Nadula sa Kapin sa 20 ka Tuig

“Ikaw ang utod ko nga lalaki kag ang utod ko nga babayi. Madugay ko na kamo ginahulat!”

DAW ano kakunyag nga ginpabutyag ni Jimmy ining mga pulong sang makita sia namon sang akon asawa! Sa kapin sa 20 ka tuig, ginpain sia sa tulad-bilangguan nga mga kahimtangan. Karon, sa amon pagduaw sang 1977, ang panahon sang kaumpaw buot na magsugod.

Apang paano kag sa diin inang Edad Media nga mga kahimtangan natabo sa aton panahon? Una anay, magbalik kita sa ginsuguran.

Ang Madulom nga Kabuhi Ginpasanag sang Kamatuoran sang Biblia

Si Jimmy Sutera natawo sang Hunyo 13, 1913, kag ginpadaku sa Brook­lyn, Nueva York. Ang iya matuod nga ngalan amo si Vin­cent, apang ginatawag sia nga Jim­my. Kutob sang pagkalapsag, mapintas nga ginbaldado sia sang spi­nal men­in­gi­tis. Samtang bata pa sia, nagpasulod-paguwa na sia sa mga ospital.

Isa ka adlaw sang pagpauli ni Jim­my halin sa simbahan, nagpungko sia sa iya ugsaran, nga nagahibi bangod sa kasubo. Ang isa ka maluluy-on nga babayi nga nagahingalan kay Rebecca natandog sang danyag kag ginpalig-on sia. Ginpaathag niya nga ang Dios nagaulikid sa iya kag nga ang Dios may ngalan, si Jehova. Maabtik nga nahangpan ni Jim­my ang kamatuoran sa iya hamili nga mensahe. Isa sia sang mga Saksi ni Jehova (sadto kilala subong mga Estudyante sang Biblia).

Ang mga ginikanan ni Jim­my, ang iya mga utod nga lalaki, kag ang iya mga utod nga babayi wala tanan mag-ugyon sa iya bag-o masapwan nga pagtuluohan. Gani patago nga ginpadayon ni Jim­my ang pagtuon sing ihibalo sa Biblia. Pagdumdom sang iya mga ginikanan nagakadto sia sa simbahan, apang ang matuod nagatambong sia sa mga miting sang mga Estudyante sang Biblia kag nagaupod sa ila sa pagministeryo sa publiko.

Sang 1932, gindedikar ni Jim­my ang iya kabuhi sa Dios kag ginsimbuluhan ini sing bawtismo sa tubig. Sing makawiwili, ang presidente sadto sang Watch Tower Society, nga si J. F. Ruth­er­ford, amo ang naghatag sang pamulongpulong sa bawtismo.

Bisan pa nabudlayan gid si Jim­my sa paglakat, nagaupod sia sa pagbantala sing Ginharian sa balay kag balay nga ginagamit ang mga kard para sa testimoniya kag ang ponograpo. Ang pagpatokar sang narekord nga mga sermon sa ganhaan sang mga tawo amo sadto ang una nga metodo sa pagpalapnag sang mensahe sang Ginharian nga ginagamit sang mga Saksi ni Jehova sang katuigan 1930. Bisan mabudlay para kay Jim­my nga magdala sing bisan ano, nagaguwa sia, nga ginabitbit ang ponograpo sa isa ka kilid kag ang bag nga puno sing literatura sa pihak.

Ginpasulod sa “Nursing Home”

Apang ginpolyo si Jim­my kag paagisod nga gin-atake sing ­stroke, nga nagresulta sa iya indi na paggamit sa iya nawala nga kilid. Nagmasakit man sia sing Par­kin­son’s dis­ease kag binudlayan sa paghambal kag nagautol-utol. Ang iya mga ginikanan, nga sadto tulutigulang na, namat-od nga pasudlon sia sa isa ka nurs­ing home malapit sa Brook­lyn, Nueva York. Natabo ina sang 1958.

Sing dalayawon, ang mga katapo sang iya pamilya nagpakita sing matuod nga kabalaka paagi sa pagduaw sa iya sing makapila kada semana, bisan pa ang iban sa ila batok gid sa iya relihion. Sing dimakalilipay, ang administrasyon sang nurs­ing home indi mainabyanon. Sanglit sa pisikal indi sia makagamit bisan sing telepono sa pagtawag sa iya espirituwal nga mga kauturan, nadula niya ang bug-os nga pagpakig-angot sa katawhan ni Jehova. Yari sia, sa isa ka nurs­ing home nga pila ka milya lamang gikan sa bug-os kalibutan nga ulong-talatapan sang mga Saksi ni Jehova apang daw subong sang bilanggo kag napain gikan sa tanan nga espirituwal nga pagpakig-upod!

Ang mga kahimtangan sa nurs­ing home naglain, kag sang ulihi sang tunga-tunga sang 1970, ginsikway sang estado ang pasilidad. Apang, bangod kulang sing nurs­ing home sa siudad sang Nueva York, wala sing duog nga makita nga sayluhan sa mga pasyente. Ang mga tanga maisog nga nagadinalagan patabok sa salog kag mga dingding. Kon kaisa ginasakit sang iban nga mga empleyado si Jim­my. Nagbatas sia, nga napain sa sadtong makaluluoy nga lugar sa kapin sa 20 ka tuig. Apang ang iya Soberanong Ginuong Jehova indi malayo sa iya kag gintipigan ang iya pagtuo nga buhi kag malig-on—isa ka kamatuoran nga mapamatud-an namon sang akon asawa. Apang paano namon sia nakita?

Kon Paano Namon Nakit-an si Jimmy

Sang maaga nga bahin sang 1970 ang akon asawa, si Barbara, kag ako nangin mga Saksi ni Jehova man. Sang ulihi, naghalin kami gikan sa naaminhan nga Nueva York padulong sa ­Queens, siudad sang Nueva York. Samtang nagaplano kami sa pagsaylo, nadumduman sang akon amay nga ang iya tiyo sa siudad mahimo nga isa sang mga Saksi ni Jehova. Sa kamatuoran, nadumduman niya nga ang iya tiyo Jim­my nagasugid anay sa iya sing makalilipay nga mga sugilanon nahanungod sa mga bata nga lalaki nga nagapakighampang sa mga leon sa Paraiso.

Mga isa ka tuig na kami sa siudad sang Nueva York sang mahibal-an namon gikan sa utod nga babayi ni Tiyo Jim­my, ang akon tiya, nga sia matuod isa sang mga Saksi ni Jehova, “isa sa inyo,” suno sa iya. Ginhatag niya sa amon ang direksion, kag sa sulod sang isa ka oras didto na kami sa nurs­ing home. Ginpadulog kami sang isa ka nars sa puertahan, bangod indi oras sadto sang pagduaw. Ginpaathag ko nga nagkari kami agod duawon ang akon tiyo kag nga isa ako ka ministro, isa sang mga Saksi ni Jehova.

“Wala ako sing ginadampigan, apang wala namon ginatugutan ang mga Saksi ni Jehova diri,” amo ang sabat nga maathag gid nga may nadampigan. “Ginatugutan namon diri ang Katoliko nga pari, ang Protestante nga ministro, kag ang Episcopal nga pari, apang wala namon ginatugutan ang bisan sin-o sa mga Saksi ni Jehova.”

Nagatinguha sa pagpabilin nga kalma, ginhatagan ko sia sing duha ka pililian: (1) Pasudlon niya kami sa gilayon kag sing mahidaiton ukon (2) makighusay sia sa polisiya. Ginhimo niya ang maabtik kag mahidaiton nga pili.

Indi ko madumduman nga nakita ko anay si Jim­my, bangod mga apat ka tuig lamang ang edad ko sadto sang magsulod sia sa nurs­ing home. Nagsulod kami sa iya kuwarto kag ginsugiran namon sia sang amon ngalan. Hinali sia nga nagbangon sa iya katre kag nagtuaw, “Utod ko!”

“Indi, sa banta ko indi mo kami kilala,” siling ko, kag ginsulit ko ang amon ngalan.

“Ikaw ang utod ko nga lalaki,” siling niya liwat, “kag ang utod ko nga babayi. Madugay ko na kamo ginahulat!” Sa pagkamatuod, ang buot niya silingon nga kami iya espirituwal nga utod nga lalaki kag utod nga babayi.

Nahibal-an namon sang ulihi nga ang iya utod nga babayi, nga batok gid sa amon relihion, nagsugid sa iya nahanungod sa amon. “Si Al kag si Barbara nagbuylog sa imo relihion,” siling niya. Gani sa sulod sang pila ka tuig ginhulat niya kami nga duawon sia, agod ipaambit ang pagtuo nga amon ginaugyunan.

Buhi kag Malig-on nga Pagtuo

Samtang nagahambalanay kami, nag-athag sing dugang pa nga ining diutay nga alukaba sang isa ka tawo nagaunod sing isa ka higante nga tagipusuon nga puno sing espiritu kag pagtuo. Samtang ginalagulad namon ang iya memorya, nagbalikwat sia sing madamo nga dinalan sang Kasulatan, nagpaathag sa amon sang madalom nga tagna sang Biblia, kag nag-amba pa sia sing ambahanon nga ginkomposo niya nga nagpabutyag sing tinagipusuon nga apresasyon kay Jehova. Ang nawong ni Tiyo Jim­my nagsilak; ang iya bug-os nga pagkatawo nagpakita sing kalipay kag kapagsik nga tumalagsahon gid sa isa nga maathag nga ginpabaskog sang Dios. Daw isa yadto ka milagro sa amon. Ti, daw isa yadto ka pagkabanhaw.

Wala madugay, ang tion para sa 1977 nga distrito nga kombension nagahilapit. Namangkot kami kon mahimo namon paupdon si Jim­my. Wala magtugot ang administrador. Sa isa pa ka pagduaw, ginpamangkot namon ang nars kon mahimo namon ipamasyar si Tiyo Jim­my sa wheel­chair sa palibot sang bloke. Bisan pa indi nila kinabatasan nga dalhon sia sa guwa, ginkabig niya ini nga isa ka maayong ideya. Gani ginhimo namon ini. Apang, wala pa kami makapalayo diutay, ginlagas kami sang administrador, nga nagasinggit kag nagasiling sa amon nga indi na gid sia pagdalhon sa guwa liwat.

Sugod gid sang amon una nga pagduaw, ginbilinan namon si Jim­my sing literatura. Sa pagbalik namon, wala na ini. “Diin na ang imo literatura?” pamangkot namon.

“Ginpahamtang ko,” siling niya.

“Diin ang imo Biblia?”

“Ginpahamtang ko.”

Ang songbook, ang Yearbook, ang bisan ano nga ibilin namon sa iya ginabilin niya sa mga interesado. May yara sia nagadabdab nga handum sa pagdayaw sa ngalan ni Jehova. Nahibaluan man niya nga gub-on sang administrasyon ang bisan anong literatura nga makit-an nila.

Isa ka bes, sang nagahambal ako tuhoy sa mga hitabo kag tagna sa kalibutan, nagsiling ako: “Tiyo Jim­my, indi bala dalayawon ini? Sa dili madugay ang katapusan sining sistema nga ginpamulong ni Jesus magaabot na. Sa dili madugay himayaon ka subong hari kag saserdote sa langit, kag matapos na ang tanan mo nga pag-antos.”

Sa wala sing bisan diutay nga pagpang-alag-ag, nagsabat sia nga may pagpadaku: “Indi ina importante.” Kag upod ang tumalagsahon nga pagpadaku, sia nagsiling: “Ang ngalan ni Jehova mabindikar!” Natandog kami sa paghibi sang iya diosnon nga pagtamod. Nag-antos sia sing daku sa bug-os niya nga kabuhi, apang ang iya labing daku nga handum amo nga makita ang ngalan ni Jehova nga ginapakabalaan sa baylo nga mabaton ang personal nga kaumpawan.

Isa ka Makalilipay nga Pagbalhin

Sang 1978 ang mga empleyado sang nurs­ing home sa siudad sang Nueva York nagwelga, nga nagpilit sang pagsaylo sang mga pasyente sa mga ospital. Wala na pagtuguti sang estado nga magbukas liwat ang daan nga nurs­ing home. Gani yara na karon si Jimmy sa mas maayo nga puluy-an sa isa ka bahin sang siudad nga malapit sa dagat. Palangga sia sang tanan nga nars kag ginaatipan sia sing maayo. Kamusta ang iya espirituwal nga mga kinahanglanon?

Ginadala karon sang mga katapo sang lokal nga kongregasyon sang mga Saksi ni Jehova si Tiyo Jim­my sa mga miting kag mga asambleya. Nagapahamtang sia sing kapin sa isa ka gatos ka magasin kada bulan, ang kalabanan sa nurs­ing home. Apang, ginapaupod man sia sang mga Saksi sa pagministeryo sa balay kag balay sa iya wheelchair. Makapila na nga ginpaupod sia sang iya espirituwal nga mga utod nga lalaki kag mga utod nga babayi sa pagduaw kay Barbara kag sa akon sa Watch­tower ­Farms sa naaminhan nga Nueva York, nga sa diin nagapuyo kami sa nagligad nga napulo ka tuig.

Si Tiyo Jimmy nagasiling nga ang kongregasyon “dalayawon gid, palangga ako sang tanan.” Matuod ini. Ginapalangga gid nila kag ginaatipan sia. Ang nagadumala nga manugtatap, si Jo­seph Bow­ers, nagasiling: “Wala gid ako makabati sa mga kauturan nga nagareklamo sa pag-atipan sa iya.” Nian, upod ang matuod nga balatyagon sa iya tingog, nagdugang sia: “Nangin mabungahon pa ang akon kabuhi sang makilala ko sia.”

Bisan pa sa pila ka talaksan manubo ang edukasyon ni Jimmy, maathag gid sa iya ang katapusan nga hulusayon—ang pagbindikar kay Jehova subong ang Supremo nga Soberano sang Uniberso. Amo ini ang nagapangibabaw sa iya hunahuna. Malipayon nga buhi sia, malipayon sia nga nagaalagad kay Jehova, nga nakahangop sing bug-os nga paagi sa iya matutom nga dalanon sa kabuhi ginapamatud-an niya si Satanas nga butigon kag nagaambit sia sa iya nahibaluan amo ang labing importante nga hilikuton sa tanan, ang ministeryo sa Ginharian.—Gin-asoy ni Albert Caccarile.