“Ginatuytuyan Niya Ako sa Ubay sang Matinong nga Tubig”
KON tig-ilinit sa mga kadutaan sa Biblia, ang mga karnero dapat paimnon kada adlaw. Busa, ang isa ka importante nga hilikuton sang manugbantay amo ang pagpainom sa iya panong. Kon kaisa ginapainom sang mga manugbantay ang ila panong gikan sa bubon, sa amo ginabutangan sing tubig ang mga pasungan agod makainom sing tubig ang mga karnero. (Genesis 29:1-3) Apang, ilabi na kon tingulan, ang duog sa palibot sang magagmay nga mga sapa kag suba nagaaman sing malinong, “natubigan sing maayo nga mga duog-palahuwayan.”—Salmo 23:2.
Ang isa ka maayo nga manugbantay dapat makatultol kon diin ang tubig kag ang nagakaigo nga halalban para sa iya panong. Kon sunado niya ang isa ka lugar, nagagarantiya ini nga ang iya mga karnero indi mapatay. Si David, nga madamong tinuig nga nagbantay sa mga karnero sa kabungyuran sang Judea, nagpaanggid sang espirituwal nga panuytoy sang Dios sa pagtuytoy sang isa ka manugbantay sa iya mga karnero padulong sa maayo nga halalban kag sa nagahatag-kabuhi nga tubig. “Ginatuytuyan niya ako sa ubay sang matinong nga tubig,” siling ni David suno sa isa ka badbad.—Salmo 23:1-3, New International Version.
Mga tinuig sang ulihi, paagi sa iya manalagna nga si Ezequiel, gingamit ni Jehova ang kaanggid nga ilustrasyon. Nagsaad sia nga tipunon niya ang iya katawhan gikan sa kadutaan diin nag-alaplaag sila, subong sang pagtipon sang isa ka manugbantay sa iya mga karnero. “Dalhon ko sila sa ila duta kag pakaunon sila sa mga bukid sang Israel, sa ubay sang mga sapa,” pasalig niya sa ila.—Ezequiel 34:13.
Si Jehova nga Dios man nabalaka gid tuhoy sa pag-aman sing espirituwal nga tubig. Ginalaragway sang tulun-an sang Bugna ang “suba sang tubig sang kabuhi” nga nagailig gikan sa trono sang Dios. (Bugna 22:1) Ang tanan nga tawo ginaagda nga mag-inom gikan sa sini nga suba. ‘Ang bisan sin-o mahimo makakuha sing tubig sang kabuhi nga walay bayad.’—Bugna 22:17.
Ining simbuliko nga tubig sang kabuhi nagarepresentar sa mga kahimusan sang Dios para sa kabuhi nga walay katapusan. Ang bisan sin-o mahimo makasugod sa pag-inom gikan sini nga tubig paagi sa ‘pagkuha sing ihibalo tuhoy sa lamang matuod nga Dios kag sa isa nga ginpadala niya, si Jesucristo.’—Juan 17:3.