Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ano ang pila ka rason kon ngaa tuman gid nga kalainan ang nagaluntad karon?

Ang isa ka kabangdanan sang malain nga mga buhat amo ang huyog sang tawo nga maghimo sing kalainan. (Genesis 8:21) Ang isa pa ka kabangdanan amo nga kalabanan nga tawo kulang sing sibu nga ihibalo tuhoy sa kabubut-on sang Dios. Dugang pa, si Satanas, nga amo ang ginhalinan sang kalautan, padayon nga nagapahilabot sa mga ginahimo sang tawo.​—⁠1/1, pahina 4-6.

• Ano ang positibo nga mga epekto sang isa ka maayong pulong sa nagakaigo nga tion? (Hulubaton 12:25)

Makahatag ini sa kahambal naton sing kompiansa sa kaugalingon, makapahulag kag makapalig-on sa iya, kag makapabatyag sa iya nga bahin sia sang isa ka grupo. Subong man, kon nagatinguha kita sa paghatag sing komendasyon, ginabuligan kita nga makita ang maayo sa iban.​—⁠1/1, pahina 16-17.

• Ano ang unod sang kaban sang katipan?

Nagaunod ini sing duha ka tapitapi nga bato sang Kasuguan kag sing manna. Pagkatapos nga nagrebelde si Kore, ang sungkod ni Aaron ginsulod sa Kaban agod mangin isa ka saksi batok sa sadto nga kaliwatan. (Hebreo 9:4) Mahimo nga ang sungkod ni Aaron kag ang manna ginkuha sa Kaban antes madedikar ang templo ni Solomon.​—⁠1/15, pahina 31.

• Ngaa ang mga Judiyo sang panahon ni Nehemias ginsugo nga magsuplay sing kahoy sa templo?

Ang pagdulot sing kahoy wala ginsugo sang Mosaikong Kasuguan. Apang, sang panahon ni Nehemias kinahanglan ang padayon nga suplay sang kahoy agod igatong sa mga halad sa altar.​—⁠2/1, pahina 11.

• Ano ang Muratorian Fragment?

Bahin ini sang isa ka Latin nga manuskrito. Ang orihinal sini ginsulat sa Griego sang mga hingapusan sang ikaduha nga siglo C.⁠E. Nagaunod ini sang pinakadaan nga listahan sang mga tulun-an sang Cristianong Griegong Kasulatan nga ginakabig nga masaligan, subong man sang mga komento tuhoy sa mga tulun-an kag sa mga manunulat sini.​—⁠2/15, pahina 13-14.

• Ngaa padayon nga nagpamalibad si Reyna Vasti sang Persia sa pagkadto sa hari? (Ester 1:10-12)

Wala ginasambit sa Biblia kon ano ang iya motibo. Ang pila ka iskolar nagasiling nga wala sia nagtuman bangod indi niya luyag nga pakahuy-an ang iya kaugalingon sa pagpakig-upod sa hubog nga mga bisita sang hari. Ukon mahimo nga ining matahom nga reyna indi gid mapinasakupon, sa amo isa ka di-maayo nga halimbawa para sa mga asawa sa Emperyo sang Persia.​—⁠3/1, pahina 9.

• Paano ang gawad nagaaman sing kahilwayan?

Ang halad ni Jesus makahilway sa aton sa napanubli nga sala kag makahilway sa aton gikan sa makamamatay nga mga epekto sang sala. (Roma 6:23) Ini nga halad nagahilway sa matuod nga mga Cristiano gikan sa makasasala nga konsiensia. Kag paagi sa pagtuo sa gawad, indi na kita magakahangawa tuhoy sa aton tindog sa atubangan sang Dios. (1 Juan 2:1)​—⁠3/15, pahina 8.

• Ano ang matun-an naton gikan sa pagdumili sang Kasuguan nga indi paglutuon ang tinday nga kanding sa gatas sang iya inang? (Exodo 23:19)

Ini nga pagluto mahimo isa ka pagano nga rituwal agod mag-ulan. (Levitico 20:23) Gin-aman sang Dios ang gatas sang inang para tition sang tinday agod makabulig sa iya pagdaku. Ang pagluto sang tinday sa gatas mismo sang iya inang nagapakita sing pagtamay sa ginpasad sang Dios nga kaangtanan sa tunga sang inang kag tinday. Ang kasuguan batok sa sini nagapakita sang mapinalanggaon nga kaawa sang Dios.​—⁠4/1, pahina 31.