Pamangkot

◼ Kon may ginapa-tour sa Bethel, ano ang dapat dumdumon may kaangtanan sa pamayo kag pamustura?

Sa pagbinagbinag sang importansia sang nagakaigo nga pamayo kag pamustura, ang Organisado sa Pagtuman sang Aton Ministeryo nagakomento tuhoy sa pagkakinahanglanon sang pisikal nga katinlo, maugdang nga pamayo, kag maayo nga pamustura kon nagaalagad sa latagon kag nagatambong sa Cristianong mga miting. Nian, sa pahina 131, parapo 2, ini nagasiling: “Naaplikar man ini kon nagaduaw kita sa puluy-an Bethel sa Brooklyn ukon sa bisan anong sanga talatapan sang Sosiedad. Dumduma, ang ngalan Bethel nagakahulugan ‘Balay sang Dios,’ gani ang aton pamayo, pamustora kag paggawi dapat nga mangin kaangay sa ginapaabot kon nagatambong sa mga miting para sa pagsimba sa Kingdom Hall.”

Samtang ang kalabanan sang mga kauturan nga nagaduaw sa Bethel nagapanapot sing nagakaigo, ang iban nga mga kauturan nga lalaki kag babayi naobserbahan nga may huyog gihapon nga mangin sobra ka di-pormal sa ila pamayo samtang yara sa Bethel. May kaangtanan sini, subong sa tanan iban pa nga mga bahin sang aton Cristianong kabuhi, luyag naton huptan ini man nga mataas nga mga talaksan nga nagahamulag sa aton gikan sa daan nga kalibutan. Gani kon nagaduaw sa Bethel, pamangkuta ang imo kaugalingon: ‘Ang akon bala pamayo kag pamustura maugdang? Nagapabanaag gid bala ini sa Dios nga akon ginasimba? Mahimo bala masandad ang iban sa akon hitsura? Nagapahamtang bala ako sing maayo nga halimbawa sa iban nga nagatour sa Bethel upod sa amon, ayhan sa nahauna nga tion?’

Natalupangdan na nga ang kalabanan sadtong wala nagapanapot sing nagakaigo sa tion sang pagtour sa Bethel amo ang mga estudyante sang Biblia ukon mga interesado. Sa amo, antes sila agdahon sa Bethel, kinahanglan anay naton ipaathag sa ila ang mga talaksan sang pamayo kag pamustura sang Bethel agod makahanda sila kag makapanapot sing nagakaigo. Samtang mahimo kita mag-alang-alang sa paghimo sini, mas mahigugmaon gid ini sangsa magbatyag sila sing kahuya bangod sang pagkadto sa Bethel nga wala makapanapot sing nagakaigo.

Kabay nga kita, subong man ang aton mga ginatun-an, paagi sa aton pamayo kag pamustura pirme ‘magpuni sang panudlo sang aton Manluluwas, ang Dios, sa tanan nga butang.’​—⁠Tito 2:⁠10.