May Yara Bala Dayon nga Solusyon?
ANG mga primer ministro kag ang mga presidente naghambalanay na nahanungod sini. Ang mga lider sang mga negosyo kag ang mga pangulo sang mga banko nagpanikasog sa sini. Ang mga ehekutibo sang dalagku nga mga korporasyon naghimo sang ila masarangan. Apang ano karon ang kahimtangan sang negosyo sa tunga sang mga pungsod?
Gikan sa Washington, D.C., naghalin ining report sang Sekretaryo sa Tresuriya, nga si James Baker: “Samtang ginahaumhaum nga mabuhinan ang mga pagkadibalanse [sa negosyo] sa 1987, mahimo nga magasaka ini liwat sa 1988 kag magapabilin nga indi mabaton sang politika kag ekonomiya.”
Gikan sa Seoul, South Korea, amo ining balita: “Ang batok sa Amerikano nga balatyagon nagauswag sa tunga sang mga rebelde kag sang mga estudyante sa South Korea, sa bahin bangod sang makita nila nga pagpaniguro sang Amerika batok sa mga produkto sang Korea. . . . Ginatinguhaan sang Estados Unidos nga isakripisyo ang Korea agod mabuhinan ang iya resto sa negosyo.”
Tuhoy sa Europa, may yari kita sini nga report: “Ang 12 ka pungsod nga European Community [EC], ang pinakadaku nga bloke sang negosyo sang kalibutan, . . . nagasiling nga ang Hapones nga mga kompanya nagatinguha sa pagbawi sang ila pierdi sa Estados Unidos paagi sa pag-eksport sing dugang pa sa Europa . . . [Ang katapo nga mga pungsod sang EC] nagakabalaka nahanungod sa dugang pa nga pagkawalay trabaho subong resulta sang mga import, kag nagapamahog sila nga magbuhin batok sa Hapon.”
Sing maathag, bisan pa ang politikal nga mga lider kag pinansial nga mga ministro sang kalibutan nagtinguha sing lakas, ang ila mga ideya wala magmadinalag-on. Ang negosyo sa ulot sang mga pungsod padayon sa paglain, kag ang ila pagsumbunganay nagalab-ot sa punto sang pagdabdab. May yara bala nga nakahibalo kon paano atubangon ining mga palaligban?
Ang Isa nga May Solusyon
Kon sin-o man ang madinalag-on nga makalubad sang pinansial nga mga palaligban kag sang iban pa nga mga palaligban sang kalibutan pat-od gid nga may ikasarang sa paglubad sang tudok nga mga balagbag sang nasyonalismo, makagod nga ambisyon, pagkawalay pat-od, kag pagkawalay paglaum. Ang iya mga ideya pat-od nga tuhay, huo, batok pa gani sa, kasuguan sang kagulangan nga sa amo napasad ang sistema sang ekonomiya karon. May yara bala sina nga persona?
Huo, may yara, kag ang iya mga panudlo nakilal-an sa mga pungsod. Ginpaathag niya ang nakilal-an subong Bulawanon nga Talaksan: “Busa, ang tanan nga luyag mo nga himuon sang mga tawo sa imo, dapat mo man himuon sa ila.” Kag nagtudlo man sia: “Hatag kamo, kag kamo hatagan. Sukob nga maayo, dinasok, naligoligo, nga nagaawas, ihatag nila sa imo sabak. Kay sa talaksan nga ginataksan ninyo takson kamo liwat.”—Mateo 7:12; Lucas 6:38.
Kilala mo bala kon sin-o ining persona? Sia wala sing liwan kundi amo si Jesucristo, nga ang iya mga panudlo ginadayaw sing lapnag apang talagsa lang ginasunod. Sa kamatuoran, ang kalabanan nga tawo nagapati nga ining mga panudlo tuman ka idealistiko, tuman ka indi praktikal, kag indi gid magmadinalag-on. Amo man bala sina, ayhan, ang imo pagpati? Nian, ngaa indi usisaon ang mga buhat sa tunga sang mga sumulunod ni Jesucristo sang unang siglo kag tan-awon kon paano ining mga prinsipio, nga napasad sa matuod nga gugma, nagmadinalag-on?
Ang Dayon nga Solusyon
Sang mga tuig 55 C.E., si apostol Pablo nagsulat sa Cristianong kongregasyon sa Corinto kag nagsambit sing halad, ukon amot, nga ginhimo sang mga Cristiano sa Europeanhon nga Macedonia kag Achaia sa pagbulig sa ila mga masigka-Cristiano sa Palestina sang Asia. Ini, sa pagkamatuod, isa ka halangdon nga hulag sa ila bahin, apang si Pablo nagpaathag: “Sa pag-alangay sa karon nga tion ang inyo kabugana bulig sa kinawad-on nila, agod nga ang ila kabugana man mangin bulig sa inyo kinawad-on, agod nga may pag-alangay.”—2 Corinto 8:14.
Bisan pa ang ginahambalan diri indi komersial nga negosyo, ang prinsipio nga nadalahig talalupangdon. Ang nahimo sini isa ka pag-alangay sang kabugana kag sang kinawad-on. Apang realistiko bala ang magpaabot nga ang mga prinsipio nga napasad sa gugma magmadinalag-on sa mapintas nga pagkompetensiahanay sang internasyonal nga komersio sang kalibutan karon? Indi, indi ini realistiko. Sa amo, ang lamang dayon nga solusyon nagadalahig sing isa ka hinali nga pagbalhin, nga ginatuyo sang Dios nga himuon.
Nagatudlo sa sining puno sing kagamo nga mga adlaw, ang tagna sang Biblia nagtagna: ‘Sa mga adlaw sadto nga mga hari magapatindog ang Dios sang langit sing ginharian nga . . . magadugmok kag magapapas sa sini tanan nga ginharian, kag ini magapadayon tubtob sa walay katubtuban.’ (Daniel 2:44; Salmo 110:2) Ining Ginharian nga ‘ipatindog sang Dios sang langit’ amo ang gintudlo ni Jesucristo sa iya mga sumulunod nga ipangamuyo sa sining mga pulong: “Magkari ang imo ginharian. Paghimuon ang imo kabubut-on, subong sang sa langit, amo man sa duta.” (Mateo 6:10) Ang mga hitabo sa kalibutan kag ang natuman nga mga tagna sa Biblia nagapamatuod nga ang tion sa paghikot sina nga Ginharian malapit na.
Mahanduraw mo bala kon mangin ano ang mga kahimtangan kon isa lamang ka pangulohan ang nagagahom sa bug-os nga duta? Wala na sing bili sang pagbayluhanay. Wala na sing mga tariff ukon kompetensiahanay sa negosyo. Wala na sing pagmaniobra sa presyo kag pagpaniguro. Ang tanan mangin sa idalom sang isa ka matarong nga bag-ong sistema, indi lamang sa ekonomiya kundi sa politika man, sa relihion, kag sa tanan nga bahin.
Ang mga palaligban nga nagapabudlay sa katawhan malubad lamang kon ang katawhan mahigugmaon nga nagapangabudlay sing tingob