Ang Sulat sa Dingding

Sang ulihi, si Belsasar nangin hari sang Babilonia. Isa ka gab-i, gin-imbitar niya ang linibo ka mataas nga opisyal sang pungsod para sa sinalusalo. Ginsugo niya ang iya mga ulipon nga ipagua ang bulawan nga mga kopa nga ginkuha ni Nabocodonosor sa templo ni Jehova. Gin-imnan ini ni Belsasar kag sang iya mga bisita kag gindayaw ang ila mga dios. Gulpi lang may naggua nga kamot sang tawo kag nagsulat sang indi mahangpan nga mga tinaga sa dingding sang kalan-an.

Hinadlukan gid si Belsasar. Ginpatawag niya ang iya mga madyikero kag nangako sa ila: ‘Kon sin-o ang makapaathag sini nga mga tinaga, himuon ko sia nga ikatlo nga pinakamataas nga opisyal sa Babilonia.’ Gintinguhaan nila, pero wala sa ila sing makapaathag sang mga tinaga. Dayon nagsulod ang rayna kag nagsiling: ‘May isa ka tawo nga ang ngalan si Daniel nga makapaathag sang mga butang kay Nabocodonosor. Mapaathag niya ini nga mga tinaga sa imo.’

Nagkadto si Daniel sa hari. Si Belsasar nagsiling sa iya: ‘Kon mabasa mo kag mapaathag ang nasulat, hatagan ko ikaw sing bulawan nga kulintas kag himuon ko ikaw nga ikatlo nga pinakamataas nga opisyal sa Babilonia.’ Si Daniel nagsiling: ‘Indi ako interesado sa imo mga regalo, pero isugid ko sa imo ang buot silingon sini nga mga tinaga. Ang imo amay nga si Nabocodonosor bugalon, amo nga ginpaubos sia ni Jehova. Nakahibalo ka sang tanan nga natabo sa iya, pero wala mo ginrespeto si Jehova paagi sa pag-inom sang alak sa bulawan nga mga kopa halin sa Iya templo. Gani ginsulat sang Dios ini nga mga tinaga: Mene, Mene, Tekel, kag Parsin. Buot silingon, madaug sang Medianhon kag Persianhon ang Babilonia, kag indi ka na mangin hari.’

Daw wala sing makapierde sa Babilonia. Ini nga siudad napalibutan sang madamol nga mga pader kag madalom nga suba. Pero sina nga gab-i, nagsalakay ang mga Medianhon kag Persianhon. Ginpalikaw ni Hari Ciro sang Persia ang tubig sang suba para makakadto ang iya mga soldado sa mga geyt sang siudad. Pag-abot nila didto, bukas ang mga geyt! Nagsulod dayon ang mga soldado, ginsakop ang siudad, kag ginpatay ang hari. Dayon, si Ciro nangin hari sang Babilonia.

Sa nahauna nga tuig ni Ciro, sia nagpahibalo: ‘Ginsilingan ako ni Jehova nga tukuron liwat ang iya templo sa Jerusalem. Ang bisan sin-o sa iya katawhan nga gusto magbulig, puede makalakat.’ Gani, bilang katumanan sang ginpromisa ni Jehova, madamo nga Judiyo ang nagpauli sa Jerusalem pagligad sang 70 ka tuig nga ginlaglag ini. Ginbalik ni Ciro ang bulawan kag ang pilak nga mga kopa kag ang mga kagamitan nga ginkuha ni Nabocodonosor sa templo. Nakita mo bala kon paano ni Jehova gingamit si Ciro para buligan ang Iya katawhan?