Pagabuhinan ang Suskripsion

Luyag ipahibalo sang sanga talatapan sa inyo nga gin-aprobahan sang Nagadumala nga Hubon nga buhinan ang suskripsion nga ginatatap sang mga sanga sa bug-os nga kalibutan. Subong ginpaathag sa amon sulat sa tanan nga kongregasyon sang Enero 1, 2002, sugod karon limitado na lamang nga kadamuon sang suskripsion ang tatapon sang sanga talatapan, bangod sang kataason sang bili sang pagpadala sa koreo sang indibiduwal nga kopya sang mga magasin. Ang nasugdan nga mga suskripsion padayunon na lamang tubtob matapos.

Ang tanan nga kauturan, subong man ang interesado nga mga tawo nga nagapakig-angot sa lokal nga kongregasyon, magabaton na karon sang ila personal nga kopya paagi sa suplay nga magasin sang kongregasyon kag indi na paagi sa suskripsion. Bangod sini, dapat pat-uron sang tanan nga kongregasyon nga nagabaton sila sing supisyente nga mga magasin para ang tanan nga gusto magkuha makatigayon sang magasin. Para sa publiko, ginapalig-on namon ang mga manugbantala nga irekord yadtong luyag magbaton sing regular sang aton mga magasin kag idul-ong ini sing personal. Paagi sini makapakig-angot sila sing personal sa sining mga indibiduwal, nga mahimo magresulta sa dugang pa nga mga pagtuon sa Biblia.

Sa pila ka tumalagsahon nga kahimtangan, ang pila ka interesado nga tawo nagakabuhi sa nabaw-ing nga mga duog nga mabudlay lab-uton, ukon may post office box nga ginadul-ungan sang koreo. Padayunon gihapon sang sanga talatapan ang pagpadala sing personal nga suskripsion sa sining mga indibiduwal. Apang diutay lamang ini, sa amo mabuhinan ang gasto sa koreo kag ang mga tawo sa opisina nga nagatatap anay sini nga kahimusan sa suskripsion.