Mga Ginikanan—Ihatag ang Kinahanglanon sang Inyo Kabataan!
ANG kabataan nagakinahanglan sing panuytoy kag mahigugmaon nga disiplina, ilabi na gikan sa ila mga ginikanan. May kaangtanan sa sini, ang isa ka edukador nga taga-Brazil nga si Tania Zagury, nagsiling: “Ang huyog sang tagsa ka bata amo ang pagpangita sing kalipay. Kinahanglan nga limitehan ini. Ang mga ginikanan ang dapat maghimo sini. Kay kon indi, ang mga kabataan indi makontrol.”
Apang, sa madamo nga kadutaan ang impluwensia sang isa ka matinuguton nga katilingban nga nagapabalor gid sa personal nga kahilwayan mahimo nagapabudlay nga sundon ining laygay sa ibabaw. Sa diin, kon amo, makapangayo sing bulig ang mga ginikanan? Ginakilala sang nagakahadlok sa Dios nga mga ginikanan nga ang ila kabataan “palanublion gikan kay Jehova.” (Salmo 127:3) Gani, nagadangop sila sa Pulong sang Dios, ang Biblia, para sa panuytoy sa pagpadaku sa ila. Halimbawa, ang Hulubaton 13:24 nagasiling: “Ang isa nga nagapugong sang iya bilugon nagadumot sa iya anak, apang ang isa nga nagahigugma sa iya nagadisiplina sa iya.”
Ang paggamit sang Biblia sa tinaga nga “bilugon” wala nagapahangop sing pisikal lamang nga silot; nagalaragway ini sa mga pamaagi sang pagtadlong, sa bisan ano man nga porma. Sa pagkamatuod, masami gid nga ang pagdisiplina paagi sa tinaga mahimo amo lamang ang kinahanglanon agod tadlungon ang tiko nga dalanon sang isa ka bata. Ang Hulubaton 29:17 nagasiling: “Siluti ang imo anak kag magadala sia sa imo sing pahuway kag magahatag sing daku nga kahamuot sa imo kalag.”
Ang kabataan nagakinahanglan sing mahigugmaon nga pagdisiplina agod dulaon ang di-maayo nga mga kinaiya. Ining malig-on kag mainayuhon nga pagtadlong nagahatag sing pamatuod nga ang isa ka ginikanan nagaulikid sa iya bata. (Hulubaton 22:6) Gani mga ginikanan, indi magluya ang inyo buot! Paagi sa pagsunod sa maayo, praktikal nga laygay sang Biblia, mapahamut-an ninyo si Jehova nga Dios kag matigayon ang pagtahod sang inyo kabataan.