Pamangkot sang mga Pamatan-on ...
Paano Ako Mangin Suod sa Dios?
‘TAWO ako, ang Dios balaan. May latid ako, ang Dios wala sing latid. Unod ako, ang Dios espiritu. Gani paano ako makapakig-angot sa Dios?’ Amo sina ang ginapamangkot sang madamo nga pamatan-on karon nahanungod sa Dios. ‘Kon kaisa nagapalibog ako,’ siling sang pila ka pamatan-on, ‘kon bala luyag gid sang Dios nga magkomunikar ako sa Iya ukon kon bala luyag Niya nga pabay-an lamang sia.’ Ang iban pa gid nagareklamo, ‘Kon nagapangamuyo ako, wala ako sing mabatian nga tingog nga nagasugid sa akon kon paano ko lubaron ang akon mga palaligban.’
Apang, indi tanan nga pamatan-on subong sini. Si George Gallup, Jr., sa iya publikasyon nga Religion in America 1984 nagsiling: “Mahimo nga ang mga tin-edyer nagabatyag sing suod nga kaangtanan sa Dios sang sa ila mga ginikanan.” Apang samtang 95 porsiento sang mga tin-edyer nga gin-interbyu ang nagsiling nga nagatuo sila sa Dios ukon sa isa ka unibersal nga espiritu, wala ini nagakahulugan nga sila may kaangtanan sa iya.
Ang pagkamalapit sa Dios nagakinahanglan sing kapin pa sa pagtuo lamang sa iya. Nagakahulugan ini sing pag-aplikar sang ginatuohan, nga nagalakip sing pagpalambo sing pagpakig-abyan sa Dios. Sa amo, ang Biblia nagahambal nga ang matutom nga si Abraham gintawag nga “abyan ni Jehova.” Matuod, ang pagpalambo sing bisan anong kaangtanan isa ka hilikuton. Apang takus bala sa panikasog ang pagpakig-abyan sang Dios?—Santiago 2:23.
Kon Ngaa Importante Ini
“Paagi sa iya nagakabuhi kita kag nagahulag kag nagaluntad,” siling ni apostol Pablo. (Binuhatan 17:28) Sa luyag mo man kag sa indi, ang imo kabuhi nasandig sa Dios. Ang hangin nga imo ginaginhawa, ang kalan-on nga imo ginakaon, ang tubig nga imo ginainum—pila lamang ini sang iya mga aman. Busa indi bala may utang kita sa iya? Ini lamang isa na ka rason kon ngaa luyag naton mangin suod sa Dios. (Genesis 1:27, 28; Salmo 104:14) Apang, may dugang pa nga rason kon ngaa dapat mo himuon ini.
“Indi sa tawo nga nagalakat ang pagtuytoy sang iya tikang,” siling sang Biblia. Indi buot silingon nga ang tawo indi makatilaw, apang kon wala ang pagtuytoy sang Dios indi sia nasangkapan sa paghimo sini. (Jeremias 10:23; Hulubaton 12:15) Ang mga inaway, krimen, kasingki, polusyon, kag madamo pa nga kahimtangan nga kinaandan karon nagpamatuod sa sini. Huo, ang indi pagkalapit sa Dios naghalit sa katawhan. Apang kamusta ikaw subong indibiduwal?
Kon abyan ikaw sang Dios mabuligan ikaw sa paglandas sang personal nga mga palaligban. Ang tawo “malip-ot sing mga adlaw kag puno sing kabudlayan,” siling sang Biblia. (Job 14:1, The Bible in Living English) Apang, paagi sa tuytoy nga iya ginahatag sa aton paagi sa iya Pulong, matuytuyan ikaw sang Dios sa mga dalanon nga para sa imo dayon nga kaayohan. “Salig kay Jehova sa bug-os mo nga tagipusuon kag dili magsandig sa imo kaugalingon nga paghangop,” laygay sang Biblia. “Sa tanan mo nga dalanon kilalaha sia, kag tadlungon niya ang imo mga banas.”—Hulubaton 3:5, 6; Salmo 16:11.
Interesado man ang Dios sa imo kaayohan sa palaabuton. Ang iya saad nga walay katapusan nga kabuhi sa duta—sa malinong kag matarong nga mga kahimtangan—sa mga hanuot nga nagapangita sa iya nagahimo sang pagtinguha nga mangin suod sa Dios nga labi ka importante. (Juan 17:3; Salmo 37:9-11, 29; Bugna 21:3, 4) Gani, paano ikaw makaumpisa agod mangin suod sa iya?
Pangilalaha ang Dios
Antes mo pilion ang isa nga mangin suod nga abyan, dapat mo anay sia pangilalahon. Magpalagpat ka lang bala sa pagpili sing abyan—wala ginapangilala ang iya ngalan, ang iya personalidad, ang iya mga intereses, kag ang iya madalom nga mga panghunahuna kag mga emosyon? Ayhan indi. Subong man, agod mangin malapit ikaw sa Dios dapat ka anay magtuon nahanungod sa iya. (Juan 17:3) Mag-umpisa paagi sa pagtuon sang Biblia. Makabulig ini sa imo agod makilala ang Dios subong isa ka persona. Maton-an mo kon paano sia nagahunahuna kag kon ano ang iya ginakinahanglan sa imo.
Bisan pa ang Biblia ginsulat sa hambal nga simple kag maathag, kinahanglan ang disiplinado nga pagtuon sini. Sing dimakalilipay, para sa kalabanan nga tawo, ang Biblia isa gihapon ka wala ginabasa kag dumuluong nga dokumento. Suno sa Gallup Youth Survey, “isa lamang sa walo ka tin-edyer (12%) ang nagabasa sang Biblia adlaw-adlaw, kag 30% ang wala gid nagabukas sang libro ukon indi makadumdom kon san-o ang katapusan nga ginhimo nila ini.” Sing makawiwili, 52 porsiento ang nagasiling nga ginabasa nila ang pamantalaan adlaw-adlaw. Apang ang ‘paghangop kon ano ang kabubut-on ni Jehova,’ ginabasa ang iya Pulong sing regular kinahanglanon.—Efeso 5:17; Josue 1:8.
Apang, ang pagpalapit sa Dios indi lamang pagkuha sing mga kamatuoran nahanungod sa iya. Subong sang sa bisan anong relasyon sa karon, kinahanglan ang isa ka porma sang komunikasyon. Tuhoy kay Jehova nga Dios, amo ini ang pangamuyo.
Magkomunikar
Para sa pila ka pamatan-on, ang pagpakighambal sa Dios sa pangamuyo daw imposible, daw handurawan lamang ukon indi matuod. Apang, subong ginsiling sang 17-anyos nga si Laverne, “mabudlay gid hambalon nga may yara ikaw personal nga relasyon sa isa kon wala ikaw nagapakighambal sa iya.” Matuod, kinahanglan ang ihibalo. Apang sig-ano man ang imo nahibaloan nahanungod sa Dios, kon ikaw indi regular nga nagapangamuyo sa iya, ang imo mga panikasog mahimo nga wala sing pulos.
Si Lynda ginpadaku sa isa ka Cristianong pamilya. Apang, sa pagbinagbinag sang iya mga tinuig subong tin-edyer, sia nagsiling, “Sa tanan sadtong mga tinuig, malaka lang nga indi ako makatambong sa Cristianong miting, kag wala gid sing bulan nga wala ako makabantala, apang wala gid ako makapalambo sing suod kag personal nga relasyon kay Jehova.” Apang sa isa ka punto sang iya kabuhi, sang mabaskog ang mga problema kag kahuol, ano ang nakabulig sa iya? “Wala ako mag-untat sa pagpangamuyo sa sulod sang mga inadlaw sa pagpangayo sing mga sabat sa akon mga palaligban.” Wala madugay narealisar niya nga si Jehova magabulig sa iya mga palaligban, kag nalandas niya ini.
Pareho man bala ikaw kay Lynda, nga ikaw nagahimo sing maayong Cristianong mga butang, apang indi ikaw suod sa Dios? Natilawan mo na bala nga mangamuyo sa iya nahanungod sini? Ang Biblia maathag nga nagasiling nga “si Jehova malapit sa tanan nga nagapanawag sa iya.” (Salmo 145:18) Amo kon ngaa ang Biblia nagapalig-on sa aton nga ‘indi mag-untat sa pagpangamuyo,’ “magpadayon sa pagpangamuyo,” kag “magpangamuyo sa tanan nga tion.” (Mateo 26:41; Roma 12:12; Efeso 6:18) Bisan pa wala ini nagakahulugan nga ihinguyang mo ang tanan mo nga tion—24 ka oras kada adlaw—sa pagpangamuyo, nagakahulugan ini nga dapat ikaw magpangamuyo sing regular. Apang kon nagapangamuyo ikaw, nagapamati bala ang Dios?
Nagapamati sia kon ginatuman mo ang iya mga kondisyon para sa pangamuyo kag kon husto nga mga butang ang ginapangamuyo mo. Gingamit ni Jesucristo ang iya modelo nga pangamuyo subong sulundan. (Lucas 11:1-4) Apang, ginsilingan ni disipulo Santiago ang pila ka Cristiano sang iya adlaw: “Nagapangamuyo kamo, apang wala nagabaton, bangod malain ang inyo katuyoan sa pagpangayo.” (Santiago 4:3) Busa, kon ang imo mga pangamuyo makagod ukon nagasikway sang kabubut-on sang Dios, indi mo mapaabot nga pamatian ini sang Dios.
Apang, ang pagpakighambal lamang sa Dios wala nagakahulugan nga pangamuyo. Ang imo pangamuyo dapat may lakip nga debosyon, pagsalig, pagtahod, kag pagsandig sa iya. Ibubo ang imo tagipusuon sa iya subong amo ang himuon mo sa isa ka mahinangpanon nga amay. Apang, “sa tagsa ka butang sa pangamuyo . . . ipakilala sa Dios ang imo mga pangabay.” (Filipos 4:6) Sa gihapon, kapin pa sa ihibalo kag pangamuyo ang kinahanglanon agod mangin suod ikaw sa Dios. Dapat ikaw manikasog nga ipahisuno ang imo kabuhi sa mga prinsipio sang Biblia.
Iaplikar ang Imo Kaugalingon
Ang mga lalaki, mga babayi, kag ang mga pamatan-on nagahinguyang sing daku nga tion, nagapanikasog sing daku, kag nagabatas pa gani sing kabudlayan agod malab-ot ang ila personal nga mga tulumuron. Halimbawa, sa ulot sang edad nga 9 kag 19, ang bituon sa skating sang Olimpiada nga si Peggy Fleming nakahinguyang sing kapin sa 20,000 ka oras—isa ka promedyo nga sa dimagkubos lima ka oras kada adlaw—sa pag-ehersisyo kag sa paghanas para sa Olimpiada. Ang iya tulumuron? Amo ang bulawan nga medalya sa Olimpiada. Indi bala dapat nga magkinahanglan sing daku nga panikasog ang pagtinguha nga mangin malapit sa Dios?
Ang iya Pulong nagasiling sa aton nga ‘ubahon ang daan nga kinaugali’ kag ‘dili magpauyon sa sining sistema sang mga butang.’ (Colosas 3:9; Roma 12:2) Nagakinahanglan ini sing padayon nga panikasog sa imo bahin. Apang indi gid ikaw mangin suod sa Dios kon wala ikaw sing himuon nahanungod sini
Gani, agod mangin suod ikaw sa Dios, dapat nga pangilalahon mo sia, magkomunikar ka sa iya paagi sa pangamuyo, kag iaplikar ang imo kaugalingon paagi sa paghimo sang iya kabubut-on. Huo, sugdi ang ‘pagpangita sa Dios, . . . magpangalapkap para sa iya kag makita mo sia, bangod, sa kamatuoran, indi sia malayo sa tagsatagsa sa aton.’—Binuhatan 17:27.
[Kapsion sa pahina 17]
Indi lamang pagtuo sa Dios ang kinahanglan agod mangin suod sa iya
[Kapsion sa pahina 18]
Indi gid ikaw mangin suod sa Dios kon wala ikaw sing himuon nahanungod sini
[Laragway sa pahina 17]
Madamo ang nagapanikasog nga malab-ot ang ila mga tulumuron. Dapat bala nga diutay lamang nga panikasog ang kinahanglan agod mangin suod sa Dios.