“Nasapwan Ko ang Pag-abyanay, Gugma, kag Igtalupangod”

“PAAGI sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Subong sang ginsiling ni Jesus, ang gugma nangin tanda sang Cristianong paghiliutod sang una. Si Tertullian, nga nagsulat kapin sa isa ka gatos ka tuig pagkatapos napatay si Cristo, nagbalikwat sa mga maninilag nga nagasiling: ‘Tan-awa kon paano sila nagahigugmaanay kag kon paano sila handa pa gani nga mapatay para sa isa kag isa.’

Makita pa bala sa kalibutan ini nga sahi sang gugma? Huo. Binagbinaga, halimbawa, ang sulat nga nabaton sang sanga talatapan sang mga Saksi ni Jehova sa Brazil. Ang isa ka babayi, nga si Marília, nagsulat:

“Samtang nagapuyo sa Villa Mercedes, Argentina, ang akon iloy, nga isa sang mga Saksi ni Jehova, nagmasakit sing osteoarthritis, nga nangin kabangdanan nga maparalisado sia halin sa hawak paubos. Sa una nga walo ka bulan sang iya pagmasakit, ang mga Saksi sa Villa Mercedes amo ang mahigugmaon kag mapatugsilingon nga nag-atipan sa iya. Gin-atipan nila ang tanan nga butang, pagtinlo sang iya balay kag pagluto sang iya pagkaon. Bisan sang yara sa ospital, pirme may kaupod si Nanay adlaw kag gab-i.

“Nagpauli na kami ni Nanay sa Brazil, diin nagapaayo pa sia gikan sa iya balatian. Ang mga Saksi sa lugar nga ginapuy-an namon karon nagahimo sang tanan nila nga masarangan agod makabulig sa pag-ayo ni Nanay.”

Ginhinakpan ni Marília ang iya sulat: “Ginaako ko nga indi ako isa ka Saksi, apang nasapwan ko ang pag-abyanay, gugma, kag igtalupangod sa tunga sang mga Saksi.”

Sa pagkamatuod, may mga tawo pa nga nagapakita sang matuod nga Cristianong gugma paagi sa buhat. Sa paghimo sini, ginapasundayag nila ang posible nga gahom sang mga panudlo ni Jesus sa aton kabuhi.