SABAT SA MGA PAMANGKOT SA BIBLIA
Posible bala kita mabuhi sing wala katapusan?
Ano nga aman ang makahilway sa aton sa kamatayon?
Ang una nga tawo nga si Adan ginatos ka tuig nga nagkabuhi. Pero sang ulihi, nagtigulang sia kag napatay. Sugod sadto, ginatilawan sang mga tawo ang madamo nga paagi para indi magtigulang. Pero wala sang nakapalagyo sa kamatayon. Ngaa? Nagtigulang kag napatay si Adan bangod nakasala sia paagi sa indi pagsunod sa Dios. Nagatigulang kita bangod napanubli naton ang sala ni Adan kag ang kabayaran sini, ang kamatayon.—Basaha ang Genesis 5:5; Roma 5:12.
Para mabuhi sing dayon, kinahanglan naton ang gawad. (Job 33:24, 25) Ang gawad amo ang ginabayad para mahilway ang isa, kag sa aton kahimtangan, kinahanglan naton mahilway sa kamatayon. (Exodo 21:29, 30) Ginbayad ni Jesus ini nga bili sang mapatay sia para sa aton.—Basaha ang Juan 3:16.
Paano naton matigayon ang kabuhi nga wala sing katapusan?
Indi tanan sarang mahilway sa balatian kag pagtigulang. Ang matuod, madula sang mga tawo nga wala nagasunod sa Dios ang kahigayunan nga mabuhi, pareho sang ginhimo ni Adan. Ang mga tawo lamang nga ginpatawad sa ila mga sala ang magakabuhi sing wala katapusan.—Basaha ang Isaias 33:24; 35:3-6.
Para patawaron, dapat may himuon kita. Dapat naton kilalahon ang Dios paagi sa pagtuon sang iya Pulong, ang Biblia. Nagatudlo ini sa aton kon paano magkabuhi sing mas maayo, mapahalipay ang Dios, kag matigayon ang kabuhi nga wala sing katapusan.—Basaha ang Juan 17:3; Binuhatan 3:19.