Ihanda ang Imo Tagipusuon

Kon nagatuon kita sang Biblia, gusto naton nga maimpluwensiahan sang panghunahuna ni Jehova ang aton ginahunahuna, ginabatyag, kag ginahandum. Maayo gid nga halimbawa si Esdras parte sa sini. ‘Ginhanda niya ang iya tagipusuon agod tun-an ang Kasuguan ni Jehova.’ (Esd. 7:10) Paano naton mailog si Esdras?

Mangamuyo. Umpisahi ang imo pagtuon paagi sa pagpangamuyo. Pangabaya si Jehova nga buligan ka nga mahangpan ang imo matun-an kag maaplikar ini.​—Sal. 119:​18, 34.

Mangin mapainubuson. Kon bugalon ang isa ka tawo kag indi sia magpabulig para mahangpan ang Biblia, indi sia pagtudluan sang Dios parte sa kamatuoran. (Luc. 10:21) Gani kon naga-research ka, indi mo dapat pag-ipadayaw sa iban ang imo mga natun-an. Kag kon narealisar mo sa imo pagtuon nga may dapat ka bag-uhon sa imo kaugalingon, mangin mapainubuson kag bag-uha ang mga dapat mo bag-uhon.

Magpamati sa aton mga kanta. May epekto ang musika sa aton panghunahuna. Gani kon magpamati ka sa aton mga kanta antes ka magtuon, makabulig ini sa imo nga magpokus kay Jehova. Paagi sa sini, mahanda mo ang imo tagipusuon.