Kon Ngaa Dapat Kamo Magtambong
MAKABATON kamo sing apat ka makaalayaw nga adlaw sang espirituwal nga pagtuon sa “Balaan nga Pagpanudlo” nga Distrito nga Kombension. Sa Estados Unidos lamang, kapin sa 150 sining pagtilipon ang ginhiwat sadtong Hunyo, Hulyo kag Agosto. Sa kabilugan, ang programa magasugod sa Huebes sa ala 1:20 s.h. kag magatapos sa Domingo sa alas 4:10 s.h. Ang talalupangdon nga bahin sa pila ka kombension amo ang mga report sang mga misyonero, nga ginbuligan nga makapauli sa ila tumandok nga pungsod para sa sining makalilipay nga okasyon.
Bata man ukon tigulang—bana, asawa, amay, iloy, tin-edyer, ukon bata—magabaton kamo sing panudlo nga ipresentar sa maathag, makagalanyat nga paagi nga makabulig sa imo. Halimbawa, madamo sa karon ang nagapamangkot, Ano ang katuyuan sang kabuhi? Sa Biernes sang aga, malipay kamo sa pagpamati sining pamangkot nga ginapaathag kag malangkag kamo sa inyo mabaton agod buligan ang iban nga mahangpan ang tema.
Sa Biernes sang hapon ang programa magahinun-anon sang mga bahin nga “Paghimo sa Pag-asawahay nga Isa ka Mapinadayunon nga Paghiusa,” “Paghimakas Para sa Kaluwasan sang Inyo Panimalay,” kag “Mga Ginikanan—Ang Inyo Kabataan Nagakinahanglan sing Pinasahi nga Igtalupangod.” Gilayon pagkatapos sini, ang espesipiko nga igtalupangod igasentro sa mga problema nga ginaatubang sang mga pamatan-on kag kon paano ini lubaron. Mapalig-on gid sila sa modernong-adlaw nga drama nga natig-uluhan sing Mga Pamatan-on nga Nagadumdom sang Ila Manunuga Karon.
Sa Sabado ang programa magahinun-anon sang tagna ni Jesus tuhoy sa katapusan nga mga adlaw kag ilabi na sang iya mga pinamulong: “Sa gilayon sa tapos ang kapipit-an sadtong mga adlaw ang adlaw padulmon.” (Mateo 24:29) Maluyag kamo sa pagpamati sa paathag nahanungod sa kon san-o mahanabo inang kapipit-an. Repasuhon man sang programa sa Sabado ang rekord sang mga Saksi ni Jehova sa modernong tion kag ipakita kon ano na ang ila nahimo.
Sa Domingo ang isa pa ka drama, nga natig-uluhan Dili Magpatalang Ukon Pagtiawtiawi ang Dios, magahinun-anon sang hangkat sa integridad sang isa ka Cristiano bangod sang popular nga mga video kag musika sa karon. Ang diskurso publiko sa hapon magahinun-anon sang tema nga “Mabuligon nga Panudlo Para sa Aton Makahalanguyos nga mga Tion.” Ang programa magatapos paagi sa laygay nga “Magpabilin nga Manguyapot sa Balaan nga Panudlo.”
Sing pat-od, magabenepisyo kamo paagi sa pagtambong sa bug-os nga apat ka adlaw! Mainit kamo nga ginaabiabi sa pagtambong. Agod makita ang lugar nga pinakamalapit sa inyo puluy-an, pakig-anguti ang lokal nga Kingdom Hall sang mga Saksi ni Jehova ukon sulati ang mga manugbalhag sining magasin ukon tan-awa ang Disiembre 8 nga guwa sang Magmata!, nga magalakip sang direksion sang tanan nga mga lugar sang kombension sa Pilipinas.