“Kari Ka Mangin Sumulunod Ko”
1. Ano ang aton binagbinagon sa Pagtinuon sang Kongregasyon sa Biblia sa masunod nga mga binulan?
1 Ang apat ka Ebanghelyo parte sa kabuhi ni Jesus sa duta nagaunod sing sibu nga impormasyon parte sa Anak sang Dios. Bangod ginsugo ang mga Cristiano nga ‘sundon sing maayo ang iya mga tikang,’ kinahanglan kita maghanda kag mamati sing maayo samtang binagbinagon naton ang libro nga “Kari Ka Mangin Sumulunod Ko” sa Pagtinuon sang Kongregasyon sa Biblia sugod sa Marso 1. (1 Ped. 2:21; Mar. 10:21) Talupangdon naton sing maayo ang mga bahin sang kabuhi ni Jesus nga magapalig-on sa aton sa ministeryo.
2. Ano ang aton matun-an sa pagkamabinatason ni Jesus?
2 Halimbawa nga Ginpahamtang ni Jesus: Nakasumalang ka na bala sing negatibo nga reaksion sa pagpamalaybalay? Kon amo, madumduman mo ang kamatuoran sang ginsiling ni Jesus: “Kon ginhingabot nila ako, hingabuton man nila kamo.” (Juan 15:20) Matuod, indi tanan nga negatibo nga reaksion makabig nga paghingabot. Apang, bangod sa kalipay nga ginbutang sa iya atubangan ginbatas ni Jesus ang tanan nga sahi sang pagsulay kag pagtilaw. Mahimo man naton dumdumon pirme nga matigayon naton ang kahamuot ni Jehova kag ang padya bangod sa aton katutom. Magabulig ini sa aton agod ‘indi pagkapuyon kag punawon ang aton kalag.’ (Heb. 12:2, 3; Hulu. 27:11) Samtang nagapadayon kita sa aton ministeryo, masaligan man naton ang bulig ni Cristo Jesus.—Mat. 28:20.
3. Paano naton mailog ang pagtamod ni Jesus sa ministeryo?
3 “Tungod Sini Ginpadala Ako”: Ang hilikuton nga pagbantala sing Ginharian amo ang panguna kay Jesus. (Luc. 4:43) Kinabubut-on niya nga gintuman ang iya ministeryo. Ginkabig niya ini subong hilingagawon, nga nagapangita pirme sing kahigayunan nga mabantala ang Ginharian. Sanglit mga sumulunod kita ni Jesus, ano ang mangin epekto sa aton sang pagsunod sa iya mga tikang? Samtang ginahimo naton ang aton adlaw-adlaw nga mga hilikuton, may mga tawo bala nga mahimo naton mapaambitan sang maayong balita? Kabay nga ang gugma ni Cristo magapahulag sa aton nga ibantala sing lapnag ang maayong balita!—2 Cor. 5:14.
4. Sa ano nga paagi mahimo naton mapauswag ang kalidad sang aton pagministeryo?
4 “Wala Pa Gid sing Tawo nga Nakahambal Kaangay Sini”: Nagdayaw gid ang mga tagpalamati ni Jesus sa iya pamaagi sang pagtudlo. (Juan 7:46; Mat. 7:28, 29) Paano sia nangin tuhay sa iban nga manunudlo? Ginhigugma niya ang kamatuoran nga iya gintudlo kag ang mga tawo nga iya gintudluan, kag naggamit sia sing lainlain nga pamaagi sang pagtudlo. Paagi sa pag-ilog sa Dakung Manunudlo, mahimo naton mapauswag ang kalidad sang aton pagministeryo.—Luc. 6:40.
5. Ano ang dapat mangin tulumuron naton samtang ginatun-an naton ang “Kari Ka Mangin Sumulunod Ko”?
5 Pila lamang ini sa maayo nga mga butang nga matun-an naton sa kabuhi ni Jesus. Anong iban pa nga maayong butang ang mahimo mo masapwan? Samtang ginausisa mo ang kabuhi ni Jesus sa tion sang Pagtinuon sang Kongregasyon sa Biblia, tinguhai nga “makilala ang gugma ni Cristo” paagi sa pag-ilog sa iya mga pulong kag binuhatan.—Efe. 3:19.