TOPIKO SA KOBER | GINHARIAN SANG DIOS—NGAA IMPORTANTE INI SA IMO?

**Ginharian sang Dios—Ngaa Importante Ini sa Imo?**

Mahimo nga nahangpan mo na sa nagligad nga mga artikulo nga ang Ginharian sang Dios importante gid sa mga Saksi ni Jehova. Kag mahimo interesado ka sa pila ka pagpakamaayo sini sa palaabuton. Pero mahimo nagapalibog ka kon bala matuman gid ini.

Maayo gid nga mangin mainandamon ka sangsa magpati dayon. (Hulubaton 14:15) Kay mahimo nga pareho ka sa taga-Berea sadto.a Sang una nila nga pagkabati sang maayong balita sang Ginharian, ginbaton nila ini, pero indi lang bangod luyag nila ini nga mangin matuod. Sa baylo, gin-usisa nila sing maayo ang Kasulatan “kon bala matuod gid ini nga mga butang.” (Binuhatan 17:11) Buot silingon, ginkomparar sang mga taga-Berea ang maayong balita nga ila nabatian sa kon ano ang ginasiling sang Kasulatan. Sang ulihi, nakumbinsi sila nga napasad gid ini sa Pulong sang Dios.

Ginapangabay ka sang mga Saksi ni Jehova nga amo man ang imo himuon. Paagi sa amon programa nga libre nga pagtuon sa Biblia, ginahatagan namon ikaw sing kahigayunan nga ipaanggid ang ginapatihan namon parte sa Ginharian sang Dios sa ginatudlo sang Biblia.

Magluwas sa imo matun-an parte sa sini, mabuligan ka man sang pagtuon sa Biblia nga masapwan ang mga sabat sa pila ka pamangkot sa kabuhi.

Diin kita naghalin?
Ano ang katuyuan sang kabuhi?
Ngaa ginatugutan sang Dios ang pag-antos?
Ano ang nagakatabo kon mapatay kita?
Malaglag bala ang duta?
Paano mangin malipayon ang pamilya?

Labaw sa tanan, ang pagtuon sa Biblia makabulig sa imo nga ‘magpalapit sa Dios.’ (Santiago 4:8) Kon makigsuod ka sa iya, mahangpan mo pa gid ang mga pagpakamaayo sang Ginharian sang Dios sa imo, indi lang subong kundi asta sa walay katapusan. Si Jesus mismo nangamuyo sa iya Amay: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”—Juan 17:3.

Mahimo gamiton sang mga Saksi ni Jehova ini nga libro para tun-an ang Biblia upod sa imo.

Para sa libre nga pagtuon sa Biblia, mangabay sa isa sang mga Saksi ni Jehova ukon magpil-ap sang form sa www.pr418.com/hil. (Buksi ang MANGABAY SING PAGTUON SA BIBLIA sa umpisa)

a Ang Berea isa ka siudad sa dumaan nga Macedonia.

Kon Ngaa Importante sa Iya ang Ginharian sang Dios

Sining karon lang, si Folake nga napulo ka tuig, ginpasulat sang essay sa eskwelahan parte sa “Ang Nanamian Ko Gid sa Kalibutan.” Ginpili niya nga isulat kon ngaa nalipay sia nga isugid sa iban ang Ginharian sang Dios.

“Ang Ginharian sang Dios matuod nga gobierno,” siling niya. “Pero indi ini makita bisan mag-antipara ka pa!”

Ginsulat man niya ang mga pagpakamaayo sang Ginharian nga ginakalangkagan gid niya. Ginsambit niya ang pila ka problema nga dulaon sini. Nagsulat sia, “Nasubuan gid ako kon makita ko ang mga wala sing balay kag nagaistar lang sa dalan” subong man “ang mga bata nga nagakapatay sa gutom sa bilog nga kalibutan.” Nagdugang sia, “Pero nalipay ako kon basahon ko ang Isaias 65:21.” Ini nga bersikulo nagapromisa parte sa mangin mga sakop sang Ginharian sang Dios: “Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila.”

Nagsiling man si Folake nga ginahulat niya ang tion nga dulaon sang Dios ang tanan nga balatian paagi sa iya Ginharian. Sa iya essay, ginkutlo niya ang Bugna 21:4, nga nagasiling nga “pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” Sa paghingapos, ginsulit niya nga ang pagbantala parte kay Jehova kag sa iya Ginharian amo ang nanamian gid niya sa kalibutan. Maathag nga importante gid sa sini nga bata ang Ginharian sang Dios!