Ang Kalipay sa Paghatag Nagadugang Pa Kon Ginabaton sing Mapinasalamaton

BINAGBINAGA liwat ang bag-ong kasal nga mag-asawa nga ginsambit sa unang artikulo. Makita mo bala sila nga nagatan-awanay sang regalo nga nabaton, nagakomento kon paano ang tagsa ka regalo amo gid ang butang nga ginakinahanglan nila? Makita mo bala ang nobya nga mahalungon nga nagatago sang tabon sa katre kag sang mga punda sang ulunan sa pinasahi nga talaguan agod madali makuha, ang mga pinggan sa platera, ang mga tinidor kag mga kutsara sa kahon, ang ­toaster sa kusina agod madali magamit?

Nagabuligay sila sa pagpakabit sang tagsa ka laragway sa husto nga lugar, ang mga relo sa labing kombenyente nga mga lokasyon. Gindekorasyonan nila ang ila napanubli nga latok-kalan-an sing isa sa bag-o nga mga mantil. Ang nagabagay nga mga napkin sa ginregalo sa ila nga singsing sa napkin nagdugang sing pagkaelegante sa sini.

Nalipay gid sila sa sining regalo—isa ka de-koryente nga abridor. Ginapaabot sang nobya nga gamiton ini pirme. Ginhatag ini sang isa ka mahal nga abyan nga nahibaluan nila indi makasarang sa pagbakal sini para sa iya kaugalingon. Kag ining kobrekama, ginhimo sang iya may edad na nga tiya nga nagabanog ang kamot bangod sa ar­thri­tis. Pat-od nga binulan ang ginhinguyang niya sa pagburda sini. Daw ano nga buhat sang gugma!

Naluyagan nila ang tanan nga regalo. Kuhaon ang isa ka regalo kag bayluhan ini sing lain nga butang ukon sing kuwarta? Indi gid! Nag-abot karon ang labing mahigugmaon nga bahin sang tanan—ang ila pagpasalamat. Magahinguyang bala sila sing tion sa paghimo sini?

Nakabaton ka na bala sing isa ka materyal nga regalo, malahalon ukon indi—ayhan, isa ka pongpong sang mga bulak, isa ka alat sang prutas, ukon isa ka simple nga tanom para sa sulod sang balay? May abyan ka bala nga nagtinlo sang inyo balay sang nagmasakit ka ukon nagluto sing pagkaon para sa imo pamilya sang indi mo ini mahimo? Ginpasalamatan mo bala sila?

Daw ano ka simple nga tinaga ang “salamat.” Sa isa lamang ka pagginhawa masiling ini sang isa. Apang daw ano kasunson nga ang pagpabutyag sini ginapatumbayaan. Isa ka bes gin-uli sang tsuper sang taxi ang kahita sang tawo nga nabilin sa iya taxi. Daw ano nga regalo! Ginkuha sang tag-iya ang iya kahita nga wala man lang sing ginhambal. Handurawa kon ano ang pagpalangluya sang tsuper sang taxi sa sining pagkadimapinasalamaton. Sia nagtu-aw, “Kuntani nagsiling man lang sia sing ‘Salamat.’”

Ang isa ka guwa sining magasin nagreport tuhoy sa isa ka grupo sang mga lalaki sa hayskol nga nagporma sing klab sa tuyo nga buligan ang mga tawo. “Ginbuligan nila ang naaberiya nga mga motorista paagi sa pagkay-o sang nagkupos nga mga goma, naghatag sila sing gas kon daw maubusan sila, kag ginbuligan nila sila sa iban pa nga mga paagi,” siling sang artikulo. ‘Wala nila ginpabayaran ang ila mga serbisyo. Ginpangabay lamang nila ang mga motorista nga magpadala sing ‘nagapasalamat’ nga sulat agod taguon sang ila klab.’ Ano ang mga resulta? Ang humalambal sang klab nagsiling: “Abi ninyo, tubtob sa karon duha lamang ka sulat ang nabaton namon, bisan pa suno sa rekord sang amon klab nakabulig kami sa kapin sa 150 ka motorista sa sulod sang duha ka tuig nga naorganisar kami.”

Daw ano kadaku mo pasalamatan ang isa nga nagluwas sang imo kabuhi? Daku gid nga regalo ang ginhatag sina nga tawo sa imo! Apang, ginrisgo sang isa ka tawo ang iya kabuhi agod luwason ang mga pasahero sa isa ka barko nga buot na malunod, 17 ang iya naluwas gikan sa mga kamot sang kamatayon, kag sa tapos sini gindala sia sa iya balay nga maluya na. Sang ginpamangkot sang ulihi nga mga tuig kon ano ang nagapangibabaw sa iya memorya tuhoy sa maisugon nga pagluwas nga ginhimo niya, sia nagsabat: ‘Amo lamang ini, ginuo. Sa disisiete ka tawo nga akon ginluwas wala gid sing isa nga nagpasalamat sa akon.’

Isa bala ka tanda sang kaluyahon ang pagsiling sing “salamat” bangod sa isa ka buhat sang kaayo, sa isa ka materyal nga regalo, ukon sa kabuhi nga dulot? Magapasalamat bala ini sila kay Jehova nga Dios, ang Dakung Manughatag-sing-kabuhi, bangod sa ila kabuhi? Kon indi sila makapasalamat sa isa nga ila makita, posible bala nga pasalamatan nila ang Isa nga indi nila makita?—1 Juan 4:20.

Katingalahan bala nga kadamo gid sang mga pamatan-on karon ang nabudlayan sa pagpabutyag sing tinagipusuon nga pasalamat bangod sa regalo nga nabaton ukon sa isa ka buhat sang kaayo nga ginpakita? Kon ang mga ginikanan wala nagasiling sing “palihog” kag “salamat,” ang ila kabataan mahimo man nga indi maghimo sini.

Ang kakulang sing apresasyon isa sang nagapakilala nga mga tanda nga nagakabuhi kita sa “katapusan nga mga adlaw.” Si apostol Pablo nagpaandam: “Sa katapusan nga mga tion magaabot ang makahalanguyos nga mga tion. Kay ang mga tawo mangin mahigugmaon sang kaugalingon, . . . dimapinasalamaton.”—2 Timoteo 3:1, 2.

Kon Paano Magpakita sing Apresasyon

Ang pagdesinyo kag pagbaligya sing nagapasalamat nga mga kard isa ka daku nga negosyo. Madamo nga kard ang matahom nga nagapabutyag sang mga sentimiento. Kombenyente ang pagbakal sini kag pagpadala sini sa mga naghatag sing regalo ukon nagpakita sing mga buhat sang kaayo. Apang dugang pa, indi bala mangin mahigugmaon kag maayo nga dugangan ini sing personal nga butang, sulatan ini sa aton kaugalingon nga mga tinaga sing aton apresasyon sa aton kaugalingon nga agi—ayhan hingadlan ang regalo nga nabaton kag daw ano kadaku ang pag-apresyar naton sa sini kag ang kalipay nga aton nabaton ukon ginapaabot nga mabaton naton gikan sa paggamit sini?

Upod sa sini, kon posible, indi bala apresyahon sang naghatag ang malipayon nga pagpabutyag sing pasalamat paagi sa bibig, ukon pagkamusta sang kamot, mainit nga paghakos, ukon iban pa nga kumpas sang kahamuot? Kon magreklamo kita nga wala kita sing tion sa paghimo sini, nian hunahunaa ang tion, panikasog, kag kuwarta nga ginhinguyang sang naghatag para sa aton. Ang kalipay sang naghatag ginapadaku pa sang aton ginapakita nga ­apresasyon.

Maayo nga dumdumon naton ang mga pulong sang labing daku nga manughatag sa tanan, si Jesus: “May kapin nga kalipay sa paghatag sang sa pagbaton.” (Binuhatan 20:35) Sa dili madugay, sa nagapakari nga dutan-on nga Paraiso sang pagkamatarong, indi lamang magapasalamat sa adlaw-adlaw ang tanan nga pumuluyo kay Jehova nga Dios bangod sa dulot nga kabuhi kundi magapakita man sila sing mahigugmaon nga apresasyon sa isa kag isa bangod sang ila mga buhat sang kaayo. Kabay nga magpakita kita sing apresasyon karon kag tigayunon ang kahamuot ni Jehova kag sang aton isigkatawo.