Cristianong Gugma—Indi sa Hambal Lamang
ANG masunog ang ila balay sa Trinidad, nadula sang pamilya Bartholomew ang tanan magluwas sa ila kabuhi. Ginpaistar sila sang ila isa ka himata sa iya balay, apang indi ini ang katapusan sang istorya.
Si Olive Bartholomew isa sang mga Saksi ni Jehova, kag ang mga katapo sang kongregasyon diin sia nagapakig-upod—subong man yadtong sa palibot nga mga duog—nag-alamutay agod mapatindog liwat ang nasunog nga balay nila sang iya pamilya. Gintukod ang isa ka komite agod magdumala sang proyekto sa pagpatindog liwat, kag ginsugdan ang pagtukod. Yara ang mga 20 ka Saksi, upod sang pila ka kaingod. Bisan ang mga pamatan-on nagbuylog, samtang ang iban naman nagahanda sing mga pamahaw.
“Natandog gid ang akon pamilya,” siling ni Olive, subong sang ginreport sa Sunday Guardian sa Trinidad. “Indi sila mga Saksi, kag ang akon bana indi gihapon makapati sang iya nakita.”
Sa pagsumaryo sang panikasog, ang manugpahituhog sang proyekto sa pagtukod nagpadaku nga ini nga mga buhat nagapakilala gid nga mga tanda sang matuod nga Cristianismo. “Wala lamang kami nagapamalaybalay kag nagahambal tuhoy gugma,” siling niya. “Nagapaninguha man kami nga himuon ang amon ginbantala.”—Juan 13:34, 35.
[Retrato sa pahina 32]
Si Olive Bartholomew upod sa iya bana