deni nji arhulipa.​—Osome Mezali 19:17.

12. Nka gurhe bene-berhu banayerekana obuzigire bwabo omu chibaga? (Olole n’amafoto.)

¹² Akaba oli mwene-werhu, nka gurhe wakayerekana obuzigire oku bandi n’oku oli tayari kubarhabala? Mwene-werhu ochiri musole oyirikirwe Jordan alibazize omushamuka gurhe akagala kukola binene yarhabala omu chibaga. Omushamuka amubwira koko oku majambere abaga akolere, naho amuhereza mahano malebe okuntu akakola binene. Omufano, aheba Jordan omurhima oku akalema ahika oku Chumbi ly’Obwami embere w’akasanzi, okulegereza abandi, oku haana ebishubizo oku mbuganano, okuhubiri oku kahunda n’echigusho chage ch’a mahubiri, n’okuwaza oku bintu akajira y’arhabala abandi. Amango mwene-werhu Jordan ahwanza kukolesa amola mahano, arhaliri ayiga ebintu bihya-hya konyine s’aliko aliri akuza bwenene obuzigire bwage ku bene-babo na bali-babo. Jordan arhegeera oku amango mwene-werhu amaba mugwasi w’akasi, arharhondera kugwasa abandi konyine s’aliko anagenderera kubarhabala.​—1 Ti. 3:8-10, 13.

13. Nka gurhe obuzigire bwarhabalaga mwene-werhu oyirikirwe Christian yashuba kuhwanza kukola nka mushamuka?

¹³ Gurhe si akaba mira waliri wakola nka mugwasi wakasi changwa mushamuka? Yehova ayibukire akasi wakolere omu siku zigerere n’obushiru waliri wakolesa y’okayeneza. (1 Ko. 15:58) Kandi ali abona obuzigire ogenderere kuyerekana. Mwene-werhu oyirikirwe Christian aliyunvirhe avunikire omurhima amango aheza engabane y’okukola nka mushamuka. Aliko aderhere ntya: “Nahigirira oku najira buli choshi nakagala omu kolera Yehova oku buzigire imbe ndi mushamuka changwa nanga.” Enyuma w’amango malebe, ashuba kuhabwa olukengo l’okukola nka mushamuka. Mwene-werhu Christian aderhere ntya: “Naliyubahire hityu okushuba hwanza kukola nka mushamuka. Aliko nahigirira oku akaba Yehova oku lukogo lwage alonzeze nshube nkole nka mushamuka, najira ntyo bulala muzigire kandi inanzigiire bene-berhu na bali-berhu.”

14. Bichi wayigire kugerera ebinwa bya mwali-werhu w’omuchihugo che Georgia?

¹⁴ Kandi abakozi ba Yehova banayereka abaturanyi babo obuzigire. (Mt. 22:37-39) Omufano, mwali-werhu Elena w’omu chihugo che Georgia aderhere ntya: “Burhanzi echintu chiguma chonyine chaliri chanshunika impubiri, bwaliri buzigire bwani naligwerhe ku Yehova. Aliko, oku obuzigire bwani ku Darha w’embingu bwaliri bwakula, ku n’obuzigire bwani oku bantu nabo bwaliri bwachiyongera. Naliri nawaza oku bibazo baliri bahurana nabyo na myazi mihe yakabahumire oku murhima. Bulala naliri nabawazako bwenene, echola chanshunika ndonze bwenene kubarhabala.”—Ro. 10:13-15.

YEHOVA NJ’ARHUHEMBA RHUKAYEREKA ABANDI OBUZIGIRE

15-16. Nk’oku biyerekenwe oku mafoto, migisho ehe rhunagwarha, amango rhwamayereka abandi obuzigire?

¹⁵ Amango rhuli rhwayerekana obuzigire ku bene-berhu na bali-berhu, arhali bowe bonyine b’obagwarha enyungu. Amango obula bulwala b’okuyahukira bwe Korona burhondera, mwene-werhu oyirikirwe Paolo na mukage, balirhabere bali-berhu banene bashajire bamenye kukolesa etelefone, etablete, ne ordinatere zabo yibakola akasi k’okuhubiri. Mwali-werhu muguma waligambirwe kukolesa etelefone changwa etablete yage, buzinda ali galire. Agala kuyikolesa omu kuhamagala bachi bage bayinje oku lwibuko. Bantu 60 mubo bakulikira olwibuko kugerera evideokonferanse! Oyola mwali-werhu na bachi bage boshi bayunguka kugerera obushiru bwa mwene-werhu Paolo na mukage. Buzinda oyola mwali-werhu ayandikira Paolo ntya: “Koko omu kuyigiriza abagekulu bali nka rhwabo. Intakafa nayibagire haban’akatyu kangana gurhe Yehova arhulagireko na kangana gurhe nawe wakolere bwenene omu kurhurhabala.”

¹⁶ Emifano eli nk’eyila yaliyigirize Paolo chintu chiguma ch’akamaro. Echola charhumire ayibuka oku obuzigire buli bw’akamaro bwenene kulusha obumenyi changwa obuhashe bw’akaburhano omuntu akaba agwerhe. Ayibukire ntya: “Naliri nakola nka mwimangizi w’omuzunguluko. Zene nyibukire oku chiro akaba abahubiri bayibagire amajambo naliri nageza, bachiyibukire oburhabale naliri nabahereza.”

17. Bandi bahe bakayunguka amango rhwamayerekana obuzigire?

¹⁷ Amango rhwamayerekana obuzigire oku bandi rhunapata enyungu omu kuntu rhurhaliwazize. Mwene-werhu Jonathan, olamire omu chihugo che Nouvelle-Zélande aderhere oku obola buli bukweri. Lweboso luguma enyuma w’emidi amango ezuba lyalikalihire, abona mwene-werhu oli painiya oli wahubiri yewe yenyine. Jonathan achishoga kuyinja ahubiri n’oyola painiya Lweboso enyuma w’emidi. Amola mango arhalirhegerere nka gurhe echola chijiro ch’obwinja chakamulerhere enyungu. Jonathan aderhere ntya: “Amola mango omu kalamo kani, ntaliri nasiima akasi k’amahubiri. Aliko okuyunviriza okuntu oyola painiya aliri ayigiriza n’okubona gurhe akasi kage k’amahubiri kaliri kalerha amalehe menja, echola charhuma nagwarha enyorha y’okusiima akasi k’amahubiri. Oyola mwene-werhu ava aba mwira wani bwenene analiri antabala nsiime akasi k’amahubiri n’okuyorha nyegerere Yehova.”

18. Bichi Yehova alonzeze rhujire?

¹⁸ Yehova alonzeze rhweshi rhukuze obuzigire bwerhu kuyewe n’oku bandi. Nk’oku rhwayigire rhwakakomeza obuzigire bwerhu ku Yehova omu kusoma Echinwa chage, omu kuchikengerako, n’omukuganira naye buli mango kugerera esala. Rhwakakuza obuzigire ku bene-berhu na bali-berhu omu kubahereza oburhabale bakenere. Oku obuzigire bwerhu bunali bwagenderera kukula bwenene, ku rhwanayegera Yehova bwenene n’omulala gwerhu gw’ekiroho. Kandi nji rhwasiimira obola bwira esiku n’amango!