Sin-o ang Magadula sang Kasingki?
SANG Septiembre 1999, gin-abiabi sang Sekretaryo-Heneral sang Nasyones Unidas nga si Kofi Annan ang mga delegado sa ika-54 nga tuigan nga sesyon sang General Assembly. Suno sa ginreport sa The Toronto Star, ginhangkat niya ang mga lider sang kalibutan, nga nagasiling: “Madamo kaayo nga tawo ang nagakinahanglan sing kapin pa sa mga tinaga lamang sang simpatiya gikan sa internasyonal nga komunidad. Nagakinahanglan sila sing matuod kag dalayon nga pasalig nga buligan sa pagdula sang ila mga kasingki, kag masugdan nila ang isa ka hilway-sa-peligro nga kahimtangan padulong sa kauswagan.”
Mahatag bala sang NU kag sang mga katapo sini ang “matuod kag dalayon nga pasalig” nga kinahanglanon agod madula ang kasingki? Ginkutlo sa amo man nga report sa Star, si Presidente Bill Clinton sang Estados Unidos nagsiling: “Pagkatapos sang tanan nga pagpaagay sing dugo sa sining siglo, nahibaluan naton nga mahapos hambalon nga ‘indi na ini matabo liwat,’ apang mabudlay gid nga himuon ini.” Nagsiling pa sia: “Ang sobra nga pagpangako mahimo nga mangin subong kapintas sa tuman ka diutay nga pag-ulikid.”
Kapin sa 2,500 ka tuig na nga nagligad, si manalagna Jeremias nagsiling tuhoy sa mga panikasog sang tawo: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Kon amo, ano ang paglaum nga madula ang kasingki?
Suno sa mabasa naton sa Isaias 60:18, ang Dios nagapasalig: “Ang kasingki indi na mabatian sa imo duta, ang pagpang-ati ukon kagulub-an sa imo mga dulunan.” Ina nga tagna may nahauna nga katumanan sang ginpabalik sang Dios ang iya nabihag nga katawhan sa ila dutang natawhan. May yara man ini daku pa nga katumanan nga matigayon naton. Si Jehova nga Dios wala ‘nagasaad sing sobra gid.’ Subong ang Labing Mataas kag Manunuga sang katawhan, masarangan gid niya nga dulaon ang “mga kasingki.” Sa idalom sang Ginharian sang Dios, ang paghidait magaluntad. Ang kasingki madula na sing dayon!—Daniel 2:44.