Ngaa Wala Ginngalanan ang Iban nga Karakter sa Biblia?

Sa tulun-an sang Biblia nga Rut, ang tawo nga wala nagtuman sa Kasuguan nga ginhatag sang Dios kay Moises gintawag nga si Kwan. (Rut 4:1-12) Makasiling bala kita nga ang tanan nga karakter sa Biblia nga wala ginngalanan may malain nga mga kinaiya ukon indi importante?

Indi. Binagbinaga ang isa pa ka halimbawa. Para ihanda ang iya katapusan nga panihapon sa Paskua, ginsilingan ni Jesus ang iya mga disipulo nga “kadto kamo kay Kwan [“isa ka lalaki,” Biblia sang Katilingban sang mga Kristiano]” kag maghanda sa iya balay. (Mateo 26:18) Makasiling bala kita nga si “Kwan” sa sini nga bersikulo malain ukon indi importante? Indi gid man, kay ang “isa ka lalaki” nga ginsambit wala sing duhaduha nga disipulo ni Jesus. Bangod indi gid man importante ang iya ngalan sa sugilanon, wala na ini ginsambit.

Ang rekord sang Biblia nagalakip man sang ngalan sang malaut nga mga tawo; amo man sang mga matutom nga wala ginngalanan. Halimbawa, kilala gid si Eva nga amo ang una nga babayi. Pero bangod sang iya pagkamaiyaiyahon kag pagkadimasinulundon nakasala si Adan, amo nga nagaantos kita. (Roma 5:12) Sa pihak nga bahin, wala ginsambit sa Biblia ang ngalan sang asawa ni Noe, pero daku ang aton kabalaslan sa iya bangod nagsakripisyo kag nagsakdag sia sa importante nga hilikuton sang iya bana. Maathag nga ang indi pagsambit sang iya ngalan wala nagapakita nga indi sia importante ukon wala sia ginpakamaayo ni Jehova.

May iban pa nga wala ginsambit sa Biblia nga may importante nga papel sa katuyuan ni Jehova. Isa sa sini amo ang bata nga Israelinhon nga babayi nga nangin ulipon ni Naaman, ang pangulo nga soldado sang Siria. Maisog niya nga ginsiling sa iya agalon, ang asawa ni Naaman, ang parte sa propeta ni Jehova sa Israel. Bangod sini natabo ang isa ka daku nga milagro. (2 Hari 5:1-14) Maayo man nga halimbawa sang pagtuo ang ginpakita sang bata nga babayi sang hukom sang Israel nga si Jefte. Handa sia nga indi mamana para matuman ang ginsumpa sang iya amay. (Hukom 11:30-40) Sing kaanggid, wala man ginngalanan ang nagsulat sang sobra 40 ka salmo, subong man ang matutom nga mga propeta nga may importante nga mga asaynment.—1 Hari 20:37-43.

Ang nagpakita sang maayo gid nga halimbawa sa sini amo ang matutom nga mga anghel. Ginatos sila ka milyon, pero duha lang sa ila ang ginngalanan sa Biblia—sanday Gabriel kag Miguel. (Daniel 7:10; Lucas 1:19; Judas 9) Ang iban wala na ginngalanan sa Biblia. Halimbawa, ginpamangkot ni Manoa, nga amay ni Samson, ang isa ka anghel: “Sin-o bala ang imo ngalan, agud nga, kon matuman ang imo polong, pasidunggan ka namon?” Nagsabat sia: “Ngaa bala nagapamangkot ka sang akon ngalan?” Mapainubuson nga wala ginbaton sang anghel ang dungog nga para lamang sa Dios.—Hukom 13:17, 18.

Wala ginpaathag sang Biblia kon ngaa ginngalanan ang iban kag ang iban wala. Pero may matun-an kita sa mga matutom nga nag-alagad sa Dios nga wala sing handum nga mangin bantog ukon prominente.