Introduksion

Palangga nga Bumalasa:

Nagabatyag ka bala nga malapit ka sa Dios? Para sa madamo, daw imposible ini. Ang iban nahadlok nga basi indi sila pagsapakon sang Dios; ang iban naman nagabatyag nga indi sila takus. Pero, mahigugmaon nga ginapalig-on kita sang Biblia: “Magpalapit kamo sa Dios, kag magapalapit sia sa inyo.” (Santiago 4:8) Ginapasalig pa gani niya ang iya mga sumilimba: “Ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’”—Isaias 41:13.

Paano kita mangin malapit sa Dios? Mangin abyan naton ang isa ka tawo kon kilala gid naton sia. Nabal-an naton kon paano sia nagapamensar kag nagagawi, kag ginapabaloran gid naton kon ano sia nga klase sang persona. Bangod sini, mangin malapit kita sa iya. Gani, kinahanglan nga tun-an naton ang mga kinaiya kag mga dalanon sang Dios nga ginasugid sa Biblia. Mangin malapit pa kita sa Dios kon binagbinagon naton kon paano ginapakita ni Jehova ang kada isa sa iya mga kinaiya, kon matun-an naton kon paano ini perpekto nga ginpakita ni Jesucristo, kag kon matun-an naton kon paano man naton ini mapakita. Makita naton nga si Jehova amo ang may kinamatarong kag ang nagakabagay nga Soberano sang uniberso. Dugang pa, sia ang Amay nga kinahanglan naton tanan. Bangod gamhanan sia, matarong, maalam, kag mahigugmaon, wala gid niya ginabiyaan ang iya matutom nga mga anak.

Kabay nga ini nga libro makabulig sa imo nga mangin malapit pa gid kay Jehova nga Dios, para padayon kamo nga mag-abyanay asta san-o kag mahimo ka magkabuhi nga nagadayaw sa iya asta sa wala sing katapusan.